06/05/2026
ល្បុក្កតោអង្រួនចិត្តខ្មែរនៅអាមេរិក
ភ្នំពេញ៖ អ្នកជំនាញក្បាច់គុនល្បុក្កតោខ្មែរពីររូប បានធ្វើមាតុភូមិនិវត្តន៍វិញដោយសុវត្តិភាពនៅថ្ងៃទី២ ខែឧសភា ក្រោយពីបានចំណាយពេលប្រមាណមួយខែនៅរដ្ឋវ៉ាស៊ីងតោន សហរដ្ឋអាមេរិក ក្នុងគោលបំណងផ្សព្វផ្សាយវប្បធម៍ជាតិទៅកាន់សហគមន៍ខ្មែរនៅឯក្រៅប្រទេស។
ព្រឹទ្ធារចារ្យក្បាច់គុនដូនតាខ្មែរ លោក សេង ប៊ុនសុង និងកីឡាការនីជម្រើសជាតិគុនល្បុក្កតោ កញ្ញា ម៉ៅ លក្ខិណា បានចូលរួមធ្វើបទបង្ហាញគុនដូនតាខ្មែរ ប្រមាណជាជាង១៥លើកនៅឯទីតាំង និងពេលវេលាផ្សេងៗគ្នាក្នុងរដ្ឋវ៉ាស៊ីងតោន ជាពិសេសនៅតាមទីវត្តអារាម សាលារៀនអាមេរិក មជ្ឍមណ្ឌលវប្បធម៍ចម្រុះ សាលាគុន និងទីតាំងរដ្ឋបាលក្រុងផ្សេងៗទៀត។ គិតមកទល់ពេលនេះ រដ្ឋវ៉ាស៊ីងតោនមានប្រជាជនខ្មែរប្រមាណជាបីម៉ឺននាក់កំពុងរស់នៅ ដែលជាហេតុធ្វើឲ្យការលើកស្ទួយវប្បធម៍ខ្មែរមានសារៈសំខាន់កាន់តែខ្លាំង។
លោក ប៊ុនសុង និងកញ្ញា លក្ខិណា បានសម្តែងអារម្មណ៍រីករាយដែលបាននាំយកក្បាច់គុនល្បុក្កតោខ្មែរ ទៅអង្រួនអារម្មណ៍ខ្មែរនៅអាមេរិក ជាពិសេសក្មេងៗជំនាន់ក្រោយ ដែលកំពុងចាប់ចិត្តចង់ដឹងកាន់តែច្រើនឡើងអំពីរឿងរ៉ាវមាតុភូមិរបស់ខ្លួន។ បើទោះបីជាពលរដ្ឋមួយចំនួននៅមិនទាន់ដឹងច្បាស់ពីគុនល្បុក្កតោក៏ពិតមែន ក៏ដំណើរនេះគឺជាជំហានថ្មីមួយក្នុងការពង្រឹងសណ្តានចិត្តរវាងខ្មែរនឹងខ្មែរនៅប្រទេសកម្ពុជា និងសហរដ្ឋអាមេរិក។
លោក ប៊ុនសុង ដែលជាទីប្រឹក្សាជាន់ខ្ពស់នៃគណៈកម្មាធិការអូឡាំពិកកម្ពុជាផងដែរនោះ ក៏បានសម្តែងអារម្មណ៍សុទិដ្ឋិនិយម ចំពោះការបន្តដំណើរមួយនេះ ឲ្យមានជីវិតទៅអនាគតបន្ថែមទៀត។
កិច្ចការដ៏មានសារៈសំខាន់ចំពោះវប្បធម៍ខ្មែរមួយនេះត្រូវបានគាំទ្រផងដែរដោយ មជ្ឍមណ្ឌលវប្បធម៍អាស៊ីប៉ាស៊ីហ្វិក (Asia Pacific Cultural Center), សហព័ន្ធកីឡាគុនល្បុក្កតោកម្ពុជា និងជាពិសេសសហគមន៍ខ្មែរនៅរដ្ឋវ៉ាស៊ីងតោន។
