Riad RealEstate

Riad RealEstate رياض اعظومه متخصص في الفرص العقارية و الاستثمارية. عقارات - بيوت هدم - أراضي.

نساعدك تأخد قرار عقاري ذكي ومربح

الكل يعرف إن سوق العقار يبّي خبرة ، والخطأ الصغير في الأوراق ممكن يضيع عليك شقى عمرك. ولهذا السبب، قررت نجهزلكم سلسلة في...
23/05/2026

الكل يعرف إن سوق العقار يبّي خبرة ، والخطأ الصغير في الأوراق ممكن يضيع عليك شقى عمرك. ولهذا السبب، قررت نجهزلكم سلسلة فيديوات قانونية متكاملة حتنزل على الصفحة قريباً.

شنو حناقشوا في السلسلة هذه؟

التسجيل العقاري: كيف تضمن ملكيتك؟ وشنو الأوراق الرسمية والمضمونة؟

العقود والبيوعات: كيف تكتب عقد بيع صحيح يضمن حق البائع والمشتري؟

المشاكل الشائعة: كيف تتفادى الأراضي أو العقارات اللي عليها مشاكل أو نزاعات؟

نصائح استثمارية: كيف تقيّم العقار قانونياً قبل ما تحط فيه قرشك؟

الفيديوهات حتكون قصيرة، واضحة، وبلغتنا العامية البسيطة باش الفكرة توصل للجميع بدون تعقيد.

20/05/2026

القهوة و العقار .

كيف العقارات ا ليها تأثير على ابسط الأشياء في حياتنا اليومية .

#عقارات #طرابلس

🚨 قانونياً.. ورقة وحدة ناقصة ممكن تضيع حوش عمرك في ثواني 🚨في سوق العقارات ، تسمع بـ "الملك المقدس" "الحجة"، و"العقود الا...
17/05/2026

🚨 قانونياً.. ورقة وحدة ناقصة ممكن تضيع حوش عمرك في ثواني 🚨

في سوق العقارات ، تسمع بـ "الملك المقدس" "الحجة"، و"العقود الاشتراكية".. لكن هل تعرف الفرق القانوني بيناتهم؟
قبل ما توقع على أي عقد أو تدفع قرش واحد، لازم تفهم تشريح الملكية في ليبيا باش تحمي فلوسك من الاحتيال:

الفرق بين أنواع الملكية والمخاطر القانونية:

الملك المقدس : أأمن وأقوى أنواع الملكية، مسجل في السجل العقاري ومستنداته قطعية ولا غبار عليها. نسبة المخاطرة فيه: 0%.

الحجة : ورقة يكتبها محرر عقودي تشهد بملكية الأرض بناءً على شهود وتاريخ قديم ،ركز معاي: "الحجة" مش مسجلة في السجل العقاري، وهنا المخاطرة، لازم تتأكد من تسلسل الحجج لجيلين أو ثلاثة لورا باش تضمن إن الأرض ما تطلعش لشخص ثاني.

العقود الاشتراكية : العقارات التي آلت للدولة بموجب القانون رقم 4 القديم، الشراء فيها يحتاج تدقيق شديد جداً للتأكد من تسوية وضعها القانوني مع الملاك الأصليين (المقاسمة والتعويضات)، وإلا حتخش في قضايا ومشاكل ومخاطرة عالية جداً.

(شن تطلب من البائع بالترتيب؟):
أولاً: اطلب أصل سند الملكية (سواء كان ملك مقدس أو حجة).

ثانياً: اطلب "شهادة عقارية حديثة" أو "شهادة سلبيّة" تضمن إن العقار مش مرهون للمصرف أو عليه حجز قضائي.

ثالثاً: اطلب خريطة مساحية معتمدة تطابق الواقع (باش ما تطلعش شاري في الشارع أو في أرض جارك).

رابعاً: خوذ الورق هذا كله واطلع بيه للمحرر العقاري المعتمد قبل ما تسلم العربون.

نصيحة :
الشخص الذكي ما يغراش رخص السعر، لأن العقار الرخيص وراه ديمة قصة قانونية معقدة .

#عقارات #طرابلس

13/05/2026

⭐️نصيحة ذهبية من معرض ليبيا للاستثمار العقاري
#عقارات

كلنا نعرفوا إن العقار ( ابن بار )لكن في بلادنا، العقار عنده حاسة سادسة للأمان .شنو اللي صاير في السوق 1️⃣ الأمان هو الم...
12/05/2026

كلنا نعرفوا إن العقار ( ابن بار )لكن في بلادنا، العقار عنده حاسة سادسة للأمان .

شنو اللي صاير في السوق

1️⃣ الأمان هو المسطرة ، زمان كان القرب من وسط البلاد هو اللي يغلي السعر، توا الهدوء هو اللي يحكم ،المنطقة اللي تضمن فيها ليلك راقد وتطلع وترجع لصغارك وأنت مطمن سعر المتر فيها يطير للسحاب حتى لو كانت بعيدة .

2️⃣ النزوح والطلب ،لما يصير توتر في أي مكان (ربي يحفظ الجميع)، يزيد الطلب فجأة على المناطق المستقرة، وهذا يخلي الأسعار تزيد بين ليلة وضحاها .

3️⃣ الاستثمار الخايف ، هلبا ناس تبي تحط فلوسها في عقار، بس يقعدوا مترددين نشري توا وإلا نصبر ؟
الحقيقة تقول إن العقار في المناطق الهادية ما يطيحش سعره بل يزيد لأنه يعتبر ملاذ آمن لفلوسك.
الخلاصة يا جماعة الخير:
الأسمنت والحديد غالي صح، بس راحة البال هي اللي تخلي المتر بآلاف.

السوق العقاري توا مش مجرد بنيان، هو قراءة للواقع اللي نعيشوا فيه.

وإنتوا شن رايكم؟

هل تشوفوا إن الأمان هو العامل الأول اللي يخليكم تختاروا مكان سكنكم؟ وإلا السعر والخدمات أهم؟
شاركونا بآرائكم في التعليقات، وخلينا نشوفوا وجهة نظركم .

#عقارات #طرابلس

10/05/2026

زيارة اليوم لمعرض ليبيا للاستثمار العقاري
#عقارات #ليبيا

من وين جت تسمية عقار ؟أصل تسمية ( عقار ) او RealEstate بشكل مختصر موضوع من وين جت تسمية عقار و جمعها عقارات :- هوا كل ش...
09/05/2026

من وين جت تسمية عقار ؟

أصل تسمية ( عقار ) او RealEstate

بشكل مختصر موضوع من وين جت تسمية عقار و جمعها عقارات :- هوا كل شي تابث في مكانه في الارض و ما تقدرش تنقله من مكانه من غير ما يتلف او يفسد زي أراضي مباني و حتى العرب زمان يصنفو الأشجار عقار ، و معناها الأصل و الثبات .

نجو للغة الإنجليزية و تسمية العقار RealEstate
بأختصار في اصلها مشتقه من مصطلحات لاتينية و فرنسية قديمة .

‏ ( Real )يعني حقيقي مشتقة من الكلمة اللاتينية ( Res ) معناها شي او مادة .

و ( Estate )يعني ارض او عقار والي مشتقه من الكلمة الفرنسية ( Estat ) معناها الوضع القانوني للشخص و ممتلكاته .

ومصطلح RealEstate طلع في لندن في القرن 16
بعد ( حريق لندن العظيم ) والعظمة الله ، عشان يعيدو تنظيم الملكيات و الأراضي .

#عقارات #ليبيا

08/05/2026

السلام عليكم

اليوم نبي نشاركم شوية من حياتي المهنية و كيف اني قررت ندخل سوق العقارات و الاستثمار العقاري .

فالبداية العبد الله موظف بديوان وزارة الإسكان و التعمير من سنة 2022 تعلمت منها هلبا حاجات ولو من باب العلم بالشيئ عن العقارات - البنية التحتية - اعادة الإعمار - التنمية - التخطيط الاستراتيجي- التعامل مع المباني الأثرية الي تحتاج تعامل خاص - كيفية حصر الأضرار سواء عن الكوارث الطبيعية او المباني المتضررة جراء الحروب نسأل الله ان يلم شملنا و يهدي سرنا .

تعرفت من خلالها على ناس كفاءات و كوادر قوية و ناس قيادية و ناس كبيرة فالسن تحمل من الخبرة الكتير و الكتير و نتعلم منهم كان بودي نذكرهم بالاسم لاكن خصوصيات الناس مافيش كيف ، و تعرفت على اصحاب شركات محلية و شركات دولية كبيرة ، كل هذا خلا تركيزي يتجه للعقارات و الاستثمار العقاري و التنمية و خلى عندي رؤية مستقبلية كبيرة ،

بعد حللت السوق العقاري اكتشفت انه السوق الليبي ينقصه الكتير و الكتير من افكار الاستثمار العقاري .

والناس المقربة و الأصدقاء و الاقارب كل مرة يكلمني حد عنده عقار للبيع او يبي شغل دولي ف من النقطة هادي قررت اني نتوكل على الله نخش للسوق العقاري نساعد الناس على البيع و الشراء و نعلم الناس الشيئ الي غايب عليهم عن طريق كل مرة معلومة للفائدة .

و الرؤية الي عندي رح نعيشها معاكم خطوة بخطوة نسأل الله العظيم ان يوفقنا لما فيه مصلحة البلاد و العباد .

07/05/2026

4 نصائح مهمة تساعدك تختار العقار بشكل أذكى وتتفادى الأخطاء الشائعة.

#عقارات #طرابلس

05/05/2026

هلبا ناس أول ما يشوف عقار سعره رخيص يقول: هذه فرصة ما تتفوتش.

لكن

مرات السعر الرخيص يكون علامة خطر… مش فرصة.

لأن في عقارات:

• موقعها ضعيف
• مافيش عليها طلب
• صعب يبيعه من جديد

فتلقى نفسك شريت “عقار رخيص”…
لكن ما تقدرش تبيعه ولا تستثمر فيه.

في العقار، السؤال الصح مش: كم سعره؟

السؤال هو:
“هل يستاهل؟”

لأن الفرق بين صفقة ناجحة وصفقة خاسرة
مش في السعر… لكن في القيمة.

في البوست الجاي حننزل فيديو، بنشارككم 4 حاجات لازم تديرها قبل ماتشري اي عقار، ان شاء الله يفيدكم

03/05/2026

السلام عليكم

أنا رياض اعظومه، قررت نبدأ رحلتي في عالم الاستثمار العقاري انطلاقًا من قناعة بسيطة: العقار مش مجرد مباني وأراضي، لكن فرص تبني عليها قرارات ومستقبل.

أنا متأكد ان النجاح في هذا المجال ما يعتمدش على البيع والشراء بس، لكن على فهم السوق، وتحليل الفرص، وبناء علاقات قائمة على الثقة والمصداقية.

بنركز بشكل خاص على الفرص الاستثمارية في طرابلس، وخاصة بيوت الهدم والأراضي والعقارات التي تحمل قيمة حقيقية وفيها عوائد مستقبلية.

هدفي نساعد الباحثين عن الاستثمار أو السكن في اتخاذ قرارات عقارية مدروسة، مبنية على المعرفة والشفافية.

هذه مجرد البداية، والقادم بإذن الله حيكون معبي فرص ومعرفة وتجارب اللي بنشاركها معاكم.

Address

طرابلس
Tripoli

Opening Hours

Monday 08:00 - 23:00
Tuesday 08:00 - 23:00
Wednesday 08:00 - 23:00
Thursday 08:00 - 23:00
Saturday 08:00 - 23:00
Sunday 08:00 - 23:00

Website

Alerts

Be the first to know and let us send you an email when Riad RealEstate posts news and promotions. Your email address will not be used for any other purpose, and you can unsubscribe at any time.

Shortcuts

Share

Category