26/05/2023
١- صاحب الكل وحيد.
٢- اللى فاهم الحب بكل تفاصيله، مش مرتبط!
٣- كلام الناس كله غلط، أياً كان صح أو غلط.
٤- أنجح العلاقات أخفاها.
٥- كليتك العالية مش دليل إنك عبقري، ولا كليتك العادية دليل إنك تافه!
٦- التعليم المصري عامل زي ''النيش'' ، ملوش أي ستين لزمة بس لازم يبقي موجود.
٧- إذا معرفتش تكون ''بنادول''، حاول متبقاش صداع.
٨- أنت مش محور الكون مهماً كنت مشهور.
٩- مش كل اللي بيضحك ف وشك بيحبك، ولا كل اللي بيعدي من جنبك من غير ما يسلم عليك بيكرهك!
١٠- مش شرط الناس تصقفلك عشان تكمل الحاجة اللى بتعملها .. لو بتحبها كمل فيها حتي لو محدش إدالك إهتمام أصلاً.
١١- عيش حياتك أنت، متحاولش تقلد أي حد مهماً كانت درجة نجاحه.
١٢- متحاولش تعيش زي بطل فيلم، عشان هو قصة مكتوبة مصممة إنها تعجب كل الناس!
١٣- أول ما تبدأ ف المشي، الطريق هيبان، المهم تبدأ.
١٤- علي قدر العشم يأتي الخـ ـازوق.
١٥- متمشيش تدلدق ف روحك ورا حد، أياً كان مين.
١٦- كل حاجة بتعدي، بس و هي بتعدي بتسيب شوية حاجات مبيعدوش.
١٧- حاول تحافظ علي حلاوة البدايات أطول فترة ممكنة.
١٨- You are what you believe.
١٩- فكر و متمشيش ورا القطيع، الكثرة مش دليل علي صحة المنهج.
٢٠- السمك الميت بيعوم مع التيار، و السمك الصاحي بس هو اللي بيختار طريقه.
٢١- متسحبش حد من دنيته لو مش هتعرف تزود علي حياته 100 حياة.
٢٢- لو مش هتعشق، متحبش و النبي متحب.
٢٣- ملخص علاقات الحب إنك مبتحبش لما تختار، و مش بتختار لما تحب!
٢٤- كل واحد فينا جواه قصة غيرته و من ساعتها و هو مش عارف يرجع طبيعي زي الأول!
٢٥- Everything comes with a price.
، عشان كدة لازم تكون عارف أنت بتستغني عن أيه ف سبيل أيه، عشان متندمش.
٢٦- لو ف يوم أتعلمت الإنسحاب، هتبقي عادة.
٢٧- السنَّة لما عصبها بيموت إستحالة ترجع تلمع تاني زي الأول .. عامل الناس كلها بالأسلوب ده.
٢٨- مفيش حاجة أسمها Forever ، كلنا فترات ف حياة بعض غير كده محن.
٢٩- كل مشكلة و ليها أكل.
٣٠- مشاكلك لو خرجت برا قلبك و حكيتها، يبقى بتزود عليهم واحدة كمان .
٣١- حاول تفرق و النبي بين "الچنتلة" و "النحنحة" عشان الأولانية بتخليك مميز و التانية بتخليك ملزق!
٣٢- رتب دولاب حياتك كل فترة، و أتبرع بالناس اللى صغرت عليك لناس تانية تلبسهم.
٣٣- شوية الشوية اللي فاضلين عندك، فاضل شوية
و هيروحوا.
٣٤- سنك ف البطاقة غير سنك ف المرايا غير سنك مع حد بتحبه غير سنك و أنت فرحان غير سنك و أنت زعلان، جوا عمرك عمر تاني..
٣٥- الموت (منبة) ، مظبوط علي عمر اللى جنبك، عشان يصحيك أنت!
٣٦- الحرام قبل العيب، و ربك قبل الناس.
