https://linktr.ee/kolemishevski

Kiril Kolemishevski, Toronto, ON (2026)

01/28/2026

Шпанските мезиња се една од оние работи што брзо ти стануваат дел од навиката. Не се спектакл, не се за покажување, туку за на обична дрвена маса, муабет и време што не се мери. Таму храната не е центарот, туку додаток на животот.
Шунката е основа на шпанската трпеза. Jamón не се јаде брзо и не се сече дебело. Парчињата се тенки, речиси проѕирни, и се јадат полека. Најценета е jamón ibérico, од ибериски свињи хранети со желади. Вкусот е богат, полн и длабок. Serrano е попристапна, посува и почеста секојдневно, но кога е добра, знае да биде повеќе од доволна. Во Шпанија, шунката не е нешто што треба многу да се мисли, туку нормален дел од денот.
Кашкавалите имаат свое место и свој ритам. Manchego е најпознат, направен од овчо млеко и со различна зрелост. Помладиот е благ и мек, постариот е поизразен и појак. Често се служи со маслинки, јаткасти плодови или малку мед. Комбинацијата на почеток звучи необично, но има логика и баланс.
Покрај нив, на масата редовно се појавуваат chorizo, со карактеристична мелена пиперка, salchichón, поблаг и посув, и lomo, сушено свинско филе. Се служат едноставно, без готвење и без комплицирање.
Концептот на шпанските мезиња не е количината, туку моментот. Малку од секое, чаша вино или пиво, луѓе што седат за да уживаат во моментот. Нема брзање и нема притисок да се оди побрзо дома.
За Македонец, ова е лесно разбирливо. И кај нас мезето е повод да се седи, да се зборува и да се остане уште малку.
Кога ќе седнеш на тераса, со сонце, малку шунка, парче кашкавал и мир што трае подолго од јадењето, станува јасно зошто храната таму е начин на живот.

01/27/2026

Шпанското вино менува сè што мислевме дека знаеме за цена и квалитет

Една од првите културни шокови во Шпанија не е плажата, ниту сонцето. Туку рафтот со вино во обичен супермаркет.
Стоиш, гледаш, и мозокот одбива да прифати. Црвено вино за 0.90, 1.30, 1.99 евра. Бело и розе од 1.39 до 2.99. Риоха, Торо, Рибера дел Дуеро, не имиња од маркетинг, туку региони што луѓето ги знаат од енциклопедии и мени од ресторан. А шампањ, вистински француски, под 20 евра.
Во Шпанија, виното не е луксуз. Тоа е начин на живот. Дел од културата. Дел од ручекот. Дел од нормалниот живот. Никој не те гледа чудно ако земеш шише за 1.99 евра. Никој не те убедува дека мора да платиш повеќе за да добиеш квалитет.
Црвените вина тука се сериозни дури и кога се евтини. Темни, суви, со карактер. Белите се свежи, чисти, без шеќерна измама. Розето не е за позирање, туку за пиење. А пенливото, без разлика дали е кава или шампањ, не чека Нова година за да се отвори.
Повеќето од нас сме научени дека скапото е добро, а ефтиното е сомнително. Шпанија кажува нешто друго. Квалитетот доаѓа од традицијата и почитта кон производот, не од цената и етикетата.
Кога виното е достапно, луѓето пијат помалку, но подобро. Не се прави драма. Не се фали. Се ужива. Чаша со ручек. Чаша со разговор. Без театар.
Ако сакаш да разбереш зошто животот на Коста дел Сол изгледа порелаксиран, почни од овде. Од рафтот со вино. Таму каде што квалитетот не e снобовска категорија, туку мирно стои со цена од 2.49 евра и чека некој што знае да ужива.
И да, откако еднаш ќе го видиш ова, тешко се враќаш на тоа што си го знаел за виното.

01/26/2026

Доколку се решиш да купиш недвижност во Шпанија, најголемите грешки не се прават од незнаење на шпанските закони, туку од игнорирање на практичните и секојдневните работи. Ова се точките што реално го прават секојдневието лесно или тешко откако ќе помине еуфоријата.
Прво, локацијата не е само град или населба, туку микролокација. Разликата меѓу место со живот преку цела година и населба што е мртва половина година е огромна. Провери како изгледа местото во зима, не само во август. Прашај дали има продавници, ресторани, аптека, транспорт и луѓе што живеат таму цела година.
Второ, заедницата на станари е многу битна. Колку се плаќа месечно, дали има долгови, дали планираат големи зафати како лифт или базен и каква е структурата на комшиите. Заедница со постојани станари функционира многу подобро од зграда со многу празни станови.
Трето, одржувањето на објектот. Во крајбрежни зони солта и влагата си го прават своето. Обавезно треба да се проверат клими, прозорци, ролетни, лифтови, кров и фасада. Овие работи не се гледаат на разгледување, ама сигурно ќе ги осетиш по џебот после купување.
Четврто, правната состојба на имотот. Дали се сите квадратни метри впишани, дали има нелегални доградби, дали имотот има долгови кон заедницата или општината. Ова мора да го провери адвокат, не продавач и не агент. Прашај си адвокат, не експериментирај.
Петто, трошоците после купувањето. Данок на имот, заедница на станари, комуналии, данок за нерезиденти. Станот си кошта пари и кога не го користиш.
Шесто, план за користење. Дали ќе живееш, ќе доаѓаш повремено или ќе издаваш. Од ова зависи локацијата, типот на имот и дали воопшто има смисла купувањето. Еден ист стан не е добар за сите сценарија.
Седмо, далечината. Ако не планираш да живееш во Шпанија, мора да имаш човек на лице место. Управител, агенција или некој на кој ќе му веруваш со одржувањето на станот или куќата. Без тоа, секој мал проблем станува огромен проблем.
И на крај, времето. Не брзај. Разгледај, дојди во различни месеци, поставувај непријатни и глупави прашања. Во Шпанија има многу недвижности, ама добрата одлука не е да решиш одма да купиш, туку да направиш паметен избор.
А избор, секогаш има.

01/25/2026

Ако си од Македонија и сакаш работа или бизнис на Коста дел Сол, првото што мора да се каже без шминкање и розови наочари е дека сонцето не ти е дозвола за работа. Како државјанин надвор од ЕУ, за легална работа најчесто треба работна дозвола и жителство, а тоа во пракса значи дека работодавачот мора да биде спремен да те вработи и да помине низ процедура. Токму затоа, многу луѓе заглавуваат не затоа што нема работа, туку затоа што документите и времето се реален проблем. Познато е ова од некаде? :)
Ако одиш на варијанта да најдеш работа, најлесно се влегува преку сезонски и услужни сектори, затоа што таму побарувачката е постојана, а отказите и вработувањата се многу чести. Меѓу најбараните профили се врзани со логистика и транспорт, угостителство, продавници, и позиции што често не се пополнуваат лесно, како келнери, готвачи, возачи на камион и градежни работници. Ова не е гламурозно и спектакуларно, ама е реалност на пазарот.
Позитивната страна е што ако зборуваш шпански барем на солидно ниво и ако си флексибилен со смени и сезона, шансите да најдеш работа се зголемуваат. Негативната страна е што платите во услугите често се пониски отколку што луѓето си замислуваат, работното време може да биде далеку од флексибилно, а летото знае да те исцеди, и физички и психички. Плус, има огромна конкуренција од луѓе што веќе се таму, особено за полесни работи каде што шпанскиот и не е толку потребен.
Ако сакаш подобро платени и стабилни позиции, тоа се профили што ќе донесат конкретна вештина, електричари, водоинсталатери, клима монтажери, мајстори за реновирање, техничари, возачи со лиценци, како и луѓе со искуство во продажба и поддршка на клиенти на повеќе јазици. Услугите секако доминираат, но има раст и во градежни активности и специјализирани услуги за објекти, одржување, градинарство, што директно е поврзано со недвижности и туризам.
Сега за бизнисот. Тука има две реалности што се судираат. Едната е дека Коста дел Сол е место каде постојано доаѓаат луѓе, туристи, нови резиденти, и пазарот има потреба за услуги. Другата е дека бирократијата, трошоците и конкуренцијата можат да те изедат ако влезеш без план. Ако сакаш да работиш како самовработен, во Андалузија мора да се регистрираш во даночната управа и во системот на социјално осигурување, и да плаќаш месечни придонеси кои зависат од приходи. Многу луѓе ја потценуваат фиксната обврска и потоа бизнисот им станува стрес.
Кои бизниси имаат најреална шанса да успеат, ако зборуваме реално?
Прво, услуги околу имоти, чистење, одржување, примопредавање клучеви, мали поправки, подготовка на стан за гости, проверка после невреме, и слично. Причината е проста, многу сопственици не живеат цела година таму и им треба човек на лице место. Второ, услуги поврзани со реновирање и енергетска ефикасност, клими, изолации, поправки од влага, мрежи за комарци, и слично, затоа што старите згради и куќи бараат постојано реновирање. Трето, превоз и логистика, трансфери, достави, помош при преселба, особено ако работиш со странци што сакаат сигурност и точност. Во Малага, логистиката, угостителството и трговијата се меѓу најдинамичните сектори во сезонски периоди, и тоа директно влијае на тоа кои услуги се исплатливи.
Има и бизниси што звучат убаво, ама често се дупка без дно. Бар или кафич без јасна локација и без разликување од другите се многу ризични, затоа што конкуренцијата е огромна и маржите се мали. Туристичкиот бизнис зависи само од јуни до август, а потоа девет месеци ќе е полупразно. Посебно важно е да се разбере дека Коста дел Сол е регион со силно услужна економија, што значи дека има работа, ама голем дел е сезонска и врзана со туризам и недвижнини. Тоа е позитивно ако влегуваш со услуга што се продава брзо, и негативно ако бараш стабилност како во класична индустрија.
Ако треба да се сведе на едно, најбрзиот пат до стабилност е комбинација од три работи, документи што ти го решаваат легалниот статус, шпански јазик барем за секојдневие, и вештина што носи конкретна вредност. Без тие три, и работа и бизнис стануваат борба со ветерници, без разлика колку е убаво времето.
Сега прашање што секогаш отвора дискусија. Кога би избирал, прво би одел да најдеш работа со конкретен занает, или би градел отворил бизнис околу имоти и одржување за луѓе што не се постојано таму?

01/23/2026

Вчера добив коментар „не е кратка летната сезона“. Ајде да видиме каква е климата на Коста дел Сол преку цела година.
Климата на Коста дел Сол е една од причините зошто луѓето воопшто почнуваат да размислуваат за живот или имот таму. Над 300 сончеви денови годишно звучат како реклама, ама реалноста е малку покомплицирана и затоа е битно да се каже и доброто и лошото.
Зимите се благи и за македонски услови изгледаат како продолжена есен. Дневните температури се од 15 до 20 степени , мраз и речиси нема, а снег е информација што може да ја видите само на вести. За луѓе што бегаат од ладно, ова е големо олеснување, но истовремено има и еден минус. Повеќето од постарите станови се градени без добра изолација бидејќи нема потреба од греење како во Македонија. Во јануари и февруари, внатре знае да биде поладно отколку што мислиш.
Пролетта е веројатно најубавиот период. Температурите се движат околу 20 до 25 степени, воздухот е лесен, а морето полека се загрева. Ова е период кога локалците најмногу уживаат, без гужви и без мачење сабајлето да облечат јакна, а попладнето да се шетаат по кратки ракави. Лошата страна е што времето може да биде непредвидливо, денес сонце, утре дожд и ветер, нешто што знае да изненади ако си планирал плажа или ден со семејството на некоја нова локација.
Летото е топло, долго и сериозно. Температури над 30 степени се нормални, а во внатрешноста знаат да одат и повисоко, но никогаш над 35 степени. Крајбрежјето е поподносливо поради морето, но влагата знае да биде напорна, особено во јули и август. Клима уредот не е луксуз, туку потреба. За некого ова е рај, за другите е причина да бегаат во планина или да ги поместуваат дневните активности рано наутро и доцна навечер.
Есента повторно ја смирува климата и за многумина е најубавиот период. Морето останува топло, температурите се пријатни, а туристите полека исчезнуваат. Но, ова е и сезоната кога паѓа најмногу дожд. Врнежите може да бидат кратки, ама интензивни, со улици што се полнат со вода за неколку минути. Ова не се случува често, но кога ќе се случи, се памети и обично наоѓа простор на сите европски канали за вести.
Посебна приказна е ветерот. Коста дел Сол е заштитена од планини, ама има денови кога дува силно, особено во одредени делови и периоди. За некој што сака мир на тераса, тоа знае да биде многу иритирачки, додека за други е идеално за спортови на вода.
И уште една работа што ретко се споменува, а тоа е дека сонцето е силно преку цела година. Лесно е да се изгориш дури и во зима ако седиш подолго на сонце. За некого тоа е бонус, за другите постојано потсетување дека мора да внимаваш.
Климата на Коста дел Сол е стабилна, пријатна и лесна за живеење, ама не е совршена. Таа бара прилагодување, поинаков ритам на денот и разбирање дека сонцето, влагата и топлината имаат и своја цена. За некои луѓе тоа е најголемата предност, за други е моментот кога сфаќаат дека рајот изгледа различно во различни сезони.

01/22/2026

Имаше неколку реакции на вчерашната објава околу ризиците кога се купува имот во Шпанија, па денес да видиме кои се тие.
Купувањето имот во Шпанија најчесто почнува со еуфорија. Море, сонце, тераса и идеја дека си си решил еден голем дел од животот. И навистина, може да биде одлична одлука. Ама веднаш по купувањето почнува делот за кој луѓето не се информираат на време, и се соочуваат со ризиците што одат рака под рака со сопственоста.
Првиот ризик е уверувањето дека со потписот кај нотарот приказната завршува. Во реалноста, тогаш почнуваат обврските. Данок за нерезиденти се плаќа секоја година, дури и ако станот стои празен. Општинскиот IBI доаѓа редовно, а заедницата на станари има свои месечни трошоци и правила, без разлика дали сопственикот живее таму или не.
Вториот ризик е купување без темелна правна проверка. На хартија се може да изгледа чисто, а во пракса да постојат нелегални доградби, тераси што не се впишани или делови што формално се водат како заеднички простор. Кога ова не се провери навреме, проблемот останува на новиот сопственик, не на продавачот. Тука адвокатот треба да си ја заврши својата работа.
Третиот ризик е потценување на трошоците после купувањето. Клима уреди, влага, фасади, лифтови, базени и кровови се дел од реалноста, особено во постари згради. Заедницата на станари може одеднаш да изгласа скап зафат, а сопственикот нема простор за изговор дека не живее во Шпанија и не го користи имотот.
Четвртиот ризик е издавањето. Многумина купуваат со план дека кога не се таму, имотот ќе се издава. Во пракса, туристичките лиценци се ограничени, правилата се менуваат, а некои заедници целосно забрануваат краткорочно издавање. Купен имот без соодветна дозвола може да значи имот што стои празен, а сепак создава трошоци. Истиот имот може да се издава на долгорочен закуп, така да овој ризик и не е така страшен,
Петтиот ризик, за кој најмногу се зборува, се ocupas. Темата е реална, ама често претерана. Во Шпанија постојат случаи на нелегално вселување, но тие најчесто се случуваат во имоти што со месеци стојат празни и без надзор. Ако сопственикот реагира веднаш, во првите 24 до 48 часа, полицијата може директно да интервенира. Проблемите се појавуваат кога никој не го следи имотот и диво вселените успеваат да се задржат подолго време.
Во станови во активни згради, затворени комплекси или места со редовна контрола, ризикот е значително помал, скоро минимален. Најранливи се куќи надвор од урбани зони и станови што долго време се целосно празни. Во пракса, најголемиот проблем не е законот, туку отсуството на сопственикот или локален контакт.
Шестиот ризик е дистанцата. Кога живееш во Македонија, а имаш имот во Шпанија, секоја ситница може да стане комплицирана ситуација. Писмо од општина, дефект, проблем со сосед, сето тоа бара човек на лице место. Без управител или доверливо лице, работите се решаваат споро и со нерви. Доколку се купи имот, препорачливо е да се ангажира агенција која редовно ќе го одржува имотот.
Постои и еден скриен ризик за кој ретко се зборува. Купувањето е направено со емоција, а користењето е помало од очекуваното. Летото поминува брзо, обврските се повеќе, а празниот имот продолжува да чини пари и внимание.
Сето ова не значи дека купувањето имот во Шпанија е грешка. Значи само дека не е доволно да се гледа цената и погледот од тераса. Разликата меѓу паметна одлука и главоболка најчесто не е во квадратите, туку во тоа колку реално си бил подготвен за животот после купувањето.

01/21/2026

Дали Македонци можат да купуваат недвижности во Шпанија?

Да. Можат. Без жителство, без посебни дозволи и без никакви забрани.
Само треба да се знае како оди процесот и кои се реалните трошоци, затоа што тука најчесто се прават грешките.
Еве кратко објаснување:

Што ти треба за да купиш
NIE број, тоа е идентификациски број за странци
Банкарска сметка во Шпанија
Адвокат, не е задолжително, ама е паметно
Пари за капар и даноци

Како оди купувањето
Прво избираш имот
Се плаќа резервација, неколку илјади евра
Потоа се потпишува arras договор и се плаќа околу 10 проценти капар
На крај потпис кај нотар, нотарот го спроведува тоа во катастар и имотот е твој
Ако ти се откажеш, капарот го губиш
Ако продавачот се откаже, ти враќа двојно

Реални трошоци во Андалузија
Ова е делот што најчесто не го кажува никој:
За стар имот
ITP данок 7 проценти
Нотар и катастар околу 1.500 евра
Адвокат околу 1 процент од цената
Сметај вкупно 9 до 11 проценти над цената

За нов имот
ДДВ 10 проценти
AJD околу 1.5 проценти
Вкупно околу 12 до 13 проценти
Пример
Стан од 200.000 евра
Дополнителни трошоци отприлика 20.000 до 25.000 евра

Годишни трошоци
Општински IBI данок, неколку стотини евра годишно
Заедница и комуналии, зависи од зградата
Данок за нерезиденти, дури и ако не го издаваш станот

Да, Македонци можат легално и без проблем да купуваат недвижности во Шпанија.
Процесот е јасен и безбеден, ама мора однапред да се знаат бројките.
Ако одиш спремен, купувањето во Шпанија е многу поедноставно отколку што изгледа.

01/19/2026

Исхраната на Коста дел Сол е типична медитеранска, со јасни правила што се повторуваат секој ден. Основата се свежи локални производи, едноставно спремање и редовен ритам на оброци.
Маслиновото масло е нешто без кое не се може и се користи во речиси сите јадења. Путерот и тешките сосови се реткост во секојдневната кујна. Зеленчукот е сезонски и главно локално произведен, што влијае и на цената и на квалитетот.
Рибата и морските плодови се редовен дел од исхраната, особено во крајбрежните делови. Најчесто се консумираат сардини, сардели, туна, ослич и школки. Подготовката е едноставна, печење, скара или лесно пржење, без сложени маринади.
Месото се јаде почесто отколку што странците очекуваат, но во помали количини. Пилешко и свинско доминираат, додека црвеното месо е поретко. Преработените месни производи постојат, но не се основа на секој оброк.
Појадокот е краток и лесен. Кафе со млеко, тост со домат и маслиново масло, понекогаш со сирење или познатата „хамон“. Обемен доручек со јајца, месо и слатки се повеќе туристичка пракса.
Ручекот е главниот оброк во денот и обично се јаде помеѓу 14 и 16 часот. Во работните денови, многу луѓе јадат menu del dia во ресторани, што вклучува два јадења и десерт по фиксна цена.
Вечерата е полесна и се јаде доцна, најчесто после 20 часот. Често се состои од тапаси, салати, омлети или мали порции риба.
Овошјето се јаде секојдневно, најчесто како десерт, а не како ужинка. Колачите не се централен дел од исхраната, освен за викенд или празници.
Купувањето храна најчесто се прави неколку пати неделно. Локалните пазари, пекари и месарници сè уште имаат важна улога, и покрај присуството на големи супермаркети.
За странците, исхраната на Коста дел Сол е предвидлива, поевтина и поедноставна. Не се базира на трендови, туку на навика и континуитет.

01/17/2026

Марбеља е многу тешко да се објасни, треба да се види. И уште поважно, да се почувствува.
Ова е град што одамна ја надмина улогата на летна дестинација и стана симбол на еден цел начин на живот. Кога се зборува за Коста дел Сол, Марбеља секогаш се споменува последна, не затоа што е најдалеку, туку затоа што остава најсилен впечаток.
Сместена меѓу морето и планините на Сиера Бланка, Марбеља има природна рамка што ретко кој град може да ја посака. Планината ја штити од ладни ветрови, морето го отвора хоризонтот, а сонцето како никогаш да не сака да зајде. Климата овозможува живот на отворено преку целата година, што се чувствува секојдневно, од утринските прошетки до долгите вечери на терасите.
Стариот град е срцето што сѐ уште чука во свој ритам. Улици од калдрма, бели фасади, скриени плоштади и мали цркви создаваат атмосфера што не се труди да биде атракција, туку едноставно постои и дише. Тука времето не застанало, но научило да не брза никаде. Кафичите и рестораните се полни, разговорите траат, а секој агол изгледа како сцена од шпански филм.
На неколку минути од стариот град, Марбеља покажува сосема друго лице. Брегот е долг, уреден и постојано жив. Плажите се разновидни, од урбани и динамични, до помирни делови со природен амбиент. Рестораните и клубовите на плажа не се само туристичка понуда, туку дел од секојдневната култура на градот.
Пуерто Банус е најгламурозниот дел од оваа приказна. Марина каде луксузот е видлив, а самодовербата е дел од атмосферата. Јахти, бутици, ресторани и ноќен живот се спојуваат во еден континуиран театар на движење. Но и покрај сета ексклузивност, ова место останува отворено, достапно и живо, повеќе како градска сцена отколку затворен свет.
Марбеља одамна е повеќе од туристичка дестинација. Градот има силна меѓународна заедница, модерна инфраструктура, врвни здравствени услуги и образовни институции. Голф терените, спортските комплекси и природните патеки околу градот создаваат рамнотежа помеѓу активен и опуштен живот.
Она што ја прави Марбеља посебна не е само луксузот, туку способноста да ги спои различните светови во една целина. Традиција и модерен пристап, тишина и динамика, локален живот и глобален дух. Сѐ постои паралелно, без судир, без наметнување.
Како круна на Коста дел Сол, Марбеља не стои над другите градови, туку ги заокружува. Таа е завршниот акорд на еден регион што нуди многу лица, но токму тука сите тие се спојуваат во јасна, препознатлива слика. Град што не ветува ништо, а дава многу повеќе отколку што се очекува.

01/16/2026

Денес на ред е Естепона. Според мене еден од поубавите градови каде што сум бил.
Естепона се наоѓа на западниот дел од Коста дел Сол, помеѓу Марбеља и Гибралтар, и во последните години се разви во еден од најуредените и најорганизирани градови во регионот. Градот задржа силен локален карактер, но истовремено вложи сериозни напори во модернизација, јавни простори и квалитет на живот, со што се издвојува од останатите крајбрежни центри.
Стариот дел на Естепона е целосно пешачки и препознатлив по белите куќи, тесните улици и фасади со цвеќиња. Овој дел од градот не е сценографија за туристи, туку жив простор со продавници, кафичи и локален живот кој трае преку целата година. Урбаната политика на градот е јасно насочена кон ред, чистота и функционалност.
Естепона располага со повеќе од дваесет километри крајбрежје и долга уредена патека која ги поврзува плажите и населбите. Плажите се разновидни, од градски до диви плажи, и се познати по чистото море и добрата организација. Крајбрежната линија е една од најпријатните за пешачење или возење на точак на цел Коста дел Сол.
Градот има значајни културни и јавни објекти, меѓу кои се издвојува Орхидариумот, еден од најголемите во Европа. Покрај него, низ градот се поставени бројни уметнички мурали и скулптури кои му даваат современ и препознатлив изглед. Овие проекти се дел од долгорочна стратегија за визуелен и културен идентитет.
Естепона е добро инфраструктурно поврзана со остатокот од регионот преку автопатот АП 7 и крајбрежниот пат, што овозможува брз пристап до Марбеља, Малага и меѓународниот аеродром. Градот располага со стабилни јавни услуги, здравствени центри и образовни институции, што го прави погоден и за подолг престој, не само за туризам.
Во поново време, еден од симболите на модерна Естепона е Cielo Skybar, сместен скоро во центарот на градот. Од ова место се отвора целосен поглед кон заливот, пристаништето и отвореното море. Навечер, светлата на крајбрежјето се редат како линија што го следи хоризонтот, а чувството е дека целиот град лежи под тебе. Тоа е место каде луѓето доаѓаат не само за пијачка, туку за момент на пауза, поглед што смирува и атмосфера што го заокружува впечатокот за Естепона како град што знае да ги спои практичноста и уживањето. Кога е добро времето, може да се видат светлата од крајбрежните градови на Африка.

01/15/2026

Одиме понатаму. На ред е Ронда, град со голема историја и традиција.
Ронда се наоѓа во внатрешноста на Андалузија, на околу сто километри од Малага, и е еден од најпознатите историски градови во јужна Шпанија. Градот е изграден на карпеста платформа на надморска височина од околу седумстотини метри, што му дава пониски температури и поинаква клима во споредба со крајбрежјето на Коста дел Сол. Токму таа позиција ја прави Ронда природна точка за одбрана уште од античко време.
Најпрепознатливиот симбол на градот е клисурата Ел Тахо, длабока повеќе од сто метри, која го дели градот на стар и нов дел. Над клисурата се издига Пуенте Нуево, камен мост завршен во осумнаесеттиот век, кој денес претставува една од најфотографираните локации во цела Андалузија. Мостот не е само архитектонско чудо, туку и клучна врска меѓу двата дела на градот.
Ронда има богата историја која вклучува римско, маварско и христијанско наследство. Во стариот дел се наоѓаат остатоци од арапските ѕидини, традиционални андалузиски куќи и тесни улици.
Ронда е светски позната како родно место на борбата со бикови. Тука се наоѓа Плаза де Торос де Ронда, една од најстарите и највлијателни арени во Шпанија, изградена во осумнаесеттиот век. Арената денес функционира и како музеј, каде се објаснува историјата и културното значење на оваа традиција.
Како дел од поширокиот регион на Коста дел Сол, Ронда нуди контраст на крајбрежниот живот. Таа претставува планинска, историска и културна димензија на јужна Шпанија и покажува дека овој дел од земјата не се сведува само на плажи и море, туку и на длабока историја, силен идентитет и разновиден пејзаж.

Kiril Kolemishevski

01/28/2026

01/27/2026

01/26/2026

01/25/2026

01/23/2026

01/22/2026

01/21/2026

01/19/2026

01/17/2026

01/16/2026

01/15/2026

Address

Telephone

Website

Alerts

Contact The Business

Shortcuts

Featured

Share

Category