14/09/2026
🔴 هو الشبشب أهم من نفسية طالب؟!
اللي قدامكم طالب اتمنع من دخول مدرسة السعيدية بالجيزة في أول يوم دراسة، بسبب إنه جاي بالشبشب.
أنا مع الالتزام بالزي والمظهر والقوانين، ومش بقول إن المخالفة تتساب.. لكن هل العقاب لازم يكون بالطريقة دي؟
بصوا على وقفته قدام السور، وهو بيبص على زمايله ورايح جاي لمدة نص ساعة، كأنه مستني حد ينادي عليه ويقوله: «خلاص يا ابني ادخل».
ده شكل طالب مستهتر ومش فارق معاه المدرسة؟ ولا شكل طالب كان نفسه يدخل ويحضر زي باقي زمايله؟
كان ممكن يدخل، وبعد اليوم الدراسي يتم استدعاؤه عند الأخصائي الاجتماعي أو مدير المدرسة، ويتعرفوا على السبب الأول.
يمكن أسرته ظروفها صعبة، يمكن الجزمة ضاعت أو اتقطعت، يمكن عنده ظرف إحنا ما نعرفوش.
ولو ثبت إنه استهتار فعلًا، فيه لائحة وإجراءات وولي أمر يتنبه ويتحاسب بالطريقة المناسبة.
لكن إننا نكسر طالب ونحرجه قدام زمايله عشان شبشب.. دي مش تربية.
التربية مش عقاب وبس..
التربية احتواء، وفهم، وتقويم.
إحنا عايزين الطالب يخرج من المدرسة متعلم ومتربي، مش مكسور ومقهور.
ارحموا من في الأرض يرحمكم من في السماء. ❤️
