13/02/2026
أحيانًا دخولك مجال ما بيكونش مخطط له.. بيكون المجال هو اللي بيختارك.
دخولي العقارات ماكنش حلم طفولة ولا خطة مرسومه،
دي كانت صدفة.
صديق ليا، في مقام أخ كبير، كان مضغوط في فلوس شقته في إسكندرية، وقالي..
لو بعتها يا بهوتي، ليك 10,000 جنيه.
اجتهدت، وكلمت سمسار واتنين، ونزلت إعلان بسيط على OLX.. أيام ما كان ببلاش.
بعد يومين، جالي اتصال من السعودية، قالي هيبعت حد يخلص في الشقة.
وقتها حسّيت أول قشعريرة عمولة، بس الأهم، حسيت إن ده مكان ممكن أعرف أكون فيه نفسي.
ـ كنت بعاني من مشكلة كبيرة في التواصل الاجتماعي،
ومش بحب الشغل الوظيفي الروتيني. وفجأة لقيت مجال: ✔️ بيعالج مشكلتي
✔️ بيبني علاقات
✔️ بيخليني أستخدم إمكانياتي
✔️ بيكسب فلوس
فقررت أن هو ده مجالي ولازم أكمل فيه.
ـ أكتر موقف أكدلي إني في المكان الصح؟
أول شهر شغل في شركة تطوير عقاري..
عميلة وزوجها، شابين ومعاهم بنت صغيرة.
عايزين يشتروا شقة، لكن معاهم أقل من السعر بـ 80–90 ألف جنيه.
قلت لهم الحقيقة.. (هو صعب، بس نحاول)
دخلنا لصاحب الشركة، وهو قرر يساعدهم، وشوفت الفرحة في عيونهم.
هنا فهمت إن العقارات مش بيع وحدات.. دي قرارات بتأثر في حياة الناس.
من ساعتها، قررت أشتغل بطريقة مختلفة:
– مش بضغط على عميل
– بقول المعلومة كاملة كأني أنا اللي هشتري
– موجود قبل البيع وبعده
– ولو الصفقة مش مناسبة بقول لأ
ـ رفضت صفقات كتير زي:
❌ بيع بهدف المضاربة السريعة
❌ أو عميل شغال مع بروكر تاني
ـ برتاح في الشغل أكتر مع العميل الصريح..
اللي فاهم إن القرار الصح محتاج رؤية، مش استعجال.
ـ ومن أكتر الصفقات اللي لمستني..
مستثمر مصري مغترب، بتابعه أكتر من سنتين.
يسافر، ينزل، والأسعار تتغير ومياخدش قرار.
كنت هقدر أبيع له أي حاجة، لكن نصحته يمشي بمبدأ: (الغالي رخيص.. لو مدروس صح)
وفي الآخر، ما اخترناش الأرخص، اخترنا الأمن، والأوضح، والأقل مخاطرة.
لما اشترى، حسيت إني، مش ببيع عقار.. أنا بساعد عيلة.
بعدها بفترة، بعتلي فيديو وهو في الحرم، بيدعيلي بالصحة والرزق.
اللحظة دي أكدتلي إن النجاح عندي مش رقم مبيعات.
النجاح الحقيقي؟ إن عميل يرشحك وهو مطمن ويقول:
(ده حد أمين.. هيحط مصلحتك قبل مصلحته)
عشان كده الفلوس عندي في الترتيب التالت.
ـ الأول تطوير.
ـ وبعده نجاح.
ـ وبعدهم الفلوس بتيجي لوحدها.
ـ وبعد 10 سنين..
أتمنى الناس تفتكرني بعزومة في بيتهم الجديد، ويقولوا:
(نصيحته كانت في مكانها)
الفخامة مش في السعر.. الفخامة في القرار الصح.
لو أنت بتفكر في خطوة عقارية، ابعتلي رسالة.. ونفكر سوا بهدوء ومصداقية.
