24/04/2026
نصائح مهمة جدا فى التشطيب🌟🌟
مقدمة من م/هشام رفعت
- وانت بتصمم شقتك ماتشغلش بالك زيادة عن اللزوم بالضيوف ، لأنك هتشوفهم كل سنة مرة .. شوف الانسب ليك انت وعيالك وعيشتك اليومية
- لو شقتك على شارع ضيق وعندك بلكونة مجروحة ، قفلها الوميتال وكبر الصالة افيدلك
- السقف المعلق (الجيبسوم بورد)سعره حسب رسمته ، بس في المتوسط احسب الاوضة طول في عرض واضرب وهاتطلع المقاس
- الدهانات البلاستيك احسن من الزيت بس تجيب نوع نضيف زى يوتن
- اعمل المعجون اكيريلك وماتعملش المعجون الى تحت السلم
- البيبان جزء من الديكور
- باب الشقة هاته المصفح التركي او الايطالي
- سيراميك الحوائط ماينفعش يركب في الارضية لكن العكس ممكن، ويفضل بلاش
- احسن سيراميك الجوهرة وكليوباترا ، ولو عايز رخيص هات ليسيكو وفكك من الامير والفا والأمراء ورويال
- لو نفسك تركب بورسلين ومستغلي ثمنه ، هات سيراميك قطع ليزر هيكون ارخص شوية وشيك جدا .
- إياك ثم إياك تجيب بورسلين صيني.
- هات الخلاطات ايديال ستاندارد او روكا او جروهى عشان تعيش معاك بدل ما كل شوية تغيرهم
- في تأسيس السباكة هات كل مواسير المية واكسسواراتها باننجر او اكواثيرم ، وبعد التركيب اتصل بالشركة هيعملولك اختبار مجاني وضمان عشر سنوات
- ماتسترخصش في اسلاك الكهرباء لأن دة خطر جدا
- هات لقم ومفاتيح الكهرباء بتشينواو نوع معتمد واحذر الصيني لأنه كل شوية هيضرب
- اصرف عالمحارة على قد ماتقدر وهات صنايعي نضيف وغالي لان عيوبها بتعمل بلاوي ومابتتصلحش
- زود فيش كهرباء كتير في كل حتى مش هتخسر بس هتفيدك جدا
- لو عرفت يبقى عندك حمامين يبقى شيء رائع جدا جدا
- المطبخ الاميريكان مريح نفسيا لست البيت لكن لازم تراعى المجتمع اللى عايش فيه
- سيراميك الحوائط بيوصل لغاية قبل السقف بحوالي 5 سم عشان بعد ماتخلص تركب كرنيشة خشب او جبس عشان الشكل
- هات أوكر البيبان غالية ومتينة عشان لو رخيصة عيالك هيبوظوها بعد شهر
- في السيراميك : لو الأوضة او الطرقة أضلاعها منتظمة ممكن تعمل السيراميك عدل، لكن لو مش منتظمة والحيطان مايلة اعمله سمبوكسات او على زاوية ٤٥عشان تداري العيب
- لازم وحتما ولا بد ان مبيض المحارة يحط سلك شبك في اماكن التقاء الخرسانة مع الطوب ، وإلا هتشرخ بعدين ومش هتتعالج
- رخامة المطبخ ماينفعش تبقى رخام من نوع رخيص ، لازم جرانيت لأن الرخام هيتنقر ويشرخ (الا الرخام الدبل بلاك الافريقي والمستورد)
- ماتعملش شباك مناولة للمطبخ وحواليه طوب حراري، عشان الموضة دي بطلت من أيام المماليك
- البلكونة هاتلها دهانات خارجية (كومبليكو) أو خلي مبيض المحارة يعملهالك (جرافياتو)
- لازم تقف عالشغل بنفسك وتستقصى عن كل بند لأن الكروتة هتكلفك كتير
- زود فيش كهرباء في المطبخ عشان مراتك تحبك
- اختار شقة مطبخها كبير عشان تحبك اكتر
- حاول تفصل بيبان الغرف عند نجار محترم
وماتشتريهاش جاهزة من السوق
- اعتبر الصنايعية ضيوف في بيتك واكرمهم
نسألكم الدعاء
