05/02/2026
අනාගතය උදෙසා අපි නිදහස් හා බහු පක්ෂ ක්රමය ආරක්ෂා කළ යුතු බව එක්සත් ජාතික පක්ෂයේ නායක, Viii වැනි විධායක ජනාධිපති රනිල් වික්රමසිංහ මහතා පැවසීය.
“Smart UNP-2026” ආරම්භ කිරීමේ වැඩසටහනේදී හිටපු ජනාධිපතිවරයා මේ බව කියා සිටියේය. මෙහිදී, සිරිකොත පක්ෂ මූලස්ථානයට Starlink සේවාව ස්ථාපනය කිරීමද නිල වශයෙන් සිදු කෙරුණි.
මෙම වැඩසටහන සිරිකොත පක්ෂ මූලස්ථානයේදී ඉකුත් 04 වැනිදා පැවැත්වුණි.
හිටපු ජනාධිපතිවරයා වේදිකාවට පැමිණි පසු ආරක්ෂකයින් විසින් ඔහුට හිඳ ගැනීමට ආසනයක් ලබා දුන්නේය.“මේ දවස්වල ඉතින් බංකුවල ඉඳගන්න එක තමයි කරන්නේ.“යැයි හිටපු ජනාධිපතිවරයා සිනාසෙමින් පවසා සිය කතාව ආරම්භ කළේය.
අපේ නායක ඩී.එස්. සේනානායක මැතිතුමා නිදහස් ලංකාවක් බිහිකරලා 78 වැනි සංවත්සරය සමරන අවස්ථාවයි මේ. මොකද එතුමාගෙන් ගත්ත ප්රයෝජනය එදා සිට අද දක්වා වසර 78 ක් මේ රට හදන්න ගිය නායකයින් සියළු දෙනාම අපි අගය කරනවා. එතුමා ආරම්භ කලේ මධ්ය මහා විද්යාල 50 යි. අද තියෙනවා 1,400 කට වඩා.එදා විශ්වවිද්යාල එකයි. අද රජයේ විශ්වවිද්යාල 19 යි, රජයේ නොවන විශ්වවිද්යාල 27 යි. අද රෝහල් 550 කට වඩා තිබෙනවා. අපි සහල්වලින් ස්වයංපෝෂිතයි. අපි අලුත් යුගයක ඉන්නේ.
අනාගතය උදෙසා අපි නිදහස් හා බහු පක්ෂ ක්රමය ආරක්ෂා කලයුතුයි. එ්කෙන් තමයි මේ රට දියුණු වුනේ. ඒ සඳහා හැම බලවේගයකටම එකතු වෙන්න කියලා මම ඉල්ලා සිටිනවා.
මේ රටේ ආර්ථිකය 2022 කඩා වැටුණා. මම බාරගත්තා. රටේ ස්ථාවරභාවය ඇතිකලා. දැන් තියෙන්නේ ජෙන්සියටර් තිබෙන සමාජයයි. ඩිජිටල් සමාජයක්. අපි දුන්න ජංගම දුරකථනයෙන්, පරිඝණකයෙන් මේ හැම එකෙන්ම ඩිජිටල් යුගයකට ගිහින් තිබෙනවා. ජෙනිසියර් කියන්නේ ඩිජිටල් යුගයට ඉපදුණු පරම්පරාව. මේ පරම්පරාව සමඟ තමයි ඉදිරියට යන්න තියෙන්නේ. එක්සත් ජාතික පක්ෂය ඒකටයි ලෑස්ති වෙන්නේ. අද අපි ඉන්නේ ජේ. ආර් ගේ කාලයේ නොවෙයි. අපි ඉන්නේ ට්රම්ප් ගේ ලෝකයේ කැමැති උනත්, නැති උනත්, අපි ඒ යුගයට යායුතුයි. ඒකට සුදුසු සමාජයක් ඇතිකල යුතුයි. අද අපි යන්නේ මවන ලද ලෝකයට. මවන ලද තාක්ෂණයටයි. ඒ දැනුම ලබා ගන්න ඕනේ. නැත්නම් අපිට ඉදිරියට ගන්න බෑ. ඒකටයි අපි ඩිජිටල් පක්ෂයක් ආරම්භ කලේ. පොලිටික්ස්වල නිව් වයිබ් එකට සෙට් වෙමු. ස්මාර්ට් යූ.එන්.පී. එකට එකතු වෙමු.“ යැයි හිටපු ජනාධිපතිවරයා කීවේය.
