18/12/2025
Mingəçevirdə “UDEMY ilə Java dərsləri” layihəsinin icrasına start verilib
Mingəçevir şəhər Milli Qəhrəman Natiq Qasımov adına 4 nömrəli tam orta məktəbdə “UDEMY ilə Java dərsləri” layihəsinin icrasına başlanılıb. Layihə məktəbdə proqramlaşdırmaya maraq göstərən yuxarı sinif şagirdləri üçün peşəkar onlayn təlim mühitində Java proqramlaşdırma dilinin mərhələli şəkildə öyrədilməsini hədəfləyir.
Layihənin əsas məqsədi ilkin proqramlaşdırma biliklərinə sahib 16 şagirdin Java üzrə sistemli şəkildə inkişafını təmin etmək, onların gələcək karyera planlamasına dəstək vermək və məktəbdə rəqəmsal bacarıqların inkişafına yönəlmiş müasir təhsil mühiti formalaşdırmaqdır. Bu məqsədlə şagirdlər onlayn kurslar vasitəsilə həm nəzəri biliklər qazanacaq, həm də real layihə nümunələri üzərində praktiki bacarıqlar əldə edəcəklər.
Proqram çərçivəsində ilk mərhələdə dərnəyə seçiləcək şagirdlər üçün diaqnostik qiymətləndirmə aparılacaq və eyni səviyyəli qrupların formalaşması təmin ediləcək. Daha sonra məktəbdə Java proqramlaşdırma dərnəyi təsis olunacaq və 6 aylıq tədris planı üzrə fəaliyyətə başlayacaq. Hər bir şagird üçün Udemy platformasında fərdi hesab yaradılacaq, bu da onların dərslərə həm sinifdə, həm də sərbəst şəkildə qoşulmasına imkan verəcək.
Növbəti mərhələdə şagirdlər üçün həftədə iki dəfə olmaqla intensiv onlayn və praktik məşğələlər təşkil ediləcək. Təlim dövrü ərzində onların davamiyyəti, inkişaf dinamikası və rəsmi imtahan nəticələri monitorinq olunacaq. Kursun sonunda yekun qiymətləndirmə imtahanı keçiriləcək və əldə edilən nəticələr ümumi hesabatda əks olunacaq. Layihənin təsviri, kəmiyyət və keyfiyyət göstəriciləri üzrə hesabatlılıq təmin ediləcək.
Layihənin həyata keçirilməsi zamanı məktəb və Təhsil İdarəsi ilə əməkdaşlıq nəzərdə tutulur. Bu əməkdaşlıq şagirdlərin təlim prosesinə daha səmərəli cəlb olunmasına, dərnəyin fəaliyyətinin davamlılığının təmin edilməsinə və müəllimlərin peşəkar inkişafına dəstək verəcək.
Layihənin sonunda şagirdlər Java SE, Java EE, Spring Framework, JPA, multithreading, REST və SOAP API, həmçinin Linux mühitində işləmə bacarıqları da daxil olmaqla geniş spektrli proqramlaşdırma biliklərinə yiyələnəcəklər. Bu biliklər onların gələcəkdə startap ekosisteminə qoşulması, peşəkar inkişaf yolunda ilk addımlarını atması və informasiya texnologiyalarına marağın artırılması baxımından mühüm əhəmiyyət daşıyır.
Qeyd edək ki, “UDEMY ilə Java dərsləri” layihəsi Könül Ağayeva tərəfindən Mingəçevir şəhər 4 nömrəli məktəbdə icra olunur və məktəbdə yüksək səviyyəli proqramlaşdırma mühitinin yaradılmasına töhfə vermək məqsədi daşıyır.
