Anwarco

18/04/2022

لو لسة مبتدأ في مجال التكييفات يبقي الفيديو دا ليك 👇🏽

افضل معدات APT لتركيب مبرد هواء مركزىVRV كيفيه استخدام معدات تركيب تكييف دايكن شرح استخدامات المعدات فى تركيب مبرد الهواء المركزى شرح استخدام طقم فلير سكينه ...

11/02/2021

7️⃣ نصائح لتحصل على إكتئاب منقطع النظير بواسطة الإضاءة

☑️ أي وحدة إضاءة تعجبك اشتريها وحطها في أي مكان بدون مراعاة لا شدة ولا تناسق ولا لون.

☑️ خلي كل الوحدات على مفتاح واحد إياك تقسم كل مصدر بمفتاح.

☑️ هات مقاسات كبيرة وصغيرة ومختلفة عن بعض في حيز واحد.

☑️ شوف الأثاث فين وحط الاسبوتات بتاعتك في ضهره جمبه المهم ميظهرش تأثيره.

☑️ هات اسبوتات كتير وحط في اي حتة تقابلك عشوائي كده عشان تقدر تحصل على زغللة عين متميزة وعدم تركيز ممتاز.

☑️ الداكن بيمتص الإضاءة والزاهي بيزودها ويعكسها متاخدش بالك من الموضوع ده وتأثيره على شدة الضوء فيما بعد.

☑️ شدة الضوء والدهانات الفاتحة بتوسع المساحة فلو مكانك ضيق ضيقه أكتر بدهانات داكنة وضوء خافت.

☑️ بالمناسبة كل ما كان المكان ضيق كل ما استخدمت في أكتر من استخدام فإياك توفر فيه variaty (تنوع) يساعدك في الاستخدامات المختلفة.

☑️ في تلت مستويات من الإضاءة
↩️ اساسية ودي بتبقى مباشرة لون ابيض وقوية تلت مراحل مثلا اول مرحلة تلت لمبات تاني مرحلة بتنور ستة وهكذا.
↩️ متوسطة (مود الهدوء والإسترخاء) بتبقى اسبوتات جانبية على جوانب الحيطة في منها أصفر وأبيض تلجي والميكس بتاعهم ال (warm) وده أقرب للون الشمس الطبيعي مريح جدا للأعصاب.
↩️ إضاءة مخفية خفيفة خالص داخل الجيبسيوم بورد بتنور على السقف ألونها أزرق وأبيض والورم أو الميكس بتاعهم.

⬅️ كل مكان بيبقى ليه موده, في مكان بتحتاج فيه تركيز ومكان بتحتاج فيه هدوء ومممكن التلاتة حاول تعمل ألوان تعصبك زي الأحمر في المخفية
وزي إنك متستخدمش الwarm في المتوسطة.
وبــكــده 👆
هنيئا لك بمرحلة لا بأس بها من الإكتئاب ☑️☑️

✅ أخر نصيحة إياك ثم إياك تتابع الهشتاج ده ولا تتابع اي كلام مفيد بينزل هنا ولا حتى شير ولا لايك ولا see First 😁
ضوء شبابي مبتكر لجميع أنواع المقاولات والخدمات العقارية. 👌
تواصل معنا علي الارقام التالية:

01001273456
01129961326

29/01/2021

المساحات الصغيرة دائما فرصة رائعة للإبداع. 👌

27/01/2021

لما حد يقولك الحق عرض المتر الجبسيوم بورد بـ 99 ج فقط...
يا ترى تلحق العرض ولا لا؟ ⁉️

مقدمة سريعة. 👇

◀️ أهلا بيكم في بند اللمسة الجمالية والفنية ... بند الجيبس بورد
استخدام الجبس بورد واسع جدا, ولكن أهم استخداماته
ديكور, وإخفاء عيوب.

↩️ في منه العادي في الأماكن الداخلية, والأخضر واللي مقاوم للرطوبة, والأحمر واللي بيتحط في الأماكن المعرضة للحريق.

♻️ يا ترى تلحق ولا متلحقش قرر بعد الكام tips دي ⬇️

◀️ التثبيت اللي ميريحش فيما بعد غالي, السعر الرخيص بيوفر في خامات هتخلي سقفك يريح بعد كده.

◀️ تحت شعار المتر ب99 جنيه ولكن القياس بيبقى غير شرعي وقانوني وغير عادل بالمرة
المتر المربع (اي سطح عرضه اكبر من 1م) والمتر الطولي(اي سطح عرضه أقل من 1م) هتلاقيه مدخل ده في ده وبعيد أمتار للأسف وهمية.

↩️ عشان كده الأفضل متلحقش العرض ده وتستلم البند ده وتتأكد لما تتعاقد أو تتعامل فيه من
☑️ صنايعية أيدها كويسة ومتدربة على إنها تقرأ الرسومات.
☑️ غرامة أو ما شابه لما الموضوع يأخر زيادة عن اللازم.
☑️ معاينة وتسعير كامل قبل التنفيذ + مدة زمنية.
☑️ نضافة الموقع.
☑️ وبعد التسليم ميكنش في فرق في اللحامات, والواقع مطابق للتصميم , والمستقيم مستقيم والدوارن متأكد منه.
☑️ الليزر مفضل ولكن الميزان الأفقي والرأسي شغال عشان تتأكد إني شغلك بدون ميول بعد التسليم.
👈 تقدر توكل الموضوع كله توريد وتركيب للصنايعي –في حالة تعاملك المباشر- عشان ميجبش خامات زائدة عن الحد.
👈 تقدر كمان تسلم دفعات حسب الإنتاجية بشرط ميقلش عن 25 % عند التسليم يعني 40% عند التوريد مثلا و15% عند بداية التركيب وهكذا.

✅ إتأكد إنك متابع جيد لصفحتنا ولهشتاج لو قدرنا نوصل ليك معلومة مفيدة.

ضوء شبابي مبتكر لجميع أنواع المقاولات والخدمات العقارية. 👌

26/01/2021

14 نصيحة لسيراميك وبلاط وبورسلين ينال رضاك 😍

عشان الطبخة ملحها ميزدش بعد رحلة عناء ركز معايا في الآتي:

1️⃣ الخطوة اللي اغلب الناس بتتنساها بفكرك بيها
قبل ما تبتدي مرحلة السيراميك والبورسلين والبلاط إتأكد إنك منضف كل حاجة كويس هتلاحظ الفرق في الجودة فيما بعد.

2️⃣ حافظ على الفواصل بإنها تكون ماشية مع بعض

3️⃣ اعمل حساب الوزر وانت بتشتري السيراميك عشان ممكن تقف عليه.

4️⃣ عشان متلاقيش بلاطة مايلة وطالع ونازل خلي الصنايعي يمشي بالميزان

5️⃣ ادهن ضهر البورسلين بمادة لزق سيراميك نفس لون البورسلين ومتخافش من مشاكله بعد كده زي الطقطقة وخلافه.

6️⃣ ساعات السيراميك او البورسلين مبيبقاش مظبوط حطه زي ما قولنا يأما في الوزر أو في الأماكن اللي مش باينة ومش فارقة معاك.

7️⃣ مش لطيف اني الحوائط يكون فيها ميل وتعمل الأرضية بتاعتها عدلة... اعمل ارضياتها بزاوية 45 هتداري العيب، وهتطلعها بشكل ألطف.

8️⃣ خاف ع الأرضية بتاعتك عشان محدش هيخاف عليها سواء
تفرشها مشمع تحط جرايد كتير وعليها جبس عليها... المهم تتصرف ومتفكرش إن النقاش هيحافظلك عليها.

9️⃣ بلاش لما تقرر تعمل رخام تجيب حاجة رخيصة... هات حاجة نضيفة عشان الشروخ اللي بتظهر بعدين شكلها مش لطيفة
لو مش هتقدر السيراميك او البورسلين خيار جيد ليك.

0️⃣1️⃣ لو احتجت أي سيراميك في المستقبل الفاتورة اللي انت محتفظ بيها هتنفعك,والأفضل تحتفظ بكارتونة ع جمب للمستقبل.

1️⃣1️⃣ عشان متجبرش على قبول حاجة مش حاببها أو تكسر في البلاط اقف مع الصنايعي في
وزنة البلاط عشان متعلاش ولا توطى بدون داعي
اول بلاطة بتتحط عشان هيكمل عليها
لو في رسمة معينة انت راسمها

2️⃣1️⃣ لو هتعمل جبسيوم بورد في السقف اعمل جبس مقاوم للرطوبة عشان الحمام والمطبخ وممكن في المطبخ جبس مقاوم للحريق.

3️⃣1️⃣ سيراميك السقف سهل التنضيف ومقاوم للرطوبة بس لو متعملش بضمير او حصل تسريب فوقك هتتبهدل-افتكر إني قولتلك بلاش.

4️⃣1️⃣ عموما أمن ع جارك اللي فوقك في نقطة العزل والتسريب دي عشان مشاكلها متعبة ومكلفة سواء هتعمل سيراميك أو لا.

✅ تابع وادعمنا بلايك وشير عشان نقدر نبهركم في الفترة الجاية.

ضوء شبابي مبتكر لجميع أنواع المقاولات والخدمات العقارية.

25/01/2021

العصارة في معايير الإستلام المظبوط في بند المحارة 🤚©️

أكتر مرحلة خطرة وحرجة ومهمة في بند التشطيبات ...
⬅️ بند المحـــــارة

مبدأيا ابو 10 جنيه وابو 35 جنيه مش زي بعض في التسليم...
وحد الشروط اللي هتستلم عليها هتلاقي السعر بقى قريب.

شيء منطقي اني كل نوع ليه سعر وكل جودة مقابل.
👈 خلي تركيزك الأهم في هتستلم إيه بدلا من بكام.

♻️ طب هتستلم إيه وازاي ده اللي جاي 👁️‍🗨️🕐

بداية في طبقة أملاح وتراب بتعمل فاصل بين الطرطشة والطوب رش ماية على الحيطان عشان تتخلص من الموضوع ده ⬇️

◀️ الطرطشــــة ثم الطرطشة بالمسطرين مش بالكوز ياريت يعني.

◀️ أي فاصل خراطيم عمود وحيطة وهكذا بيحصل شرخ كبير لو محطتش حاجة اسمها سلك شبكي.

◀️البؤج (كتلة اسمنتية بسمك 2.5 تقريبا) نبه وتابع على الصنايعي يخليها زيرو جبس, تاني مينفعش جبس خالص.

البؤجة اتظبطت كما يجب... اللي جاي هيكون أسهل. 🤙
↩️ استلم صح عشان وارد النقاش يقول ليك ده مش عيبي فتقوم تقوله لا ده عيبك وانت متيقن لانك مستلم بالمسطرة والميزان من صنايعي المحارة.

◀️ التأكيس والتربيع مهم جدا بيضمن ليك بعد كده سيراميك تمام وفرش فيما بعد مريح.

◀️ زوايا (فريسبيكو) بتدي متانة للزاوية وبتختفي بعد النقاشة تماما وممكن متحتاجش زوايا خشبية بعد كده بعد التشطيب.

◀️الملو (بحط مونة على نفس مستوى البؤج)... قانون أنواركو كل ما السطح كان معاك ناعم كل ما فلوسك اتوفرت في المعجون وخامات التشطيب اللي بعد كده.

♻️ المرحلة دي خطورتها في إنها link بين المباني والنقاشة حلقة الوصل اللي هيقع عليها اللوم لو في اي مشاكل بعد كده.. إعملها صح ترتاح.

✅ فتجنبا شير للبوست ده واحفظه عندك. وتابعنا على هشتاج عشان متقعش بعد كده ولا قبل كده. 😍

ضوء شبابي مبتكر لجميع أنواع المقاولات والخدمات العقارية. 👌

24/01/2021

ازاي تخسر فلوسك في الألومينتال؟

بداية اسمه ألوميتال مش ألومينتال. 🤙

وتقريبا الميزانية اللي انت حاططها على وشك النفاذ 😁
, ومش أكيد ولا منطقيا انك بتدور على بند تخسر فيه ال budgetاللي باقي معاك.

والأكيد اننا مش هنسمح بده وده لانك هتحاول تعمل اللي بنقول عليه... اخر نصيحة أهم نصيحة خلي بالك منها.

✅ وظيفة الألومنتال انه يقلل او يمنع صوت وتراب وهوا + كونه قطعة ديكور... كل ما قدرت تحقق المعادلة دي كل ما تعرف إنك ماشي صح.

✅ في جلد بيتركب في الشبابيك هاته مستورد أفضل من المصري بكتير.

✅الاكسسوارات خلي واحد منول والتاني اوتوماتيك؛ عشان لو الأوتوماتيك علق.

✅لو شباكك بيطل على دوشة كبيرة استخدم زجاج ثنائي ( قطاع اغلى من الألوميتال بس هيفي بالمطلوب).
✅ السلك اللي بيتركب في الشبابيك الأمريكي أفضلهم.
لو في منطقة زي اسكندرية الغردقة الفايبر مناسب جدا.

⬅️ نيجي للمهم وجدا
أفضل وقت تركيب هو ما بعد المحارة والسيراميك وما قبل الوش الأخير في التشطيب( عشان تقدر تعالج اي مشكلة ممكن تظهر قبل الوش الأخير وبعد التركيب).
هتفقد وقت وفلوس وجودة لو طلعت بره الميعاد ده لتركيب الألوميتال وال upvc. 👌

أخيرا ✅ تابع وادعمنا بلايك وشير عشان نقدر نبهركم في الفترة الجاية.

ضوء شبابي مبتكر لجميع أنواع المقاولات والخدمات العقارية.

22/01/2021

باقة من ال Side tables(الطاولات الجانبية) البسيطة... عينك لما تشوف مناظر جميلة هتبدع أفكار أجمل. 👌

21/01/2021

فن إدارة مرحلة النجارة في التشطيبات (أسئلة وأجوبة) 🪚🪛🪜

اسبق بخطوة ويلا أصدمك شوية

◀️ بعض شركات المقاولات هتسلمك بند النجارة خشب رديء ومش متثبت كما يجب وبناء عليه
↩️ يستحسن تجيب غيره راحة ليك قدام, وشكل أفضل تمام... وأهم حاجة نجار يكون مضمون اللي يكون قائم على التنفيذ.
⬅️ المنظر العام للأبواب اللي عندك مهم يعني مثلا
☑️ لو انت شقتك مودرن متعملش أبواب كلاسيك والعكس صحيح.
☑️ الأبواب اللي في وش بعض مينفعش يكونوا ملهمش علاقة ببعض, يا تخليهم شبه بعض يا تخليهم مكملين لبعض.
☑️ عايز تنوع نوع في الأبواب البعيدة عن بعضها.
☑️ تقدر ترسم شكل بابك أو تخلي المهندس بتاعك يرسمه ليك.

امتى أركب باب مصفح؟

⬅️ الأبواب المصفحة في منها كتير مغشوش خلي بالك, وملهاش لازمة لو انت في مكان عنصر الأمان فيه متوفر وبابك كويس.
↩️ تقدر تعمل ابواب كريتال لو الخشب كويس ومفيش أمان, وهات متصفح لو الباب هتغيره وعنر الأمان أقل.

ايه هي الخيارات المتاحة -عيوبها ومميزاتها- لما اجي اشتري الباب بتاعي؟
⬅️ عندك أكتر من إختيار لما تيجي تشتري باب
☑️ التركي والماليزي خامتهم ضعيفة شوية, بلاش تستخدمها في أماكن معرضة للماية كتير.
☑️ مصانع متخصصة في تصنيع الأبواب: سعره أرخص من العمولة عشان بتعمل عدد كبير وتقدر تاخد معاك نجار أمين عشان متجبش حاجة مش كويسة
وتقدر تعدل مقاس الفاتحة اللي عندك لو ملقتش نفس المقاس في المصنع.
☑️ تقدر تعمل الباب بتاعك عمولة من الصفر... هي أغلى اها بس كل تفصيلة فيها بمزاجك ومن غير غش.
☑️ الأوكر مفيش مجال إنك متجبش غير أفضل حاجة عشان مش كل شهر تغير في أوكرة.
✅ تتواصل معانا لو في أي استفسار وتتابع عشان بنقدم محتوى هيهمك الفترة الجاية.

ضوء شبابي مبتكر لجميع أنواع المقاولات والخدمات العقارية.