06/01/2026
ລັດວິສາຫະກິດ ນ້ຳມັນເຊື້ອໄຟລາວ ລາຍເຫດການໄຟໄໝ້ລົດສະແຕັກນໍ້າມັນ ຢູ່ປໍ້ານໍ້າມັນ ແສງສະຫວ່າງ
ວັນທີ 6 ມັງກອນ 2026 ບໍລິສັດ ລັດວິສາຫະກິດ ນໍ້າມັນເຊື້ອໄຟລາວ ຊີ້ແຈງກໍລະນີເກີດເຫດອັກຄີໄພ ໄຟໄໝ້ລົດບັນທຸກນໍ້າມັນໃນຕອນເຊົ້າວັນທີ 5 ມັງກອນ 2026 ເວລາ 10:04 ໂມງ ທີ່ປໍ້ານໍ້າມັນ ແສງສະຫວ່າງ ເຂດດົງຈອງ ເຊິ່ງເປັນປໍ້າຕົວແບບ ຂອງລັດວິສາຫະກິດ ນໍ້າມັນເຊື້ອໄຟລາວ, ຜ່ານການເກັບກຳຂໍ້ມູນ ຈາກສະຖານທີ່ຕົວຈິງ ສາມາດສັງລວມເຫດການທີ່ເກີດຂຶ້ນໄດ້ດັ່ງນີ້:
ວັນທີ 5 ມັງກອນ 2026 ເວລາ 09:45 ໂມງ ລົດບັນທຸກນໍ້າມັນ ຈໍານວນ 20,000 ລິດ ໄດ້ຂົນມາສົ່ງນໍ້າມັນໃຫ້ແກ່ປໍ້ານໍ້າມັນແສງສະຫວ່າງ ໃນນີ້, ມີນໍ້າມັນກາຊວນ 12,000 ລິດ ແລະ ນໍ້າມັນແອັດຊັງ 8,000 ລິດ, ເມື່ອມາຮອດສະຖານທີ່ ລົດກໍ່ໄດ້ຈອດໃນຈຸດທີ່ ຈະລົງນໍ້າມັນ ແລະ ໄດ້ຮັບການກວດກາຄວາມຮຽບຮ້ອຍຈາກຜູ້ຈັດການປໍ້າ, ພະນັກງານຂັບລົດ ໄດ້ມອດຈັກລົດ, ໜີບ ສາຍຄາຍບັນຈຸໄຟຟ້າ ແລະ ປະກອບທໍ່ ເພື່ອລົງນໍ້າມັນ ຕາມລະບຽບການ. ຫຼັງຈາກນັ້ນ, ກໍ່ໄດ້ເລີ່ມລົງນໍ້າມັນ ໂດຍໄດ້ລົງສອງ ຫ້ອງພ້ອມກັນ ຄື: ຫ້ອງທີ 1 ເປັນນໍ້າມັນແອັດຊັງ ຈໍານວນ 4,000 ລິດ ແລະ ທ້ອງທີ 3 ກາຊວນ ຈໍານວນ 4,000 ລິດ. ຫຼັງຈາກລົງນໍ້າມັນຫ້ອງທີ 1 ໝົດ ກໍ່ໄດ້ຍ້າຍສາຍ (ປ່ຽນ) ໄປໃສ່ຫ້ອງທີ 2 ຂອງນໍ້າມັນແອັດຊັງ.
ໃນຂະນະນັ້ນ, ເວລາ 10:04 ໂມງ ພະນັກງານຂັບລົດກໍາລັງຕໍ່ສາຍທໍ່ນໍ້າມັນເຂົ້າຫົວວາວປ່ອຍນໍ້າມັນ ໄດ້ເຮັດໃຫ້ມີປະກາຍໄຟເກີດຂື້ນ ຢ່າງໄວວາ, ພະນັກງານຂັບລົດ ຈຶ່ງນໍາໃຊ້ບັ້ງມອດໄຟທີ່ມີໃນລົດ ສິດໃສ່ເພື່ອດັບໄຟ, ພ້ອມກັນນັ້ນ ພະນັກງານປໍ້າ ແລະ ຜູ້ຈັດການ ກໍ່ໄດ້ພ້ອມກັນໃຊ້ບັ້ງມອດໄຟທີ່ມີໃນນປໍ້າ ສີດເພື່ອດັບຊ່ວຍກັນ ເປັນຈໍານວນຫລາຍບັ້ງ, ແຕ່ບໍ່ສາມາດດັບໄຟໄດ້ ເຊິ່ງໄຟໄດ້ສືບຕໍ່ລຸກໄໝ້ລາມໄປຍັງສ່ວນຫົວຂອງລົດ, ເມື່ອສະຖານະການບໍ່ສາມາດຄວບຄຸມໄດ້ ຜູ້ຈັດການປໍ້າຈຶ່ງຮີບແຈ້ງໄປ ຍັງເຈົ້າໜ້າທີ່ມອດໄຟໃນເຂດໃກ້ຄຽງເພື່ອຂໍຄວາມຊ່ວຍເຫລືອ.
ພາຍໃນ 10 ນາທີ ໄຟໄດ້ສືບຕໍ່ໄໝ້ ສ່ວນຫົວລົດຈົນເສຍຫາຍເກືອບໝົດ, ຮອດເວລາ 10:25 ໂມງ ລົດດັບເພີງຈຶ່ງໄດ້ມາຮອດສະຖານທີ່ ໂດຍແມ່ນລົດຂອງກູ້ໄພ 1628 ແລະ ລົດດັບເພີງ ຈາກກົມມອດໄຟນະຄອນຫລວງ, ລົດດັບເພີງຈາກຕໍາຫລວດສະກັດກັ້ນຕ້ານອັກຄີໄພນະຄອນຫລວງ, ລົດດັບເພີງຕໍາຫລວດ ເມືອງໄຊເສດຖາ ເຊິ່ງໃຊ້ລົດດັນເພີງທັງໝົດ 6 ຄັນ ຈຶ່ງສາມາດຄວບຄຸມໄຟໄດ້ ໃນເວລາ 10:35 ໂມງ.
ພາຍຫລັງທີ່ ຄວບຄຸມສະຖານະການໃຫ້ຢູ່ໃນສະພາບປົກກະຕິ ພະແນກເຕັກນິກ ແລະ ພະແນກຄຸ້ມຄອງຄວາມປອດໄພ ແລະ ສ້ອມແປງ ຈຶ່ງໄດ້ເຂົ້າສໍາຫລວດຜົນເສຍຫາຍ ພົບວ່າ: ລົດບັນທຸກນໍ້າມັນແມ່ນຖືກໄຟໄໝ້ ສະເພາະສ່ວນຫົວຂອງລົດທັງໝົດ, ສ່ວນນໍ້າມັນທີ່ເຫລືອໃນຖັງລົດ ປະມານ 12,000 ລິດ ແມ່ນບໍ່ມີການເສຍຫາຍ ແລະ ບໍ່ມີການຮົ່ວໄຫລອອກຈາກລົດບັນທຸກ, ສະຖານທີ່ອາຄານເຮືອນປໍ້າກໍ່ບໍ່ໄດ້ມີການເສຍຫາຍ, ຖັງນໍ້າມັນໃຕ້ດິນຂອງປໍ້າກໍ່ບໍ່ໄດ້ຮັບຜົນກະທົບແຕ່ຢ່າງໃດ ແຕ່ພະນັກງານຂັບລົດ ໄດ້ຮັບບາດເຈັບເລັກໜ້ອຍ ບໍ່ມີຜູ້ບາດເຈັບຮ້າຍແຮງ.
ສໍາລັບຕົ້ນປາຍສາເຫດຂອງເຫດການດັ່ງກ່າວ, ຍັງຢູ່ໃນການພິສູດຫລັກຖານຂອງເຈົ້າໜ້າທີ່ ທີ່ກ່ຽວຂ້ອງ, ບໍລິສັດ ລັດວິສາຫະກິດ ນໍ້າມັນເຊື້ອໄຟລາວ ຈະແຈ້ງ ຜົນພິສູດໃຫ້ແກ່ ສັງຄົມ ໄດ້ຮັບຊາບຕາມພາຍຫລັງ.
#ໜັງສືພິມລາວພັດທະນາ #ຂ່າວພາຍໃນ #ໄຟໄໝ້ລົດ #ປໍ້ານໍ້າມັນ #28
_______________@_______________
ສະໜັບສະໜູນໂດຍ: Samsung
_______________@_______________
ຂ່າວອື່ນໆ >> www.laophattananews.com
Youtube: www.youtube.com/channel/UCfSwYXQ8r6NOMO_vlp7bZYw
Twitter: https://X.com/laophattana
Whatsapp: https://whatsapp.com/channel/0029Va9dcYjHFxPArwc63g17
Tiktok: https://www.tiktok.com/
ສົນໃຈລົງໂຄສະນາໂທ: 020 9999 7139
ຕິດຕໍ່ຫານັກຂ່າວໂທ: 020 2345 0088
