20/07/2026
-عملت "رشة جريئة" كان فيلم حلو اوي لكن الحمدلله يعني محققش نجاح في السينما
=قلة حظ ولا نحس؟
-ولا ده ولا ده، حظي في حاجات تانية، يعني ربنا مدانيش هنا بس اداني هنا وهنا، مبقاش شايف دول وشايف بس بتاعة السينما؟! هي بنت خالتي؟! مش عايزها
=يعني مش بتبص غير في نص الكوباية المليان؟
-لو مشفتوش ابقى جاحد، بصي لما جينا عملنا مسرحية "لما بابا ينام" وكان معانا علاء ولي الدين الله يرحمه، انا على المسرح كنت شايل المسرحية لكن علاء كان نجح له فيلمين فجالي المنتج عصام امام وقالي "علاء هيحيي اخر واحد" قلتله تمام، علاء كان بيطلع يحيي كلنا كنا لابسين بدل سموكين وشياكة جدا، هو كان لابس البدلة على شبشب لانه مش قادر يلبس جزمة، كان عنده مشاكل في الشرايين عملت تضخم في رجله، فده اللي انا بتكلم عليه، انا ربنا مديني ايه ومديله ايه .. مش مسألة انا لازم ابقى زي ده، هبقى زي ده وعنده امراض ومشاكل صحية؟! ما انا الحمدلله ربنا مديني صحة كويسة ومديني بيت ومديني اسرة وده كان هو بيفتقده، فأنا هبقى شايف فقط هو بياخد كام؟! او شايف فقط ان هو بيحيي اخر واحد كبطل للمسرحية؟! يبقى انا ساعتها مش شايف صح
=النجومية ميزانها مش عادل؟
-مفيش حاجة ميزانها مش عادل لا نجومية ولا غيرها، الميزان ده جاي من عند ربنا، الميزان عادل، انا باخد حقي 200 %، هاخد شوية نجومية على شوية صحة على شوية راحة بال، انا اعرف نجم مش بينام، الحمدلله انا بنام، ال24 قيراط هاخدهم هاخدهم ولا حد يقدر يمنعهم عني
"اشرف عبدالباقي" من برنامج "السيرة"
