04/08/2026
-
بقالنا فترة عايشين في مشكلة سوق الملابس في مصر
وفيه حالتين بالتحديد همّا الأكثر ضجّة - وهمّا حالة شركة سترة - وحالة شركة المخزنجيّ للأستاذ خالد الشافعيّ
-
حالة شركة سترة أنا ما حبّيتش اتكلّم عنها - لإنّها مشكلة معقّدة - وفيه ناس نحسبهم على خير متدخّلين في حلّها إن شاء الله
-
وحالة الأستاذ خالد الشافعيّ أنا كنت شايفها حالة عاديّة - بل بالعكس - كنت شايفها تصرّف حكيم جدّا من حدّ مسؤول إنّه شايف السوق سيّء ف بيخرج منّه
-
وأنا شخصيّا بحبّ البوست اللي لو اتقرأ بعد 10 سنين يفيد - حاجة كده زيّ ما تسمع دلوقتي أغنيّة لأمّ كلثوم ف يعجبك الشغل اللي فيها
-
معيار جودة الفنّ أصلا هوّا إنّه يفضل يعجب الناس على مرور الأجيال
حاجة زيّ أبو الهول كده - لسّه بيعجب الناس بعد 200 جيل مثلا
لكن ممكن أغنيّة ل حمّو بيكا تعجبك أسبوع وخلاص شكرا على كده
-
وتطبيقا للمبدأ ده - اللي هوّا الكلام عن الفكرة - مش عن الحالة - الكلام عن المبدأ - مش عن الأشخاص - إتكلّمت في حالة سترة عن موضوع ( التوسّع )
-
إنتا بعد 10 سنين لو لقيت بوست عندي بيتكلّم عن مشكلة حصلت من 10 سنين في شركة إسمها سترة - مش هيفيدك
-
لكن - لو قرأت بوست عن التوسّع - هيفيدك إن شاء الله
-
وفي حالة الأستاذ خالد - باتكلّم عن ( التكيّف )
-
الدكتور إيهاب مسلّم ليه محاضرة كاملة - سمعتها كلّها - عن التكيّف - وازّاي المهارة دي هي أهمّ مهارة للإنسان
-
وأنا شخصيّا مؤمن بكده
وعن نفسي - غيّرت نشاطي ممكن 4 مرّات في 16 سنة فقط
-
من 2010 ل 2013 كنت مهندس
من 2014 ل 2018 كنت محاضر سوليدووركس
من 2019 حتّى الأن عندي مكتب دراسات جدوى واستشارات
ومن 2025 حتّى الآن عندي شركة توزيع مستلزمات تغليف صناعيّة
وبداية شتاء 2026 هضيف نشاط توزيع مستلزمات التغليف الغذائيّة إن شاء الله
-
ف بأيّ حقّ هاقدر أنا - أو الدكتور إيهاب - ننتقد تكيّف الشيخ خالد الشافعيّ !!
-
لكن - للأسف - لقيت بوست عند الدكتور إيهاب بينتقد تصرّف الشيخ خالد ويكإنّه خطأ !!
-
إزّاي التكيّف يبقى خطأ - بعد محاضرة حضرتك الكاملة عن التكيّف باعتباره المهارة الأهمّ للإنسان !!
-
ف يجي لنا هنا سؤال مهمّ - وهو - وهل الشيخ خالد فشل - ولّا غيّر النشاط
-
سؤال صعب والله - لكن - خلّينا نحاول نفكّكه كالتالي
-
ف نقول
الفشل هوّا إنّك تهمل في اتّخاذ الإجراءات اللازمة في مجال ما - ف الناس اللي اتّبعت الإجراءات دي تنجح - وانتا تفشل
-
لو هنعتمد التعريف ده - ف الشيخ خالد كده مش فاشل
-
وذلك لسببين
-
الأوّل - إنّ الراجل بيتّخذ إجراءات فعلا - أنا مش كاشف كلّ تصرّفاته - لكن - اللي ظاهر لي منّه إنّ الراجل بيحاول في كلّ الاتّجاهات
-
والسبب التاني - هوّا إنّ السوق دا ضاغط أصلا على كلّ اللي فيه - ودا ليه بوست لوحده إن شاء الله - لكن حبّيت أفصل البوستين دول عن بعض - عشان بعدين لو حبّيت أحذف واحد التاني يفضل موجود إن شاء الله
-
لسّه قايلين من يومين نصيحة إنّك تخلّي المصنع كيان لوحده - والشركة كيان لوحدها
-
ف على المقياس ده - ما نقدرش نقول إنّ الشيخ خالد فشل أو فاشل
-
الفشل الحقيقيّ كان هيحصل لو كان الشيخ خالد فضل متمسّك بإنّه والله ما انا قافل المحلّات دي أبدا ولو على جثّتي
-
وأنا شخصيّا مثمّن تصرّف الشيخ خالد ممكن أكتر من كلّ الناس
-
لسبب
إنّي أنا وهوّا استشاريّين - ف فيه حاجة إحنا نحسّ بيها والناس ما تحسّش بيها
-
ألا وهي - إنّ تصرّفاتنا في بيزنسنا الشخصيّ بتنعكس على بيزنس الاستشارات بتاعنا
-
يعني
أيّ تصرّف - هيتقال لك عنّه مباشرة ( وبسّ عامل لنا فيها استشاريّ ) !!
آدي الاستشاريّين يا عمّ - يهرونا نصايح عن شغلنا - ويفشلوا في شغلهم
-
ف - بيصبح قرار التخارج من بيزنس فاشل ده بالنسبة لنا إحنا مضاعف الحمل - غير أيّ إنسان مواطن طبيعيّ
-
لو الشيخ خالد ده كان إنسان عادي - مش استشاريّ - وشاف البيزنس بتاعه بيخسر - ف قفله
كان - على الأقلّ - ما حدّش هيقول عنّه حاجة
-
وعلى الأكثر - كان هيتقال شوفتوا الواد الحكيم ابو عيون جريئة - اللي قدر يتغلّب على مطامعه الشخصيّة وأحلامه الورديّة ويقهر الصعاب ويعبر التحدّيات ويأخذ قرار الغلق دون خوف أو تردّد - وكلام تخين كدهوّت
-
وكنّا هنقول ( من الشجاعة أن تجبن ساعة )
وكنّا هنقول ( الاعتراف بالحقّ فضيلة )
وكنّا هنقول ( خسارة قريّبة ولا مكسب بعيد )
-
وأن تأتي متأخّرا - خير من ألّا تاتي علاولة
ويبقى البيت بيت ابونا - تطلع البتّ لامّها
-
لكن - لو استشاريّ - ف السكينة مسنونة وقاعدة مستنّيّة وجاهزة لأيّ تصرّف عكسيّ يطلع من استشاريّ - إنّه كده خلاص بقى هجّاص
-
بالمناسبة - أنا كتبت نصيحة زيّ دي من حوالي 5 سنين بعد ما شفت صديق استشاريّ بيعمل بيزنس بردو وبيربطه بإسمه - ف بعتت قلت له ما تربطش البيزنس بإسمك - خلّيه بيزنس عامّ - عشان لو فشل ما يلطّش إسمك انتا
-
يبقى بيزنس وفشل في الظلام وخلاص
-
لكن - لو البيزنس ده مربوط بإسمك - هيبقى حضرتك شخصيّا إنتا اللي فشلت - وهيقوم قالب الدنيا على أيّ بيزنس تاني انتا حاطط عليه إسمك بردو
-
كنت ساعتها جديد خالص في الاستشارات - وهوّا ما سمعش نصيحتي
-
وبالمناسبة - وللأسف - طلعت نصيحتي ليه صحيحة بعد كده
-
أنا عندي أعجوبة - إنّي لمّا نصايحي بتتحقّق - بازعل - ههههههههه
ما هو معنى إنّها اتحقّقت - إنّ حد خسر لمّا خالفها - ف هافرح بالخسارة ازّاي
-
ف - بالترتيب كده
هل الشيخ خالد مخطأ ؟!
-
أنا شايف لأ
-
على قدر المتاح عندي من معلومات عن تصرّفاته في شغله - مقارنة بتخاريف تانية بنشوفها من ناس كتير عمّالة تلوّش يمين في شمال وتخسر وتتوسّع تاني وتخسر وتاخد فلوس تالت - تضيّعها وتخسر - ف الراجل ما شفناش منّه كده
-
وإلّا كان زمان الطبل والزمر شغّالين وناس بتطالبه بشيكات وبيصوّروا فيديوهات قدّام محلّاته - وفين فلوسنا يا مش عارف إيه - والفنون الشعبيّة بتاعتنا دي
-
والسبب التاني زيّ ما قلت إنّ الحالة عامّة أصلا - عامّة على سوق الملابس ككلّ
-
قلت قبل كده إنّ الذكاء هو دالّة في السرعة
-
يعني - ما فيش حدّ غبيّ - كلّ الناس أذكياء
لكن - الفارق هو السرعة
-
أغبى إنسان - ممكن تعلّمه أيّ مهارة - لكن - هياخد منّك 10 سنين
-
اللي يتعلّمها في سنة يبقى ذكيّ
اللي يتعلّمها في شهر يبقى أذكى
واللي يلقطها منّك من أوّل مرّة يبقى دا العبقريّ
-
ف الذكاء هو إيه ؟!
دالّة في السرعة
-
لو احنا قاعدين في عمارة دلوقتي - ولقينا العمارة بترقص - ف أذكى واحد فينا هوّا أوّل واحد هنلاقيه في الشارع
-
أفتكر مرّة كنت بعدّي الطريق السريع - ولقيت ربع جنيه مخروم ع الأسفلت - أيّام ما كان فيه ربع جنيه
-
لو وقفت ووطّيت اجيبه - ممكن عربيّة تخبطني
ولو كمّلت مشي - هابقى خسرت ربع جنيه
ف شوطت الربع جنيه برجلي طلّعته من ع الأسفلت - ورحت شيلته من ع التراب
-
يبقى الذكاء هو إيه ؟!
الذكاء هوّا دالّة في السرعة
-
ف
لو الشيخ خالد هوّا أسرع واحد يعلن انسحابه من سوق الملابس وهوّا بينهار -يبقى هوّا أذكى واحد في سوق الملابس
-
ولّا إيه ؟!
-
فيه فرق بين الفشل - والانسحاب - والمناورة بالقوّات
-
الفشل - هو الفشل - إنّك تنهزم في المعركة - وجنودك يقتلوا - والباقي يأسروا
-
والانسحاب - إنّك لمّا تشوف المعركة خلاص خسرانة خسرانة - تنسحب بجنودك سالمين - وتخرج من مرمى العدوّ - ما انتصرتش - لكن - ما اتهزمتش
-
وسيّدنا خالد رضي الله عنه في غزوة مؤتة نموذج على ده
-
والمناورة بالقوّات - إنّك لمّا تلاقي الميمنة عند العدوّ قويّة - وميسرته ضعيفة - تسحب من جنود ميسرتك وتضغط بيهم على جنود ميسرة العدوّ
-
أو تلاقي العدوّ بيلتفّ من خلف جيشك - ف تطلّع مفرزة من جيشك تلتفّ حوال اللي بيلتفّوا عليك
-
زيّ ما كان المفروض احنا نعمل مع ثغرة الدفرسوار مثلا
-
لكن - السادات - لإنّه حضر حرب 67 - وشاف الانسحاب - أو بتعريفنا بقى شاف الفشل - لإنّ احنا ما انسحبناش واحنا سالمين
-
لو كنّا انسحبنا في بداية الحرب كان بقى انسحاب
-
ونموذج الانسحاب الصحيح في 67 كان انسحاب الشاذليّ رحمه الله بجنوده
تقدّم ودخل فلسطين ليحتمي بالجبال من الطيران
ثمّ انسحب بالليل وعبر معظم سيناء محتميا بالظلام
وتاني يوم خسر ثلث قوّاته ونجا بالثلثين
-
ودا كان بعد ما أمر الانسحاب تأخّر أصلا - يعني هوّا نفّذ ده والجيش مهزوم بالفعل - ما حدّش بيساعد معاه
-
ف دا راجل عارف يعني إيه انسحاب - وعارف يعني إيه مناورة بالقوّات
-
لكن - وللأسف
السادات إعتبر إنّ مناورة الشاذليّ بالقوّات اللي طالبها في 73 دي انسحاب - أو فشل يعني - ف رفض وصمّم على عدم تحريك قوّات لتغطية الثغرة !!
وكان ما كان ولا حول ولا قوّة إلّا بالله
-
ف
لمّا آجي أنا ألاقي سوق الملابس بينهار - وسوق كذا كويّس
ف أصفّي نشاطي في الملابس - وأسحب شويّة الملاليم اللي معايا - والعب بيهم في سوق الكذا اللي انا شايفه كويّس ده
-
ف ده لا هوّا فشل
ولا هوّا انسحاب
ولكنّه مناورة
-
وبتعريف الدكتور إيهاب - ف ده ( تكيّف )
-
ولو انا أوّل واحد هـ ينسحب - أو يناور - ف أنا أذكى واحد في السوق
-
تيجي هنا نقطة مهمّة - وهي
مش انتوا استشاريّين وعارفين الكفت - وبتطلّعوا النصيحة من بذر العنب - يبقى ازّاي مشروعكم يخسر أصلا !!
-
أهو دا سؤال من شخص غبيّ - هههههههههه
-
ما فيش حدّ يقدر يكون ملمّ بكلّ معطيات السوق في مجاله
المهارة في البيزنس زيّ مهارة السواقة كده - إنتا بتسوق عربيتك - والسوق ( الطريق ) بيتغيّر حواليك
-
مهارتك إنّك تكون منتبه للسوق - منتبه للطريق
منتبه للمنافسين - الناس اللي سايقين حواليك
منتبه للمطبّات - مشاكل السوق
-
منتبه لليفط وعدّادات العربيّة - قياسات السوق
منتبه لحدّ السرعة والرادارات - للقوانين يعني
-
منتبه لعدّاد البنزين - سيولة شركتك يعني
منتبه لمؤشّر الحرارة في عربيّتك - أرباحك وخسايرك
-
لكن - هل لإنّ انا سوّاق - سوّاق ماهر - هكون معصوم من حدوث أيّ مشكلة حواليّا !!
عربيّتين يخبطوا بعض ف يزقّوا عربيّة تالتة تيجي تخبط فيّا انا !!
-
هل هكون معصوم من وجود شبّورة مثلا
معصوم من وجود قطعة غيار مضروبة تضرب منّي وانا ع الصحراويّ
-
هل عشان أنا سوّاق ماهر - يبقى ما ينفعش أقف على كافيتيريا ارتاح
ما ينفعش لو لقيت العربيّة سخنت - أقف أنتظرها تبرد وازوّد لها ميّه
-
ما ينفعش أرجع بالعربيّة بضهرها
ما ينفعش أبيع العربيّة
-
حضرتك اللي عندك تصوّر خاطيء عن الاستشاريّ - تصوّر إنّه المفروض ما يخسرش !! إحنا مش مسؤولين عن التصوّر ده
-
واللي بيخرج برّا دايرة الاستشارات منّنا - ويدخل البيزنس - رغم ما انا قلت لك إنّ دا بالذات بيكون تحت الميكروسكوب - ف دا مشكور منّنا
-
الشيخ خالد عمل كده
وأنا عملت كده وعملت شركتي التجاريّة الخاصّة والحمد لله
-
واللي يخسر من الاستشاريّين اللي عندهم بيزنس - ف يتراجع ويحكّم العقل - مشكور شكر مضاعف - لإنّه تجاوز كبرياء الاستشاريّ - واعترف بخطأه - وأخذ القرار الصحيح بدلا من المكابرة - اللي هيّا أسهل حاجة بالمناسبة - خصوصا على شخص أوتى القدرة على الكلام
-
أخيرا
الدكتور إيهاب أسهل واحد ممكن تعمل عليه تعليق سلبيّ - ف تلاقي نصّ الشعب بيعلّق جنبك ومعاك بتعليقات سلبيّة عليه
-
ودا لإنّه راجل اختار يغيّر في المجتمع - وأيّ حدّ هييجي لمجتمع ويحاول يغيّر فيه - ف كلّ النفوس هتتشحن ضدّه
-
ف أنا لو شاورت عليه وقلت كلمة سلبيّة - هلاقي جيش ورايا بيردّد كلامي
-
الجيش دا ما يفرّحنيش - لإنّهم مش منتقدين حقيقيّين - همّا - أو معظمهم - موتورين من الراجل اللي جه في يوم من الأيّام وكشف عورتهم وقال لهم انتوا بتخطؤوا في ممارساتكم في شغلكم
-
عشان كده أنا حذفت شير كنت عامله على بوست الدكتور إيهاب لمّا لقيت معظم الناس واخدين الموضوع ناحية إنّه تعالوا يا ولاد فيه حدّ بينتقد الدكتور إيهاب اهو ف تعالوا انتقدوه براحتكوا !!
-
وفضّلت أكتب بوست تفصيليّ عن الموضوع بعيدا عن مجرّد بوست خفّة دمّ وهزار بدون فائدة
-
والشيخ خالد أنا مش مؤيّد ليه على طول الخطّ بردو ف بانتصر له من الدكتور إيهاب
كلّ منهم له ما له وعليه ما عليه
-
الشيخ خالد له - إنّه في يوم شيّر صفحتي عنده وزكّاني للناس - قمت تاني يوم لقيت الصفحة عندي زايدة حوالي 10 آلاف متابع أو أكتر في ليلة واحدة
-
زيّ ما الدكتور إيهاب بردو ليه عليّا فضل إنّه استضافني على قناته - ف بردو رفع من رصيدي عند الناس الحمد لله
-
أي نعم هوّا حذف البودكاست بعد كده - هوّا حرّ - وأنا ما سألتوش ليه - زيّ ما انا ما سألتوش ليه استضافتني
-
الحمد لله الدكتور إيهاب استضافني وانا ناجح ومشهور - واستضافني بناءا على طلبه مش طلبي انا
-
وبعد ما حذف البودكاست فضلت زيّ ما انا الحمد لله
-
ف كلّ من الدكتور إيهاب والشيخ خالد ناس نحسبهم محترمين ولا نزكّيهم على الله سبحانه وتعالى
وكلّ منهم أصحاب فضل
-
واحنا يهمّنا تاني مش الموقف اللحظيّ - ولكن يهمّنا الحكمة منّه - والفائدة اللي هتمكث في الأرض
-
فَأَمَّا الزَّبَدُ فَيَذْهَبُ جُفَاءً ۖ وَأَمَّا مَا يَنفَعُ النَّاسَ فَيَمْكُثُ فِي الْأَرْضِ
-
ف أنا باختم بالكلام ده عشان اقول إنّي مش منصّب نفسي حكم بين اتنين همّا أكبر منّي في السنّ والقدر
-
ولكن - باكتب البوست ده عشان أزيل اللبس عن مفهوم مختلط - مفهوم الفشل والخسارة والانهيار بعد النجاح
-
ومفهوم الانتباه للمشكلة - وبسرعة - والانسحاب - أو المناورة والتكيّف معاها
-
-
ّار_بل_هم_الكرّار
-
