04/07/2026
التجمع الخامس… من مدينة الأشباح إلى أغلى عنوان سكني في مصر
لو رجعنا بالزمن 25 سنة لورا وسألت أي حد عن التجمع الخامس، غالبًا كنت هتسمع جملة واحدة:مين المجنون اللي هيسكن في الصحراء؟
وقتها مكنش فيه شارع تسعين بالشكل اللي نعرفه، ولا مولات، ولا جامعات، ولا كمبوندات ، ولا كان فيه أي سبب يخلي حد يسيب مصر الجديدة أو مدينة نصر ويروح يعيش هناك.
التجمع الخامس كان مجرد جزء من مشروع أكبر اسمه القاهرة الجديدة، واللي صدر قرار إنشائه سنة 2000 بهدف إنشاء مدينة جديدة تستوعب ملايين السكان وتخفف الضغط عن القاهرة.
والأهم من كده…إن المدينة كان مخطط لها تستوعب حوالي 4 مليون نسمة، بينما عدد السكان الحالي يقترب من 1.5 مليون نسمة.لكن وقتها…الناس كانت شايفة الصحراء فقط.
في بداية الألفينات كانت أراضي كتير في القاهرة الجديدة بتتباع بمئات الجنيهات للمتر، وفي مناطق وصل سعر المتر فيها لأقل من ألف جنيه.
وكان فيه ناس شايفة إن الأسعار دي غالية أصلًا على منطقة بعيدة ومفيهاش حياه
النهارده…
متوسط سعر الشقق في القاهرة الجديدة تجاوز 80 ألف جنيه للمتر، وفي مناطق كتير داخل التجمع الخامس المتر عدى 100 ألف جنيه، وبعض المشروعات الجديدة وصلت لأرقام أعلى من كده بكتير.
يعني إحنا بنتكلم عن منطقة انتقلت من متر بيتباع بمئات الجنيهات…إلى عشرات الآلاف للمتر.
لكن الأسعار لوحدها مش هي القصة.
القصة الحقيقية هي تغير نظرة الناس.
في البداية كانت مرحلة الرفض.
بعيدة.مفيهاش خدمات.مفيهاش ناس.
بعدها بدأت مرحلة الترقب.
ظهرت الجامعات.
ظهرت المدارس الدولية.
اتعملت الطرق والمحاور.
بدأت أول موجة من الكمبوندات المحترمه .
هنا الناس بدأت تقتنع إن المكان ده مش مشروع مؤقت…دي مدينة كاملة بتتولد.
بعد كده دخلنا مرحلة مختلفة تمامًا.
مرحلة شارع التسعين.
مرحلة الشركات العالمية.
مرحلة البنوك.
مرحلة المولات.
مرحلة إنك تقدر تشتغل وتسكن وتتعلم وتقضي يومك بالكامل داخل القاهرة الجديدة.
وبعدين جه عامل جديد…
العاصمة الإدارية.
ناس كتير وقتها قالت إن التجمع الخامس هيفقد أهميته.
لكن اللي حصل كان العكس.
التجمع بقى البوابة الرئيسية للعاصمة الإدارية.وكل الطرق والاستثمارات الجديدة زودت من أهميته بدل ما تقللها.
النهارده لو سألت أي حد في القاهرة:
إيه أفضل مكان للسكن؟
غالبًا التجمع الخامس هيكون من أول الإجابات.
وده نفس المكان اللي ناس كتير كانت بتضحك على فكرة السكن فيه من 20 سنة.
عشان كده…
كل ما أسمع حد بيحكم على منطقة جديدة من شكلها الحالي فقط، أفتكر قصة التجمع الخامس.
لأن أغلب المدن الناجحة مرت بنفس المراحل:
مرحلة سخرية.
ثم مرحلة رفض.
ثم مرحلة اقتناع.
ثم مرحلة طلب.
ثم مرحلة ندم من اللي ما دخلش بدري.
والدرس هنا مش إن كل منطقة جديدة هتبقى تجمع خامس.
الدرس إنك لازم تعرف تفرق بين شكل المكان النهارده وشكل المكان بعد 10 سنين.
