15/05/2026
តុលាការចោទប្ដី-ប្រពន្ធដែលចាប់ជំរិតក្មេងស្រីនៅខេត្តកណ្ដាល ចំនួន ២ បទល្មើស(👉អានលម្អិតក្រមព្រហ្មទណ្ឌខាងក្រោម)
___________
អយ្យការអមសាលាដំបូងខេត្តកណ្ដាល បានទទួលចាត់ការលើសំណុំរឿងព្រហ្មទណ្ឌលេខ ១១០១ អក ចុះថ្ងៃទី១៣ ខែឧសភា ឆ្នាំ២០២៦ ពាក់ព័ន្ធនឹងករណីចាប់ជំរិត និងធ្វើឃាតក្មេងស្រីនៅខេត្តកណ្ដាល ដោយជនត្រូវចោទចំនួន ២នាក់៖
១. ឈ្មោះ គឹម វណ្ណា ភេទប្រុស អាយុ៣៥ឆ្នាំ ជនជាតិខ្មែរ (ឃាត់ខ្លួន) ត្រូវចោទប្រកាន់ពីបទ «ចាប់ឃុំឃាំង និងបង្ខាំងដោយខុសច្បាប់ មានស្ថានទម្ងន់ទោស» និង «ឃាតកម្មដែលមានស្ថានទម្ងន់ទោសទាក់ទងនឹងអាយុជនរងគ្រោះ»។
២.ឈ្មោះ ធី ណារ៉ុង ភេទស្រី អាយុ២៧ឆ្នាំ ជនជាតិខ្មែរ (ឃាត់ខ្លួន) ត្រូវចោទប្រកាន់ពីបទ «សមគំនិតក្នុងអំពើចាប់ឃុំឃាំង និងបង្ខាំងដោយខុសច្បាប់ មានស្ថានទម្ងន់ទោស, ឃាតកម្មដែលមានស្ថានទម្ងន់ទោសទាក់ទងនឹងអាយុជនរងគ្រោះ»។
តាមអ្នកនាំពាក្យសាលាដំបូងខេត្តកណ្ដាល បន្ទាប់ពីបានពិនិត្យលើឯកសារ និងភស្តុតាងនានាដែលមានក្នុងសំណុំរឿង, ចៅក្រមស៊ើបសួរនៃ សាលាដំបូងខេត្តកណ្តាល បានសម្រេចឃុំខ្លួនជាបណ្តោះអាសន្នលើជនត្រូវចោទ ឈ្មោះ គឹម វណ្ណា និង ឈ្មោះ ធី ណារ៉ុង នៅពន្ធនាគារខេត្តកណ្តាល ដើម្បីបន្តកិច្ចស៊ើបសួរតាមនីតិវិធីច្បាប់៕
