18/08/2026
ඇගේ කතාව
1 කොටස
හවස වැඩ ඇරිලා ගෙදර ආපු රූහිට කිරි කෝපි එකක් හදාගෙන බොන්න හිතුනේ උදේ ඉදලා තිබුන සීතල ගතිය නිසාද කවදාවත් ඉවරයක් වෙන්නේ නැති හිතේ තියෙන බර ගතිය ටිකක් හරි නිවාගන්න ඕන නිසාද කියලා රූහිටම හිතාගන්න බැරිවයි උන්නේ.... වේලාව හවස 6 කියලා ආච්චිලාගේ කාලේ ඉදලා ගෙදර තිබුන ඔරලෝසුව කියන්න ගත්තා. පරණ ගෙදර තිබුන මතක ගොඩක් එක්ක රූහි මේ බිත්ති ඔරලෝසුව අලුත් ගෙදරට ගේන්න අමතක කරේ නැහැ. එයාට තාම මතකයි පුංචි කාලේ කොහොමද මේ ඔරලෝසුව හරියට වෙලාවට සද්දේ දාන්නේ කියලා කල්පනා කරපු හැටි. කෝපි එක ගානට නිමිලා. ඔෆිස් එකේ කට්ටිය රූහිට විහිලු කරේ ඇල් වතුරෙන් තේ හදාගෙන බොන්න කියලා. එච්චර නිවෙනකල් ඉදලා බොන එක එයාට පුරුද්දකට ගිහින්. පුංචි කාලේ අම්මා තේ හදලා දුන්නට නිදි මත ලොකු නිසා නින්දෙන් ඇහැරෙන වෙලාවට නිවුන තේක බීලා පුරුදු වුනා. කසාද බැදලා ආවම හදාගත්ත තේක බොන්න වෙලාවක් හොයා ගන්න බැරි කමට නිවුන තේක උගුරු දෙකට බිලා දැම්මා. දැන් ඒකම පුරුද්දකට ගිහින්.
🦋🦋🦋🦋🦋🦋
නංගිට දවස් දෙකකින් කතා කරන්නත් බැරි වුන නිසා කෝපි එකත් අරගෙන රූහි ගියේ බැල්කනි එකට. දවස් දෙකක් කතා කරේ නැති වුනාට දෙන්නට තිබුනා සති ගානක ඕප දූප කතා කරන්න. රූහිට කියලා මේ ලෝකේ ඉතුරු වෙලා ඉන්න එකම එක්කෙනා නංගි. එයාටත් තව මාසයකින් කැම්පස් ඉවරයි. එයා ගෙදර ආවා නම් මේ තනිකම ටිකක් හරි නැති වෙයි කියලා රූහිට විශ්වාසයි. ඒත් එයාට ජොබ් එකක් එහෙම්ම හරිගියොත් එන්න බැරි වෙයි. ඒ ගැන දැන්ම මොකටද හිතන්නේ කියලා රූහි වෙනතක් බලාගත්තා. එහා ගෙදර කුලියට ඉන්න මිඩ් වයිෆ් මිස්ලා හතර දෙනා ටවුමට ගිහින් එන ගමන් බැල්කනි එකට වෙලා කල්පනා කරන රූහිට අතවනාගෙනම ගෙට ගියා. නංගි වැඩ ඇති. මිස් කෝල් එක දැක්කම ගනි නේ. එහෙම හිතපු රූහි කුස්සියට ගියේ රෑට මොනවද කන්න හදාගන්නේ කියලා කල්පනා කරන ගමන්. බඩගිනි වුනොත් කොත්තුමී එකක් හදාගෙන කනවා. එහෙම හිතපු රූහි පොතක් කියවන්න හිතාගෙන පොත් කාමරේට ආවා.
🦋🦋🦋🦋🦋🦋🦋
රූහි කියන්නේ අම්මා, අප්පච්චි, නංගි කෙනෙක් ඉන්න පවුලේ ලොකු දුව. අප්පච්චිගේ පැත්තෙන් ගත්තොත් ලොකු දුව. අම්මාගේ පැත්තෙන් ගත්තොත් නම් මැද දුවක්. මොකද අම්මගේ පරිම්පරාවේ ලොකු පිරිසක හිටියා. එයා පවුලේ අයත් එක්ක හිටියේ අප්පච්චිගේ මහ ගෙදර. හැමදාම එ ගෙදර කට්ටිය පිරිලා හිටියා. රූහිටත් පිරිසක් එක්ක ජීවත් වෙනවා කියන එක මහා ලොකු දෙයක් නෙමෙයි. ආච්චි අම්මගේ ආදරෙත් එක්ක අතට පයට වැඩ කරලා දෙන්න පිරිසක් එක්ක එයාගේ ළමා කාලේ හරි ලස්සනට ගෙවුනා. අවුරුදදේ එක කාලයක් මහ ගෙදරත්, තව කාලයක් අම්මගෙයි ආච්චිගෙයි රණ්ඩු නිසා තව ගෙදරකත් ජීවත් වුනාට රූහිට ඒක ලොකු ගැටලුවක් වුනේ නැහැ. අප්පච්චගේ තිබුන අනියම් සම්බන්ධතා නිසා අම්මයි අප්පච්චි රණ්ඩු වෙනවා එයාට තාම මතකයි. රූහි එයාගේ අප්පච්චිට හරිම ආදරෙයි. ඊටත් වඩා බයයි. එයා එක පාරක් රවලා බැලුවා නම් ඇති කෙල්ලට ඇඩෙන්න. හැමදාම වගේ රණ්ඩු වුනත් ඒ දේවල් ඒ කාලෙට නොතේරුනත් ඒ රණ්ඩු නිසා ඒ පුංචි මනසට මොකද වුනේ කියලා රූහිට තේරෙන්න එයා අම්මා කෙනෙක් වෙනකල් ඉන්න වුනා.
🦋🦋🦋🦋🦋🦋
රූහි ගැන කෙටියෙන්ම කියනවා නම් හරි ලස්සන කෙල්ලෙක්. හැම කෙනාම දෙපාරක් හැරිලා බැලුවේ නැති වුනාට එයාට හිත ගිය කෙනෙක් ලේසියෙන් එයාව අතාරින්න නම් කැමති නැහැ. දකින ගොඩක් අය කිව්වේ පුදුම ආඩම්බර කමක් කියලා. ඇත්තටම රූහි ආඩම්බරයි. ඊටත් වඩා අදුරන්නේ නැති මනුස්සයෙක්ට හිනාවෙන්න සිය පාරක් වත් හිතනවා. දන්න කියන මිනිස්සුන්ට පන වුනත් දෙනවා. උසයි, කෙට්ටුයි,සුදුයි, කැරලි ගැහුනු කොණ්ඩේත් එක්ක දුඹුරු පාට ඇස් දෙකයි දිග නහයයි එයාට ගෙනාවේ අමුතුම ලස්සනක්. හැමෝම එයාට කතා කරේ සුදු නෝනා කියලා. ඉගෙන ගන්නත් දක්ෂයි. උසස් පෙල කරලා ගෙදර ඉන්න කාලේ දන්න කියන කෙනෙක් හරහා රස්සාවක් හොයා ගන්නත් ඒකේ තිබුන විභාග කරගෙන මේ වෙනකොට ඒ කාර්යාලේ පරිපාලන නිලධාරියා වෙන්නත් අවු 33 වෙනකොට රූහිට පුළුවන් වුනා. එයා තාමත් විශ්වාස කරන දෙයක් තමයි එයා ජිවිතේ කරපු ලොකුම වැරැද්ද ඉක්මනින් විවාහ වුන එක කියලා. මොකද අවුරුදු 21 වෙනකොට එයා විවාහ වෙන්න තීරණය කලා. ඊට පස්සේ අවුරුදු 10 ක් වෙනකොට ළමයි තුන්දෙනෙක් ඉන්න අම්මා කෙනෙක් වුනා. එයාගේ හැම දෙයක්ම සීමා වෙනකොට හැමදේම ඉවසගත්තේ දරුවෝ ගැන හිතලා. මට බැරි වුන දේවල් මගේ දරුවන්ට දෙනවා කියන එක තමයි එයාගේ ලොකුම අරමුණ වුනේ. ඒත් රූහිට තමන්ගේ අප්පච්චිගේ ප්රශ්න නම් කවදාවත් ඉවර වුනේ නැහැ. අම්මත් මේ දේවල් ගැන හිතලා අසනිප වුනා. රූහිගේ සැමියා කැමති වුනේ නැහැ එයා අම්මා අප්පච්චි ගැන බලනවට. ඉතිං කෙල්ල හරිම අසරණයි. බැදලා ගිහින් නෝනගේ කීම අහගෙන කොල්ලෝ වෙනස් වුනාට කෙල්ලෙක් කියන්නේ ලේසියෙන් තමන්ගේ පවුලේ මිනිස්සු අතැරලා දාන කට්ටියක් නෙමෙයි. රූහිත් ඒවගේ. මොන තරම් පීඩනයක් වුනත් හැම පැත්තක්ම සමබර කරගෙන හැමෝගෙම මුනට හිනාවක් ගේන්නයි එයාට ඕන වුනේ. දෛවය ඒ තරම් ලේසි වුනේ නැහැ කෙල්ලට. හැමදාම අලුත් වෙන ප්රශ්නත් එක්ක රූහිට ජිවිතේ බර වෙන්න පටන් ගත්තා. සල්ලි ප්රශ්න හිමින් හිමින් වැඩි වෙන්න පටන් ගත්තා. සැමියත් හැමදේටම ආඩපාලි කිව්වේ රූහිට. අප්පච්චි ගැන ඇනුම් පද කියලා කෙල්ලට රිද්දන එක එයාට පුරුද්දට ගියා. කැම වල අඩුපාඩුවක් , ගේ අස්කරගන්න බැරිවිමක්, දරුවෙක්ගේ වැරැද්දක් වගේ හැමදේටම බැනලා බැනලා මාස ගානක් කතා නොකර ඉන්න සැමියෙක් තමයි රූහිට ලැබුනේ. ඇය තාමත් කල්පනා කරන්නේ ඇය ඇත්තටම ඔහුට ආදරේ කරාද? නැත්නම් ඒ දවස් වල ගෙදර තිබුන තත්ත්වයෙන් ඇත් වෙන්න ඕන නිසා ඔහුව විවාහ කර ගත්තද කියලා.
