Nang kham

Nang kham မျှဝေရာ

12/01/2024

#ယောဂီသိရန်အခြေခံ(၂၉)။ ။တွန်း ကန် လှုပ်ရှားတဲ့သဘောကရုပ်ခန္ဓာရဲ့ အရှုခံသဘောတရား၊ သိ သိပေးနေတာက နာမ်ခန္ဓာရဲ့ အရှုခံသဘောတရားပါ။တရားသဘောဆိုတာ သဘောတရားသက်သက်ဘဲ။ သူမပါငါမနှော ရုပ်သဘောနဲ့နာမ်သဘောလို့ ကိုယ်ဉာဏ်ထဲ ပိုင်းပိုင်းခြားခြား ကွက်ကွက်ကွင်းကွင်း ရှင်းလင်းစွာသိထားနှင့်ပါမှ ဒိဌိအရင်ပြုတ် ဝိပဿနာအလုပ်အားထုတ်ဆိုတာနဲ့ မကိုက်ဘူးလား(ကိုက်ပါတယ်ဘုရား)။ဖြစ်ပေါ််လာတဲ့ရုပ်နာမ် ပျက်သွားတော့ ချမ်းသာတာလား၊ ဆင်းရဲတာလား(ဆင်းရဲတာပါဘုရား)။ ဘာသစ္စာတဲ့လည်း(ဒုက္ခသစ္စာပါဘုရား) ဖြစ်ပေါ််လာတဲ့ရုပ်နာမ်လည်းဒုက္ခ ပျက်စီးသွားတဲ့ရုပ်နာမ်လည်းဒုက္ခလို့ စာပေက-ဒုက္ခမေဝ ဥပ္ပဇ္ဇမာနံ ဥပ္ပဇ္ဇတိ ဒုက္ခံနိရုဇ္စျမာနံနိရုဇ္စျတိ။ လို့ ကျမ်းဂန်ပါဠိလာရှိသည်နှင့်အညီ ခန္ဓာရုပ်နာမ် အရှုခံတရားကို ရှုဉာဏ်နဲ့စောင့်ပြီးကြည့်၊ ဖြစ်ပေါ််လာတာလည်းဒုက္ခပဲ၊ပျက်စီးသွားတာလည်း(ဒုက္ခပါဘုရား) ဖြစ်ဒုက္ခနဲ့ပျက်ဒုက္ခလို့မြင်တယ် သိတယ်ဆိုရင် အမှားမြင်တာလား၊ အမှန်မြင်တာလား(အမှန်မြင်တာပါအရှင်ဘုရား) အမှန်မြင်တဲ့ဉာဏ်၊သစ္စာသိတဲ့ဉာဏ် ယထာဘူတံ ပဇာနာတိနဲ့ကိုက်ညီတဲ့ဉာဏ် မရနိုင်ဘူးလား (ရနိုင်ပါတယ်ဘုရား)ဒါကြောင့် ဆရာတော်ကြီးက ဖြစ်ပျက်သမျှ သင်္ခါရ ဒုက္ခသစ္စာမှတ်လို့ ဟောခဲ့ပါတယ်။ ရုပ်နာမ်ခန္ဓာရဲ့ ဖြစ်ပျက်ဒုက္ခကို မြင်သိအောင် မုန်းသွားအောင် ဆုံးသွားအောင်ရှုပေးပါတဲ့။ ဒုက္ခအဆုံးက နိဗ္ဗာန်၊ ဆုံးမှန်းသိတာက မဂ်ဉာဏ်လို့ဟောခဲ့ပါတယ်။ အဲဒါအာနာပါနဆိုတဲ့ သမထဘာဝနာ၊ သမာဓိကနေ ဝိပဿနာဘာဝနာထိအောင် အခြေခံကစ ပြောပြတဲ့အတိုင်း ကြိုးစားအားထုတ်နိုင်ရင် မဂ်ဉာဏ်ဖိုလ်ဉာဏ် မရနိုင်ဘူးလား(ရနိုင်ပါတယ်ဘုရား)အဲဒါ ပစ္စုပ္ပန်အကျိုးအခြင်းရာငါးပါးခေါ််တဲ့ ခန္ဓာငါးပါး ဒုက္ခသစ္စာတွေပါပဲ။ (ဆက်ရန်)
#နန်းခမ်း

21/11/2023

#ယောဂီသိရန်အခြေခံ(၂၈)။ ။ဝင်လေထိတာ ရုပ်တရားပါ။ နှာသီးဖျားဆိုတဲ့ ကာယပသာဒရုပ်ရယ်၊ ဝင်လေထွက်လေဆိုတဲ့ဝါယောရုပ်ရယ်၊ ရုပ်ရုပ်ချင်းထိလို့ ထိတာကရုပ်တရားလို့ မှတ်ထားပါ။ ဝင်လေဘဲ ထွက်လေဘဲလို့သိတဲ့စိတ်က(နာမ်တရားပါဘုရား)။ ဝင်လေထိတာရုပ်၊ သိတာကနာမ်။ထွက်လေထိတာရုပ်၊ သိတာနာမ်။ အဲဒါယောဂီသိရန်အခြေခံရုပ်နဲ့နာမ်နော်။ ထိ-သိ=ရုပ်နာမ်အရှုခံ အမှန်သိအောင်ကြည့်။ အရှုခံရုပ်နာမ် နှာသီးဖျားတစ်နေရာထဲက တွေ့ပြီဆိုတော့ ဉာဏ်နဲ့ကြည့်ရင် အရှုခံရုပ်နာမ်က မြဲတာတွေ့မှာလား၊ မမြဲတာတွေ့မှာလား (မမြဲတာတွေ့ရမှာပါဘုရား)။ မမြဲတာက အနိစ္စ၊ သိတဲ့ဉာဏ်က မဂ္ဂဆိုရင် ခန္ဓာအရှိဉာဏ်အသိနဲ့ မကိုက်ညီဘူးလား (ကိုက်ညီပါတယ်ဘုရား)။ ကိုက်ညီရင် ယထာဘူတံ ပဇာနာတိဖြစ်မယ် ဝိပဿနာဉာဏ်ရမယ်။
လက်တွေ့ရှုတဲ့အခါမှာ ဝင်လေတစ်ချက်-ထိ+သိ+ပျက်၊ ထွက်လေတစ်ချက်-ထိ+သိ+ပျက်။ အဲဒါသုံးချက်ကိုက်ပြီဆိုရင် ထိတဲ့သဘောကရုပ်တရား၊ သိတဲ့သဘောကနာမ်တရား၊ ပျက်သွားတဲ့သဘောကအနိစ္စတရားလို့ ဝင်လေထွက်လေတစ်ချက်မှာ ထိတာရယ်+သိတာရယ်+ပျက်တာရယ် သုံးချက်နော်။ ဝင်လေထိသိပျက်ကတစ်စုံ၊ ထွက်လေထိသိပျက်ကတစ်စုံကိုညီအောင် စောင့်ကြည့်ရမယ်တဲ့။ စောင့် တာကသတိဆိုတော့ သမာဓိမဂ္ဂင်သုံးပါးနော်။ ကြည့် တာကပညာဆိုတော့ ပညာမဂ္ဂင်နှစ်ပါး။ စောင့်ကြည့်ရင် ပွားများမဂ္ဂင်ငါးပါး ‌ရှေ့ပြေးဝိပဿနာမဂ်လို့ ခေါ်ပါတယ်။ ဝိပဿနာဉာဏ်ရှေ့သွားရှိမှ မဂ်ဉာဏ်က နောက်မှပေါ်မှာပါ၊ ဝိပဿနာဉာဏ်ရင့်သန်လို့ ဝိပဿနာကျေးဇူးကြောင့် မဂ်ဉာဏ်ဖြစ်ပေါ်လာပုံကို မြတ်စွာဘုရားက-ဥဂ္ဂစ္ဆတိယ ထာဒိစ္စော ပုရေက္ခိတွာ ရုဏံတထာ၊ ဝိပဿနံ ပုရေက္ခိတွာ မဂ္ဂဓမ္မော ပဝတ္တတိ။ အဓိပ္ပါယ်က နံနက်အရုဏ်တက်အနီရောင်သန်းလာပြီးမှ နေမင်းရဲ့အလင်းရောင်ထွက်ပေါ်လာသကဲ့သို့ အရှုခံရုပ်နာမ်ရဲ့ အနိစ္စမြင်တဲ့ ဝိပဿနာဉာဏ် အရင်ဖြစ်ပေါ်လာမှ မဂ်ဉာဏ်ရနိုင်တယ်ဆိုတော့ ဦးဇင်းတို့ယောဂီများက မဂ်ဉာဏ်ရအောင်အရင်ဆုံးကြိုးစားရမှာလား၊ ဝိပဿနာဉာဏ်ရအောင်အရင်ကြိုးစားရမှာလား(ဝိပဿနာဉာဏ်ရအောင်အရင်အားထုတ်ရမှာပါဘုရား)။ ဒါ သေချာမှတ်ထားပါ။ အစဉ်ကျော်လို့ မရဘူးဗျာ၊ ဝိပဿနာဉာဏ်ရင့်သန်လာရင် ဘာဉာဏ်ရမယ်(မဂ်ဉာဏ်ရမှာပါဘုရား)။ အရုဏ်တက်နေထွက်သလို ဝိပဿနာဉာဏ်နဲ့ ရုပ်နာမ်ပေါ်တိုင်း ဖြစ်ပျက်မဂ် ဖြစ်ပျက်မဂ်ကိုက်အောင် ရှုမှတ်ပွားများနေရမှာ တစ်ကြိမ်တစ်လေလား၊ အကြိမ်ကြိမ်ပွားများအားထုတ်ရမှာလား(အကြိမ်ကြိမ်ပွားများအားထုတ်ရမှာပါဘုရား)။ လင်္ကာဆောင်ပုဒ်က ဝိပဿနာ လေ့လာကြိမ်ဖန်တဲ့။ နှာသီးဖျားသတိထားကြည့်၊ ဒါ အခြေခံကစပြောပေးနေတယ်။ လက်တွေ့အားထုတ်တတ်အောင်လို့ပါ။ ထိတဲ့သဘောကို သေချာစိုက်ကြည့်၊ တွန်းကန်တဲ့သဘော၊ လှုပ်ရှားတဲ့သဘော၊ တိုးထိတဲ့သဘောတရား မသိနိုင်ဘူးလား(သိနိုင်ပါတယ်ဘုရား)။သဘောတရားသိမှ တရားသဘောကိုသိနိုင်မှာနော်။(ဆက်ရန်)
#နန်းခမ်း။

11/11/2023

#ယောဂီသိရန်အခြေခံ(၂၇)။ ။လွန်လေပြီးသောအတိတ်ကာလတုန်းက အတိတ်အကြောင်းခြင်းရာ သမုဒယသစ္စာ၊ ဆင်းရဲဖြစ်ကြောင်း တရားတွေကြောင့် ယခုပစ္စုပ္ပန်ကာလ၊ ပစ္စုပ္ပန်အကျိုးအခြင်းရာငါးပါးရတာတခြားလား၊ ခန္ဓာငါးပါးရတာလား(ခန္ဓာငါးပါးရတာပါဘုရား) ခန္ဓာရတော့ ဘာသစ္စာရတာလဲ(ဒုက္ခသစ္စာပါဘုရား) ဝိညာဏ်ဆိုတာ ရှေ့ပိုင်းကပဋိသန္ဓေဝိညာဏ်နဲ့ ပဝတ္တိဝိညာဏ်နှစ်မျိုးထဲက ပဝတ္တိဝိညာဏ်ဆိုတာ အာရုံနဲ့ဒွါရတိုက်လို့ ပေါ်ခြင်းပြောခဲ့ပြီ။ ယခု ပဋိသန္ဓေဝိညာဏ်ဆိုတာ မိခင်ရဲ့ဝမ်းထဲ ကျဉ်းကျဉ်းကြပ်ကြပ် နေရတာ၊ မလှုပ်နိုင်မဆန့်နိုင် မိခင်ရဲ့အစာဟောင်းအိမ်အောက်ကထား၊ အစာသစ်အိမ်ကဦးခေါင်းပေါ်မှာ သွေးသလိပ်ပြီစော်နံလို့ ကိုးလကျော်နေရတာ ချမ်းသာတာလား ဆင်းရဲတာလား(ဆင်းရဲတာပါဘုရား) ဇာတိပိဒုက္ခာဆိုတာ ပိသန္ဓေဝိညာဏ်ကစခဲ့ရတဲ့ဒုက္ခ၊ မွေးဖွားပြီးတော့လည်းဒုက္ခ။ အိုရ နာရ သေရတာလည်း ဘာသစ္စာတဲ့လဲ (ဒုက္ခသစ္စာပါဘုရား) အဲဒါ နှစ်အကွက်ထဲက ပစ္စုပ္ပန်အကျိုးခြင်းရာငါးပါး၊ ဝိပဿနာရှုရမဲ့ ခန္ဓာငါးပါး၊ အပ္ပမာဒတရား လက်ကိုင်ထားလို့ ကြိုးစားအားထုတ်ဖို့ မြတ်စွာဘုရား ဟောကြားတော်မူတဲ့အတိုင်း၊ ကျေးဇူးတော်ရှင် မိုးကုတ်ဆရာတော်ကြီး သင်ပြသည့်နည်းအတိုင်း ကာယာနုပဿနာရှုပုံပြောရအောင်-တရားထိုင်တဲ့အခါမှာ ခန္ဓာကိုယ်အချိုးကျ စနစ်တကျဖြစ်မှ သွေးကြောလေကြောမပိတ်မိဘဲ ဖိညှပ်မထားစေရန် မဟာသတိပဌာန်လာသည့်အတိုင်း-နိသီဒတိ ပလင်္သ အာဘုဇိတွာ ဥဇုံကာယံ ပဏိဓါယ-ဆိုတဲ့အတိုင်း ခန္ဓာကိုယ် ခါး ဖြောင့်ဖြောင့် ခေါင်းမတ်မတ်ထားပါ။ အဝတ်အစား လျော့လျော့ထား၊ တင်းကြပ်မနေရ။ စိတ်ကိုလည်း ချုပ်တီးအောင့်အီးမထားဘဲ အသက်မှန်မှန်လေးရှုပါ။ စနစ်တကျဖြစ်အောင် ဆရာသမားများရဲ့ လင်္ကာဆောင်ပုဒ်က- တင်ပလ္လင်ခွေကာ ထိုင်နေပါ ခါးမှာဖြောင့်ဖြောင့်ထား ဘယ်လက်ပေါ်တွင် ညာလက်တင် ခေါင်းတွင်မတ်မတ်ထား မျက်စိမှိတ်ကာ ကိုယ်ဖြောင့်ပါ ပိတ်ပါပါးစပ်ဖျား ဝင်လေ ထွက်လေ ရှုမှတ်နေ စိတ်တွေမလွင့်ပါး ထိုင်တဲ့ခါများ စိတ်တရား နှာသီးဖျားမှာထား။
လင်္ကာဆောင်ပုဒ်အတိုင်း ခန္ဓာကိုယ်အဆင်သင့် ပြင်ထားကြပါ။ မိမိစိတ်ကို နှာသီးဖျားပို့ကာ သတိမြဲမြဲကပ်ထားလိုက်၊ လေကို ကိုယ့်သဘောနဲ့ အားစိုက်မရှူမရှိုက်နဲ့၊ စိတ်ကိုချုပ်မထားနဲ့၊ ပုံမှန်လေးထားပါ။ လေကိုရှူချင်တဲ့စိတ်ဖြစ်လာမှ အလိုက်သင့်ပုံမှန်ရှူပေး။ နှာသီးဖျားမှာတိုးထိတာကိုသိလိုက်၊ လေထုတ်တဲ့အခါမှာလည်းအလိုက်သင့်ရှိုက်ထုတ်ပေးလိုက်၊ ထွက်လေနှာသီးဖျားထိသွားတာကို သိပေးလိုက်ပါ။ ဝင်လေသိ၊ ထွက်လေသိ၊ ဝင်လေတစ်ချက်၊ အသိတစ်ချက်+ထွက်လေတစ်ချက်၊ အသိတစ်ချက်။ ထိတာနဲ့သိတာနဲ့ကိုက်အောင် တည့်အောင်ရှုမှတ်ပွားများအားထုတ်နေရင် သမာဓိတရားရနိုင်ပါတယ်။ ဘုရားရှင်က-သမာဓိံ ဘိက္ခဝေ ဘာဝေထ တဲ့။ ရှေးဦးစွာ သမာဓိရအောင် ပွားများအားထုတ်ကြဆိုသည့်အတိုင်း အာနာပါနကမ္မဌာန်းကို မိုးကုတ်ဆရာတော်ကြီးက အဿာသ ပဿာသခေါ်တဲ့ ဝင်လေ ထွက်လေလို့ မြန်မာလိုရှုတတ်မှတ်တတ်အောင် သင်ပြသည့်အတိုင်း ဦးဇင်းတို့ယောဂီများက ဝင်လေတစ်ချက်ထိတာရယ် သိတာရရယ်၊ ထွက်လေတစ်ချက်ထိတာရယ် သိတာရယ်၊ ပိုင်ပိုင်နိုင်နိုင် ရှုမှတ်နေရင် သမာဓိတရားရပြီပေါ့။ သမာဟိတော ယထာဘူတံ ပဇာနာတိ ဆိုသည့်အတိုင်း သမာဓိအားကောင်းလာရင် အရှုခံရုပ်နာမ်ရဲ့အပေါ် ဟုတ်တိုင်းမှန်စွာသိမြင်တဲ့ ပညာဉာဏ်ရနိုင်တယ်တဲ့။(ဆက်ရန်)
#နန်းခမ်း။

01/11/2023

#ယောဂီသိရန်အခြေခံ(၂၆)။ ။ကာလသုံးဖြာပြီးတော့ နောက်ဆုံးအသွယ် ရှစ်သွယ်မြောက်ကဘာလဲ (ခြင်းရာနှစ်ဆယ်ပါဘုရား) နံပါတ်တစ်အကွက်ထဲမှာ ဘာခြင်းရာတွေလဲပြောပြပါ (အတိတ်အကြောင်းအခြင်းရာငါးပါး=အဝိဇ္ဇာ၊ သင်္ခါရ၊ တဏှာ၊ ဥပါဒါန်၊ဘဝ၊ ပါဘုရား) အဝိဇ္ဇာက မသိတာ၊ သင်္ခါရဆိုတာ ပြုလုပ်တာ၊ တဏှာဆိုတာ ခင်မင်တာ၊ ဥပါဒါန်ဆိုတာ စွဲလမ်းတာ၊ ကမ္မဘဝဆိုတာ အသစ်တဖန်ပြုလုပ်တာဆိုတော့ ဘာအလွှာလည်း (အတိတ်အကြောင်းတလွှာပါဘုရား) ဘာသစ္စာခေါ်တယ်(သမုဒယသစ္စာပါဘုရား) ကာလအားဖြင့် လွန်လေပြီးသော အတိတ်ကာလတုန်းက ဆင်းရဲဖြစ်ကြောင်းတရားတွေကို ကြိုးစားအားထုတ်ခဲ့လို့ နံပါတ်နှစ်အကွက်ထဲမှာ ဘာခြင်းတွေပေါ် (ပစ္စုပ္ပန်အကျိုးအခြင်းအရာငါးပါးပေါ်ပါတယ်ဘုရား) ဘာတွေများပါလိမ့် (ဝိဉာဏ်၊ နာမ်ရုပ်၊ သဠာယတန၊ဖဿ၊ ဝေဒနာ၊ ပါဘုရား) သစ္စာအားဖြင့်ဘာခေါ် (ဒုက္ခသစ္စာခေါ်ပါတယ်ဘုရား) ဘာသစ္စာကြောင့် ဘာသစ္စာရတယ် (သမုဒယသစ္စာကြောင့် ဒုက္ခသစ္စာရပါတယ်ဘုရား) အဲဒါသစ္စာနှစ်ခုနဲ့ သံသရာလည်ပုံ စက်ဝိုင်းထဲမှာ သစ္စာနှစ်ပါးထဲရှိတာ၊ မြတ်စွာဘုရားဟောကြားခဲ့တာက သစ္စာဘယ်နှစ်ပါးလဲ (သစ္စာလေးပါးပါဘုရား) တချို့ကပြောကြတယ်။ သူတို့မိုးကုတ်တရားက ဘုရားဟောစာပေနဲ့မညီဘူးတဲ့၊ သရုပ်ပြစက်ဝိုင်းထဲမှာ သစ္စာနှစ်ပါးဘဲပါတယ်၊ သစ္စာလေးပါးမပြည့်ဘူးတဲ့။ မသိနားမလည်သူတွေရဲ့ပြောစကား ဒို့ယောဂီများ နားမယောင်ကြပါနဲ့။ သံသရာလည်တဲ့သစ္စာကနှစ်ပါးထဲမို့ စက်ဝိုင်းကနှစ်ပါးနဲ့လည်ပုံ ပြသထားတာပါ။ သံသရာလွတ်ကြောင်းသစ္စာက လေးပါးပြည့်မှ အရိယသစ္စာတဲ့။ ဒုက္ခသစ္စာ ပရိညာကိစ္စ ပိုင်းခြားသိရမယ်တဲ့။ သမုဒယသစ္စာ ပဟာတဗ္ဗကိစ္စ ပယ်သတ်ရမဲ့ကိစ္စပါ။ နိရောဓသစ္စာ သစ္ဆိကာတဗ္ဗကိစ္စ မျက်မှောက်ပြုဆိုက်ရောက်ရမဲ့ကိစ္စ၊ မဂ္ဂသစ္စာ ဘာဝေတဗ္ဗကိစ္စ ပွားများအားထုတ်ရမဲ့ကိစ္စရယ်လို့ မြတ်စွာဘုရားရှင်က ပိုင်းခြားမဟောကြားခဲ့ဘူးလား (ဟောကြားခဲ့ပါတယ်ဘုရား) အရှုခံခန္ဓာ ဒုက္ခသစ္စာကို ပိုင်းခြားသိဖို့ ဘာသစ္စာပွားရမယ် (မဂ္ဂသစ္စာပွားရမှာပါဘုရား) သမုဒယသစ္စာ ပယ်သတ်နိုင်ဖို့ ဘာသစ္စာပွားရမှာလဲ (မဂ္ဂသစ္စာပွားရမှာပါဘုရား) ဆီမီးဥပမာလေးသစ္စာတဲ့။ ဥပမာ- ဆီမီးထွန်းလိုက်တဲ့အခါမှာ အမှောင်ပျောက်သွားစေတာလည်း မီးတောက်ဘဲ၊ အလင်းရောက်စေတာလည်း မီးတောက်ကြောင့်ပါဘဲ၊ မီးစာကိုလောင်နေတာလည်း(မီးတောက်ပါဘုရား) ဆီကိုခမ်းစေတာလည်း(မီးတောက်ကြောင့်ပါဘုရား) မီးတောက်တစ်ခုတည်းနဲ့ အမှောင်ပျောက် အလင်းရောက် မီးစာကုန်ဆီခမ်းသလို မဂ္ဂသစ္စာ တစ်ခုပွားများကြိုးစားအားထုတ်လိုက်ရင် သစ္စာလေးပါး မဆိုက်ဘူးလား(ဆိုက်ပါတယ်ဘုရား) ပွားမဂ္ဂသစ္စာ၊ သိဒုက္ခသစ္စာ၊ ပယ်သမုဒယသစ္စာ၊ ဆိုက်နိရောဓသစ္စာရယ်လို့ လေးပါးသော သစ္စာတရားကို အတိုကောက်လေး အားလုံးလိုက်ဆိုပါ။ ပွား သိ ပယ် ဆိုက် ကျင့်စဉ်ကိုက် အမြိုက်နိဗ္ဗာန်ဝင်။ နောက်တစ်မျိုးက သမုဒယသစ္စာနဲ့ဒုက္ခသစ္စာနှစ်ပါးက သံသရာဝဋ်လည်တဲ့သစ္စာမို့ ဝဋသစ္စာ ဝဋ်လည်တဲ့သစ္စာကနှစ်ပါးနော်၊ နိရောဓသစ္စာနဲ့ မဂ္ဂသစ္စာနှစ်ပါးက သံသရာဝဋ်ဒုက္ခမှ လွတ်မြောက်တဲ့သစ္စာမို့ ဝိဝဋသစ္စာနှစ်ပါးက ဝဋ်ွကျွတ်တဲ့သစ္စာ၊ အဲဒီလို ပိုင်းခြားမှတ်ထားပါ။ ဝဋ်လည်တဲ့ သမုဒယသစ္စာနှစ်ပါးကို ဟီနသစ္စာ (ယုတ်ညံ့တဲ့သစ္စာနှစ်ပါး)၊ နိရောဓမဂ္ဂနှစ်ပါးကို ပဏီတသစ္စာ(မြင့်မြတ်တဲ့သစ္စာနှစ်ပါး)တဲ့။အဲဒီလို သစ္စာလေးပါး မြတ်တရား နိဗ္ဗာန်ရောက်ကြောင်း အကျင့်ကောင်းလို့ ပိုင်းခြားနားမလည်၊ မသိတဲ့သူတစ်ချို့လူတွေရဲ့စကား၊ မိုးကုတ်မှားတယ်လို့ စော်ကားပြစ်မှားတာတွေ ဦးဇင်းတို့ယောဂီများ နဲနဲမှမယုံလိုက်ပါနဲ့နော်၊ ရှေ့ဆက်ကြဆို့ ......
#နန်းခမ်း။

18/10/2023

#ယောဂီသိရန်အခြေခံ(၂၅)။ ။အရင်းခံမူလတရားနှစ်ပါး အဓိကကျပုံ၊ ဘုရားလက်ထက်တော်က တောဒေယသူဌေးကြီး သူ့ရဲ့ပစ္စည်းဥစ္စာတွေကို ခင်မင်တဲ့တဏှာနဲ့ ပစ္စည်းတွေကိုခင်ပြီးသေတော့ ခွေးဘဝတိရစ္ဆာန် မဖြစ်ရဘူးလား(ဖြစ်ရပါတယ်ဘုရား) သူဌေးကြီးက သူ့ရဲ့ကုဋေများစွာရှိတဲ့ ပစ္စည်းတွေ မသုံးရက်မစားရက်၊ မလှူမပေးဘဲ ခင်မင်တဲ့တဏှာ ပစ္စည်းကိုစွဲလမ်းသေတာနော်။ လောဘကိလေသာဖြစ်မှန်းမသိတဲ့တွေဝေခြင်း အဝိဇ္ဇာမောဟနဲ့သေ တိရစ္ဆာန်ပြည်ဆိုတဲ့အတိုင်း ခွေးတိရစ္ဆာန်ဖြစ်ရတဲ့ ခန္ဓာဖြစ်စဉ်သည် အဝိဇ္ဇာနဲ့တဏှာ မူလနှစ်ဖြာအရင်းခံ ဥပါဒါန်ကံကြောင့် ခွေးရုပ်နာမ်ရုပ်မပေါ်ဘူးလား(ပေါ်ပါတယ်ဘုရား) ဦးဇင်းတို့ယောဂီများ အခုဘာရုပ်နာမ်ပေါ်နေသလဲ(လူရုပ်လူနာမ်ပေါ်နေပါတယ်ဘုရား) အဲဒီ ပစ္စုပ္ပန်ကာလပေါ်တဲ့ အရှုခံရုပ်နာမ်ကို ရှုဉာဏ်ပွား မဂ္ဂင်ငါးပါးနဲ့ကြည့်ရင် အရှုခံရုပ်နာမ်က ဖြစ်ပြီးပျက်၊ ရှုတဲ့ဉာဏ်ကမဂ်၊ တဏှာဥပါဒါန်တွေသေသွားတာက(သမုဒယသစ္စာပါဘုရား) အရှုခံရုပ်နာမ်ခန္ဓာတွေက အကြောင်းတရားကပြုပြင်ပေးလို့ဖြစ်ပေါ်တာမို့ သင်္ခါရတရားတဲ့။ ပျက်စီးသွားလို့ အနိစ္စတရားတဲ့၊ မိုးကုတ်ဆရာတော်ကြီးက နားမလည်, လည်အောင်၊ မရှုတတ်, ရှုတတ်အောင် သင်ပြ၊ဟောပြခဲ့ခဲ့တာက သင်္ခါရကဖြစ်တယ်၊ အနိစ္စကပျက်တယ်တဲ့။ ဒါကြောင့် သင်္ခါရတရား အနိစ္စမှာ လမ်းဆုံးတယ်လို့ ဉာဏ်နဲ့မြင်အောင်ကြည့်လို့ မဟောခဲ့ဘူးလား(ဟောခဲ့ပါတယ်ဘုရား) ရုပ်တရားနာမ်တရားဖြစ်ပေါ်တာက(သင်္ခါရတရားပါဘုရား) ပျက်သွားတာက(အနိစ္စတရားပါဘုရား) ဘာနဲ့မြင်အောင်ကြည့်ရမယ်(ဉာဏ်နဲ့မြင်အောင်ကြည့်ရမှာပါဘုရား) ဖြစ်ပေါ်တာကသင်္ခါရ၊ပျက်စီးတာကအနိစ္စ၊သိတဲ့ဉာဏ်ကမဂ္ဂတဲ့။အဲဒါမိုးကုတ်ဆရာတော်ကြီးက လင်္ကာဆောင်ပုဒ်ထုတ်ထားပုံ၊ ဖြစ်ပျက်သမျှ သင်္ခါရ၊ ဒုက္ခသစ္စာမှတ်တဲ့၊ သစ္စာတရားတွေကို ဦးဇင်းတို့ ဒကာ ဒကာမတွေ နားလည်အောင် သင်ပြဟောပြခဲ့တာနော်။ မြတ်စွာဘုရားက အနိစ္စဝတ သင်္ခါရာလို့ ပါဠိတော်နဲ့ဟောခဲ့သည်နှင့်အညီ ဆရာတော်ကြီးက မြန်မာပြန် ဟောပြခဲ့တာက -
အနိစ္စာဝတ သင်္ခါရာ-ဖြစ်ပြီးပျက်တဲ့ခန္ဓာပါဘုရား၊
ဥပ္ပါဒဝယ ဓမ္မိနော - ပေါပြီးပျောက်တဲ့ခန္ဓာပါဘုရား၊
ဥပ္ပဇ္ဇိတွာ နိရုဇ္စုန္တိ - မွေးပြီးသေတဲ့ခန္ဓာပါဘုရား၊
တေသံ ဝူပသမော သုခေါ-တေသံ(ထိုဖြစ်ပျက်ပေါ်ပျောက် မွေးသေနေတဲ့ အသုဘခန္ဓာ ဒုက္ခသစ္စာတို့၏)၊ ဝူပသမော - ကင်းလွတ်ရာမှန် မြတ်နိဗ္ဗာန်သည်၊ သုခေါ-ချမ်းသာအစစ်ဖြစ်၏။လင်္ကာဆောင်ပုဒ်ထုတ်ထားတာဆိုကြည့်ရအောင်-ဖြစ်ပျက်သမျှ သင်္ခါရ ဒုက္ခသစ္စာမှတ်၊ ဖြစ်ပျက်မှုတွင် ငါကောင်ထင် ခင်မင်သမုဒယမှတ်၊ရုပ်နာမ်အားလုံး ဖြစ်ပျက်သုဉ်း ချုပ်ဆုံးနိဗ္ဗာန်မှတ်၊ ချုပ်ဆုံးမှုတွင် ဉာဏ်သက်ဝင် သိမြင်မဂ်ဟုမှတ်။ ဒီလိုသစ္စာဆိုက်တော့ ကာလသုံးပါးမှလွတ်တဲ့နိဗ္ဗာန် ကာလဝိမုတ်နိဗ္ဗာန် အသင်္ခတနိဗ္ဗာန်ရောက်အောင် အလကားနေရမှာလား၊ မဂ္ဂင်အကျင့် ပွားများအားထုတ်ရမှာလား(မဂ္ဂင်အကျင့်အားထုတ်ရမှာပါဘုရား)။(ဆက်ရန်)
#နန်းခမ်း။

11/10/2023

#ယောဂီသိရန်အခြေခံ(၂၄)။ ။ဦးဇင်းတို့ရဲ့ ရုပ်နာမ်ခန္ဓာဖြစ်စဉ် ခန္ဓာဉာဏ်ရောက် သဘောပေါက်အောင်လို့ အကြောင်းအကျိုးခွဲပြ ဒိဠိဖြုတ်ပုံ၊ ရှုခံနဲ့ရှုဉာဏ်တွဲပြပုံတွေကို သဘောပေါက်ဉာဏ်ထဲရှင်းကြရဲ့လား(ရှင်းပါတယ်ဘုရား)ရုပ်နာမ်ဖြစ်ကြောင်း အဝိဇ္ဇာ၊ တဏှာ၊ ဥပါဒါန်၊ကံဆိုတဲ့ အကြောင်းတရားလေးပါးက ဘာသစ္စာလဲ(ဒုက္ခသစ္စာပါဘုရား)သဘောမပေါက်မှာဆိုးလို့ ဥပမာနောက်တစ်မျိုးပေးထားပါတယ်။ အပင်မှမျိုး မျိုးမှအပင်တဲ့၊ မျိုးစေ့စိုက်လိုက် အပင်ပေါက်လိုက်၊ အပင်ကမျိုးစေ့သီးလိုက် အမျှင်မပျက်ဆက်စပ်နေတဲ့သဘောကို ဥပမာ-သရက်ပင်က သရက်သီးသီးတယ်။ သရက်စေ့စိုက်တော့ သရက်ပင်ပြန်ပေါက်တယ်။သရက်သီးပြန်သီးတယ်။ အမျှင်ပြတ်သေးရဲ့လား(မပြတ်ပါဘုရား) အဲဒါသဘောပေါက်အောင်လို့ နောက်တဆင့်ထပ်ဆင့်ပြောတာက ကံကြောင့်နာမ်ရုပ်၊ နာမ်ရုပ်ကြောင့်ကံတဲ့၊ ဆိုထားပုံက ကံကြောင့်ဆိုတာက ပဋိစ္စ အကြောင်းတရားပါ၊ နာမ်ရုပ်ဆိုတာက သမုပါဒ်နော်၊ နောက်တစ်ခါကျတော့ နာမ်ရုပ်ကြောင့်ကံဆိုတာက နာမ်ရုပ်က အကြောင်းတရားပါ။ ဒီနေရာလေးသေချာနားထောင်ပါ။ဉာဏ်ဖွင့်ထားပါ။နာမ်ရုပ် ဒုက္ခသစ္စာအကျိုးတရားကို ဘာကြောင့် အကြောင်းတရား ပြောရသလဲဆိုရင် နာမ်ရုပ်ရှိမှ ကံဆိုတဲ့အမှုပြုလုပ်နိုင်တာပါ။ ကာယကံ၊ဝစီကံပြုလုပ်မှု ရုပ်တရားကပြုတယ်၊ မနောကံကို နာမ်တရားကပြုလုပ်လို့ ကံကြောင့်လည်းရုပ်နာမ်ဖြစ်တယ်၊ရုပ်နာမ်ကြောင့်လည်း ကံတွေပြုလုပ်တယ်။ အဲဒီလို ရှင်းရှင်းလင်းလင်း သဘောပေါက်နားလည်ပြီဆိုရင် ဟောဒီရုပ်နာမ်ခန္ဓာကြီး သူ့ကြောင့် ငါ့ကြောင့်ဖြစ်လာရတဲ့ခန္ဓာမဟုတ်ကြောင်း သိလွယ်အောင် ဗြဟ္မာ သိကြား ထာဝရဘုရားကြောင့်ရတဲ့ခန္ဓာမဟုတ်၊ အကြောင်းကြောင့်အကျိုးဖြစ်တဲ့ခန္ဓာလို့ ခန္ဓာဉာဏ်ရောက် သဘောပေါက်အောင် လင်္ကာဆောင်ပုဒ်က ရှင်းအောင်ပြမထားဘူးလား(ရှင်းပြထားပါတယ်ဘုရား) ဆက်ရန်။
#နန်းခမ်း။

02/10/2023

#ယောဂီသိရန်အခြေခံ(၂၃)။ ။ယောဂီများ မြင်စိတ်ခန္ဓာငါးပါး ကြားစိတ်ခန္ဓာငါးပါး ဖြစ်ပေါ်ပုံပြောမယ်။အားလုံးလိုက်ဆိုကြပါ။ကြားတယ် ခံစားတယ်၊မှတ်သားပြုပြင်တယ်၊ နောက် နံစိတ်မှာလည်း နံဆဲ မွှေးဆဲ ပစ္စုပ္ပန်ကာလပေါ်တဲ့ခန္ဓာငါးပါးပြောရအောင်။နံတယ် ခံစားတယ်၊ မှတ်သားပြုပြင်တယ်။ စားတယ်၊ခံစားတယ်၊ မှတ်သားပြုပြင်တယ်။ ကိုယ်နဲ့တွေ့ထိစရာနဲ့ထိတွေ့မိတော့ ထိတယ်၊ခံစားတယ်၊မှတ်သားပြုပြင်တယ်။ တွေးတယ်၊ခံစားတယ်၊မှတ်သားပြုပြင်တယ်ဆိုတော့ကို ခန္ဓာတွေ ပစ္စုပ္ပန်ကာလ အရှုခံတရားတွေ တစ်မျိုးထဲလား၊ အမျိုးမျိုးပေါ်မှာလား (အရှုခံခန္ဓာတွေ အမျိုးမျိုး ပေါ်မှာပါဘုရား) ခြေက်အာရုံ ခြောက်တံခါးမှာ ခန္ဓာငါးပါးစီဖြစ်ပေါ်လို့မို့ သင်္ချာအားဖြင့်တွက်ကြည့် ခြေက်ငါးလီ=သုံးဆယ် ဆိုတာက ခန္ဓာအပါး(၃၀)ပေါ့။ အဲဒါသင်္ချာနော်၊ ပညာနဲ့ကြည့်တော့ ဖြစ်ပေါ်တာနဲ့ ပျက်စီးတာ တခြားလား၊ အနိစ္စလား(အနိစ္စပါဘုရား) ဒို့ခန္ဓာကအနိစ္စရှိလို့ အနိစ္စသိရင် ကာလရဲ့စားဖတ်ဝါးဖတ် ဖြစ်နိုင်ပါ့မလား(မဖြစ်နိုင်ပါဘုရား)မိုးကုတ်ဆရာတော်ကြီးက ခန္ဓာရနေတဲ့ သတ္တဝါအားလုံး ကာလဝါးစားလို့ အိုရ နာရ သေရတာတဲ့။ ဟုတ်ပါတယ်။ ဦးဇင်းတို့တစ်တွေ နံနက်ကာလ၊ညကာလအချိန်နာရီမှ နေ့ရက်လတွေ ကြာညောင်းလာတော့ အို နာ သေ ဒုက္ခ တွေရနေတာ ကာလရဲ့စားဖတ်ဝါးဖတ် ဖြစ်နေရာမှ လွတ်မြောက်အောင် ဝိပဿနာမဂ္ဂင်အကျင့်မှတပါး တခြားရှိရဲ့လား(မရှိပါဘုရား)။
ဝိပဿနာအရှုခံ ခန္ဓာငါးပါးကို အကျဉ်းချုံးပြောတော့ ရုပ်နာမ်နှစ်ပါးနော်၊ ဒီရုပ် ဒီနာမ် ဒီခန္ဓာကြီး သိကြား ဗြဟ္မာ သူငါကြောင့် ရတာလား၊ အကြောင်းတရားကြောင့် အကျိုးတရား ရတာလား(အကြောင်းကြောင့် အကျိုးရတဲ့ရုပ်နာမ်ပါဘုရား) နာမ်ရုပ်ဖြစ်ကြောင်းလေးပါးရှိပါတယ်။ ဦးဇင်းတို့ယောဂီများ သဘောပေါက်စေရန် မိုးကုတ်ဆရာတော်ကြီးက လင်္ကာဆောင်ပုဒ်နဲ့ ဟောခဲ့ပုံက အဝိဇ္ဇာနဲ့တဏှာအရင်းခံတဲ့ အရင်းခံထားတာကို သေချာစဉ်းစားပါ။အဓိကမူလနှစ်ဖြာကို အရင်းခံထားတာနော်။ အဝိဇ္ဇာနဲ့တဏှာအရင်းခံ ဥပါဒါန်ကံကြောင့်ဆိုတာ အကြောင်းတရား ပဋိစ္စနော်၊ ရုပ်နာမ်ပေါ်တာက အကျိုးတရား သမုပ္ပါဒ်ဆိုတော့( ပဋိစ္စနဲ့သမုပ္ပါဒ်၊ အကြောင်းတရားနဲ့အကျိုးတရား၊ ရုပ်တရားနဲ့နာမ်တရားပါဘုရား) အဲဒါ ခန္ဓာပဋိစ္စသမုပ္ပါဒ်အစစ် ပစ္စုပ္ပန်ကာလရုပ်နာမ်နော်။ အကြောင်းအကျိုးဉာဏ်နဲ့ဆင်ခြင်ဘို့ လင်္ကာဆောင်ပုဒ်ကို ညီညီညာညာ ဆိုလိုက်ပါ။ အဝိဇ္ဇာနဲ့တဏှာအရင်းခံ ဥပါဒါန်ကံကြောင့် ရုပ်နာမ်ပေါ်၊ အပင်မှမျိုး မျိုးမှအပင် အမျှင်မပြတ် ဆက်စပ်သည့်ဟန်၊ ကံကြောင့်နာမ်ရုပ် နာမ်ရုပ်ကြောင့်ကံ၊ အဖန်ဖန် ဖြစ်ပြန်သည့်လျော် ဗြဟ္မာ သိကြား စသည်များက ထင်ရှားပြုပြင် စီရင်ဖန်ဆင်း အကြောင်းရင်းကြောင့် လူနတ်များစွာ သတ္တဝါတို့ ဖြစ်လာရမှု မဟုတ်ဟု ဉာဏ်ဖြင့်ရှု၍မျှော်.....(ဆက်ရန်)
#နန်းခမ်း

19/09/2023

#ယောဂီသိရန်အခြေခံ(၂၂)။ ။ဝိပဿနာလက်တွေ့ရှုမယ်ဆိုရင် အတိတ်ကာလခန္ဓာပြီးခဲ့လို့ ယခု ဝိပဿနာရှုလို့မရပါဘူး။ အနာဂါတ်မှာဖြစ်ပေါ်မဲ့ရုပ်နာမ်ခန္ဓာလည်း မရောက်သေးလို့ ဝိပဿနာရှုလို့မရပါဘူး။ ဝိပဿနာရှုရမဲ့ခန္ဓာကဘယ်ကာလ(ယခုဖြစ်ဆဲပစ္စုပ္ပန်ကာလခန္ဓာရှုရမှာပါဘုရား) ဒါကြောင့်-ပစ္စုပ္ပန္နဥ္စ ယောဓမ္မံ တတ္ထ တတ္ထ ဝိပဿတိ၊ အသံဟီရံ အသံကုပ္ပံ တံ ဝိဒ္ဓါ မနုဗြူဟယေ။ တဲ့။ အဓိပ္ပါယ်က အတိတ်ကိုလည်းပြန်မတွေးနဲ့ပြီးခဲ့ပြီ၊ အနာဂါတ်ကိုလည်းမမျှော်နဲ့ မရောက်သေးလို့။ဖြစ်ဆဲရုပ်နာမ် ပစ္စုပ္ပန်အမှန်တည့်အောင်ရှုဆိုတဲ့အတိုင်း ပစ္စုပ္ပန်တည့်တည့်ပေါ်တဲ့ရုပ်နာမ်ဆိုတာ မျက်စိနဲ့အဆင်းတိုက်ရင် ဘာစိတ်ပေါ် (မြင်စိတ်ပေါ်ပါတယ်ဘုရား) မြင်စိတ်မှာ အရှုခံတရားငါးပါး ပစ္စုပ္ပန်မှာမတည့်လား(ပစ္စုပ္ပန်တည့်ပါတယ်ဘုရား) လက်တွေ့ပစ္စုပ္ပန်ခန္ဓာငါးပါး ပြောတော့မယ်၊ ယောဂီဒကာ ဒကာမတို့ရဲ့ မျက်စိ ဦးဇင်းလက်ထဲကိုင်ပြတဲ့ ဒေသနာခွက်နဲ့တိုက်လို့ မြင်စိတ်မပေါ်ဘူးလား(မြင်စိတ်ပေါ်ပါတယ်ဘုရား) နဂိုကမြင်နှင့်တာလား၊ ယခုပစ္စုပ္ပန်မှဖြစ်တာလား(ယခုပစ္စုပ္ပန်ဖြစ်ပေါ်တဲ့မြင်စိတ်ပါဘုရား) ယောဂီတို့ရဲ့မျက်စိနဲ့ ဒေသနာခွက်အဆင်းကရုပ်တရားမို့ ဘာခန္ဓာလဲ(ရူပက္ခန္ဓာပါဘုရား) ဖောက်ပြန်တဲ့သဘောရှိတယ်နော်။မြင်သိစိတ်က နာမ်တရားမို့ ဝိညာဏက္ခန္ဓာ၊သိတတ်သောသဘောလေးပါ၊ မြင်စိတ်ကို ဘာအရောင်လည်း၊ ဘယ်လိုပုံသဏ္ဍန်လည်း၊ ဘာခေါ်တယ်လို့ ၊မှတ်သားမိတာက(သညက္ခန္ဓာပါဘုရား) မျက်စိနဲ့အဆင်း တည့်အောင် ပြုပြင်ပေး နှလုံးသွင်းပေးတာက ဘာခန္ဓာလဲ (သင်္ခါရက္ခန္ဓာပါဘုရား) ဒါက ယခုပစ္စုပ္ပန်မှာဖြစ်ပေါ်တဲ့ အရှုခံခန္ဓာမို့ ဘာကာလပြောနေသလဲ (ယခုဖြစ်ဆဲပစ္စုပ္ပန်ခန္ဓာငါးပါးပြောနေတာပါဘုရား) ဟုတ်တယ် ဒီထက်ပိုရှင်းအောင် နားလည်အောင်ပြောဦးမယ်။မြင်တယ်၊ သိတယ်၊ ခံစားတယ်၊ မှတ်သားပြုပြင်တယ် သေချာနားထောင်နော်။ မြင်တယ်တယ်ဆိုတာ မျက်စိအကြည်ရုပ်နဲ့ အဆင်းရုပ်(ရူပက္ခန္ဓာပါ)။ သိတယ်ဆိုတာ သိတတ်သောသဘောမို့(ဝိညာဏက္ခန္ဓာပါ)။ ခံစားတာက(ဝေဒနက္ခန္ဓာပါ)။ မှတ်သားတာက(သညက္ခန္ဓာပါ)။ ပြုပြင်တာက(သင်္ခါရက္ခန္ဓာပါ)။အဲဒါတွေက ပစ္စုပ္ပန်ကာလပေါ်တဲ့ ခန္ဓာငါးပါး အရှုခံတရား ရှင်းကြရဲ့လား(ရှင်းပါတယ်ဘုရား) သဘောခန္ဓာကိုပြောနေတာပါ၊ ခန္ဓာမှာဘာရောက်ရမယ် (ဉာဏ်ရောက်ရမှာပါဘုရား) နားကတရားနာဉာဏ်က (ခန္ဓာလှည့်ရမှာပါဘုရား) ပစ္စုပ္ပန်ပေါ်တဲ့ခန္ဓာ ဘာသစ္စာလဲ(ဒုက္ခသစ္စာပါဘုရား) စက်ဆုပ်စရာ အသုံးမကျတာအမှန်ပါလို့ သစ္စာမြင်အောင်ကြည့်တဲ့ဉာဏ်က (မဂ္ဂသစ္စာပါဘုရား) ဒါကြောင့် မြင်ဆဲရုပ်နာမ် ပစ္စုပ္ပန် အမှန်မြင်အောင်ကြည့်လို့ ပြောတာက အရှုခံနဲ့ ရှုဉာဏ်နဲ့ ခန္ဓာအရှိနဲ့ဉာဏ်အသိကိုက်အောင်၊ သစ္စာလည်းဆိုက်အောင် အခြေခံတရားတွေ ပြောမပေးရဘူးလား (ပြောပေးဟောပေးပါဘုရား)။ (ဆက်ရန်)
#နန်းခမ်း

06/09/2023

#ယောဂီသိရန်အခြေခံ(၂၁)။ ။အနုလောမပါဠိတော်ထဲက အကျဉ်းချုပ်ဆွဲနှုတ်ခဲ့တာ ရှစ်သွယ်ပြည့်ဘို့ ဘယ်နှစ်သွယ်ကျန်သေးလဲ(နှစ်သွယ်ကျန်ပါသေးတယ်ဘုရား) ခုနှစ်မြောက်က ကာလသုံးဖြာတဲ့နော်၊ ပထမကာလက လွန်လေပြီးသောအတိတ်ကာလ၊ အတိတ်ဘဝတုန်းက အဝိဇ္ဇာမသိမှုက ကိလေသဝဋ်၊ သင်္ခါရ ကုသိုလ် အကုသိုလ်တွေ ပြုလုပ်တာက ကမ္မဝဋ်၊ တစ်အကွက်ထဲက ဘာအလွှာတဲ့လဲ(အတိတ်အကြောင်းတလွှာပါဘုရား) ဘာသစ္စာတဲ့လဲ(သမုဒယသစ္စာပါဘုရား) သမုဒယသစ္စာကို မြန်မာလိုပြန်လိုက်ပါ(ဆင်းရဲဖြစ်ကြောင်းအမှန်ပါဘုရား) မသိဘဲနဲ့ပြုလုပ်တယ်၊ ဘာကိုမသိတာလည်းဆိုရင် သမုဒယသစ္စာသည် ဆင်းရဲဖြစ်ကြောင်းအမှန်ပါလားလို့ သစ္စာမသိခဲ့တာက အဝိဇ္ဇာတဲ့။မိုးကုတ်ဆရာတော်ကြီးက ဥပမာစကားနဲ့ ဟောကြားခဲ့တာက အမှန်မသိမမြင်လို့ အဝိဇ္ဇာကအကန်းနဲ့တူတယ်။သင်္ခါရက လမ်းလျှောက်တာနဲ့တူတယ်။စက္ခုနှစ်ကွင်းအလင်းမရတဲ့ အကန်းလမ်းလျှောက်လို့ နှစ်အကွက်ထဲ ခန္ဓာငါးပါးရတာက ဒုက္ခချောက်ထဲကျနေတာတဲ့။ဒုက္ခချောက်ထဲကျ ခန္ဓာရလို့ အနာရောဂါမရဘူးလား(ရောဂါရပါတယ်ဘုရား) အနာရတော့ မန်းကြွဆူးထိုး အနာမျိုးနှင့် ကုရိုးဆေးမှား သုတ်လိမ်းအားကြောင့် တိုးပွားအနာ ကွဲပျက်ရှာသည် သေချာမှတ်ကြ ပဋိစ္စသမုပါဒ်တဲ့။သဘောပေါက်အောင် ဥပမာပေးဟောခဲ့တာပါ၊အကန်းဆိုတာ အဝိဇ္ဇာ၊ လမ်းလျှောက်တာက သင်္ခါရ၊ လွန်လေပြီးသောအတိတ်ကာလကြောင့်ချောက်ကျတာက ဝိဉာဏ်၊ အနာရတာက နာမ်ရုပ်ဆိုတော့ ခန္ဓာရလို့ အနာရတာပါ၊မန်းကြွဆိုတာ မျက်စိ နား နှာ ခေါင်း လျှာ ကိုယ်စိတ် သဠာယတန ခြေက်ပါးပေါ့။ အနာမန်းကြွနေချိန် ဆူးကထိုးပြန်ပြီ၊ဆူးထိုမိတဲ့သဘောကဖဿ၊ နာတယ်လို့ခံစားတာကဝေဒနာ၊အဲဒါနံပါတ်နှစ်အကွက်ထဲက ယခုဖြစ်ဆဲပစ္စုပ္ပန်ကာလနော်၊ခန္ဓာဖြစ်စဉ်နဲ့ကိုက်ညီအောင် ဆရာတော်ကြီးက ဟောထားခဲ့တာပါ။ တဏှာက ဆေးကုတယ်၊ ရောဂါပျောက်ချင်တဲ့တဏှာပေါ့၊ ဆေးမှားတာက ဥပါဒါန်၊ လိမ်းပေးတာက ကံတဲ့။သောက်ဆေးနဲ့လိမ်းဆေးမှားကုမိတာက သုံးအကွက်ထဲက ယခုဖြစ်ဆဲပစ္စုပ္ပန်ကာလသမုဒယသစ္စာကြောင့် လေးအကွက်ထဲမှာ အနာတိုးပွားတာက ဇာတိအသစ်တစ်ဖန် ခန္ဓာရောဂါအနာတိုးပွားလို့ ဇရာမရဏဆိုက် ကွဲပျက်တယ်။အနာပေါက်ကွဲတာကဇရာ၊ ပျက်စီးဆုံးရှုံးလို့ သေရတာက မရဏ၊ အဲဒါကာလလိုပြောတော့ တိုးပွားအနာကွဲပျက်တာက နောင်ဖြစ်လတ္တံ့ အနာဂါတ်ကာလရယ်လို့ ကာလဘယ်နှစ်ဖြာနဲ့ သံသရာလည်တာလဲ(ကာလသုံးဖြာနဲ့သံသရာလည်ပါတယ်ဘုရား)တခြားပြောတာလား၊ခန္ဓာအကြောင်းဖြစ်စဉ်ပြောတာလားစဉ်းစားကြည့်ကြပါလို့၊ကာလဆိုတာ အပိုင်းအခြားလို့မှတ်ထားပါ။ ဘယ်လိုပိုင်းခြားသလဲဆိုရင် အရုဏ်တက်နေထွက်စအချိန်ကို နံနက်ကာလ၊ နေမွန်းတည့်ချိန်ကို နေ့ကာလ၊ နေဝင်ပြီးအချိန်မှာ ညကာလရယ်လို့ ပိုင်းခြားတာနော်။ နောက်တစ်မျိုးပြောရရင် မနေ့ကပြီးခဲ့တာ ဘာကာလ(လွန်လေပြီးသောအတိတ်ကာလပါဘုရား) မနှစ်ကပြီးခဲ့တာတွေ၊ပြီးခဲ့တဲ့ဘဝတွေရောပေါ့။ မြတ်စွာဘုရားရှင်က ဇတ်တော်တွေဟောကြားခဲ့တာ အတိတ်ကာလ လွန်ခဲ့တာတွေ၊ ဇတ်တော်တွေပေါင်းပြတော့ ယခုဖြစ်ဆဲပစ္စုပ္ပန်ကာလမှာ ညီတော်အာနန္ဒာ၊ အရှင်သာရိပုတ္တရာ၊ အရှင်ဒေဝဒတ်၊ ငါဘုရားဖြစ်တယ် အစရှိသည်တို့ မဟောခဲ့ဘူးလား(ဟောကြားခဲ့ပါတယ်ဘုရား) အဲဒီလိုပိုင်းခြားခြင်းကို ကာလလို့သဘောပေါက်ကြပါယောဂီများတို့။(ဆက်ရန်)
#နန်းခမ်း

27/08/2023

#ယောဂီသိရန်အခြေခံ(၂၀)။ ။ဝိပဿနာရှုရမှာဆိုတော့ ဦးဇင်းတို့ ယောဂီများရရှိနေတဲ့ ဝိပါကဝဋ် ခန္ဓာငါးပါးကို ပါဠိမြန်မာတွဲပြီး အဘိဓမ္မာကလာတဲ့ ခန္ဓာငါးပါး ပြောရအောင်-
ရှုပက္ခန္ဓာ - ဖောက်ပြန်တတ်သော သဘောအစု ဖြစ်ပျက်မှု
ဝေဒနက္ခန္ဓာ - ခံစားတတ်သော သဘောအစု ဖြစ်ပျက်မှု
သညက္ခန္ဓာ - မှတ်သားတတ်သော သဘောအစု ဖြစ်ပျက်မှု
သင်္ခါရက္ခန္ဓာ - ပြုပြင်တတ်သော သဘောအစု ဖြစ်ပျက်မှု
ဝိညာဏနက္ခန္ဓာ- သိတတ်သော သဘောအစု ဖြစ်ပျက်မှု
ခန္ဓာငါးပါးဆောင်ပုဒ် အကျဉ်းက-ဖောက်ပြန် ခံစား မှတ်သား ပြုပြင် သိဝိညာဏ် ငါးအင်ခန္ဓာမှတ်။အဲဒါ အရှုခံခန္ဓာကို ရှုဉာဏ်နဲ့ကြည့်။ ဖောက်ပြန်တဲ့သဘောလို့ သဘောခန္ဓာ တွေ့မှမြင်မှ ဝိပဿနာဖြစ်မှာပါ။ ဝိပဿနာရှုရင် အပြောခန္ဓာရှုရမှာလား၊ သဘောခန္ဓာရှုရမှာလား(သဘောခန္ဓာရှုရမှာပါဘုရား) နာကျင်ကိုက်ခဲတဲ့သဘော၊ ပျော့တယ်မာတယ်သဘော၊ ပူတယ်အေးတယ်၊တွန်းကန်ဖောက်ပြန်နှိပ်စက်တဲ့သဘောကို ဉာဏ်မိအောင်ကြည့် ဖောက်ပြန်တဲ့ရုပ်တရား မြဲရဲ့လား (မမြဲပါဘုရား) မမြဲတာက အနိစ္စ၊ သိတဲ့ဉာဏ်က (မဂ္ပပါဘုရား) အနိစ္စရှိတဲ့ခန္ဓာမို့ ဉာဏ်ကလည်း အနိစ္စကို သိမြင်တော့ ခန္ဓာအရှိနဲ့ဉာဏ်အသိ မကိုက်လား(ကိုက်ပါတယ်ဘုရား) ခန္ဓာအရှိနဲ့ ဉာဏ်အသိကိုက်တာ ဝိပဿနာလို့ ဆရာတော်ကြီးက မဟောခဲ့လား(ဟောခဲ့ပါတယ်ဘုရား)။ ယခုဖြစ်ဆဲပစ္စုပ္ပန်ကာလ ဝိပါကဝဋ် ခန္ဓာအရှုခံတရားကို ရှုဉာဏ်နဲ့ပွားကြည့်လိုက်တော့ စက်ဆုပ်စရာ အသုံးမကျတဲ့ အသုဘခန္ဓာက ဘာသစ္စာလဲ(ဒုက္ခသစ္စာပါဘုရား) ရှုမြင်တဲ့ဉာဏ်က(မဂ္ဂသစ္စာပါဘုရား) ကိလေသာကံသေသွားတာက(သမုဒယသစ္စာပါဘုရား) အကြောင်းဝဋ်ချုပ်လို့ အကျိုးဝဋ် ဇာတ်ချုပ်ပြတ်သွားတာက (နိရောဓသစ္စာပါဘုရား) အဲဒီလို ပဋိစ္စသမုပ္ပါဒ် အခြေခံဝိပဿနာ အလုပ်ပေးလည်းပါ၊ သစ္စာဆိုက်အောင် ဟောပေးတာ မိုးကုတ်ဝိပဿနာ၊ မိုးကုတ်တရားလို့ခေါ်တာနော်။ ဝဋ်သုံးဝပြီးတော့ ခြောက်သွယ်ရပြီပေါ့။(ဆက်ရန်)
#နန်းခမ်း

18/08/2023

#ယောဂီသိရန်အခြေခံ(၁၉)။ ။ကိလေသာတွေ ရင်ထဲကိန်းတော့ ကံတွေပြုလုပ်၊ ကံတွေပြုလုပ်တော့ ရကြပြန်ပြီခန္ဓာတွေ၊ ကြုံပါပြီ အို နာ သေ အသုဘခန္ဓာ ဘာသစ္စာတွေလဲ(ဒုက္ခသစ္စာပါဘုရား)ကံတွေပြုလိုက် ခန္ဓာဒုက္ခတွေရလိုက်နဲ့ အကြောင်းကံထဲမှာ သူ ငါ သတ္တဝါပါရဲ့လား (မပါပါဘုရား) အကျိုးတရားထဲမှာရော ယောကျ်ား မိန်းမ လူ နတ် ပါရဲ့လား(မပါပါဘုရား)အကြောင်းဓမ္မနဲ့ အကျိုးဓမ္မပါဘဲလို့ ယောဂီတို့ရဲ့ဉာဏ်ထဲမှာ ပိုင်းခြားပိုင်နိုင်စွာ ရှင်းရှင်းလင်းလင်း မသိရဘူးလား(သိရပါတယ်ဘုရား) ကံအကြောင်းနဲ့ ခန္ဓာအကျိုးကို ထင်ရှားအောင် ဝိသုဒ္ဓိမဂ်မှာလာတဲ့အတိုင်းဆိုရင်-ကမ္မဿ ကာရကော နတ္ထိ ဝိပါကဿ ဝေဒကော သုဒ္ဓဓမ္မာ ပဝတ္တန္တိ ဧဝေဟံ သမ္မဒဿနံ တဲ့။ အဓိပ္ပါယ်က အကြောင်းကံထဲမှာ ပြုလုပ်သူမရှိဘူးတဲ့။ အကျိုးတရားခံစားတဲ့ ပုဂ္ဂိုလ် သတ္တဝါ မရှိပါလို့ မှန်ကန်စွာ မြင်ရမယ်တဲ့။ အကြောင်းဝဋ်နဲ့ အကျိုးဝဋ်ရယ်လို့ ဝဋ်သုံးဝနဲ့ သံသရာလည်နေရတာ ဘယ်သူတွေပါလိမ့်(တပည့်တော်တို့ပါဘုရား) ကိလေသာဝဋ်၊ ကမ္မဝဋ်အကြောင်းဝဋ်ကြောင့် အကျိုးရမှာက ဘာဝဋ်လဲ(ဝိပါကဝဋ်ပါဘုရား) ဝိပါကဝဋ်ရှစ်ပါးကိုပြောပြပါ(ဝိညာဏ်၊ နာမ်ရုပ်၊ သဠာယတန၊ ဖဿ၊ ဝေဒနာ၊ ဇာတိ၊ ဥပပတ္တိဘဝ၊ ဇရာမရဏပါဘုရား)ဝိပါကဆိုတာက အကျိုးဝိပါတ် ခန္ဓာရတာ၊ဝိပါကလို့ခေါ်ပါတယ်။ဝဋ်ဆိုတာ(လုံတယ် လည်တယ် လှည့်တယ်) ဝိပါကဝဋ်ခန္ဓာရတော့ နေရမဲ့ခန္ဓာလား၊ သေရမဲ့ခန္ဓာလား(သေရမဲ့ခန္ဓာပါဘုရား) ခန္ဓာရလို့ဒုက္ခရတာတဲ့။ခန္ဓာရနေတာ ဝန်ထုပ်ကြီးထမ်းပိုးနေရတာနဲ့ တူတယ်တဲ့။ဒို့ထမ်းနေရတဲ့ ဝန်ထုပ်ကြီးက ပေါ့ပေါ့လေးလား ၊အလေးကြီးလား(အလေးကြီးပါဘုရား)မြတ်စွာဘုရားက သံယုတ်ပါဠိတော် ဘာရသုတ်မှာ ဟောခဲ့တာက-ဘာရာဟဝေပဥ္စက္ခန္ဓာ ဘာရဟာရောစ ပုဂ္ဂ‌လော၊ ဘရာဒါနံဒုက္ခံလောကေ ဘာရနိက္ခေပနံ သုခံ။ဒို့ခန္ဓာ ပညာဉာဏ်နဲ့သုံးသပ်ကြည့်တော့အိုရတာ၊နာရတာ၊သေရတာလည်းဒုက္ခ။မသွားချင်ဘဲ သွားရတာလည်းဒုက္ခ၊မစားချင်ဘဲ စားပေးနေရတာလည်းဒုက္ခ၊မအိပ်ချင်လည်း အိပ်ပေးရတာဒုက္ခ၊ မစားဘဲ မအိပ်ဘဲနေပြန်လည်း(ဒုက္ခတွေပါဘုရား)ဒါကြောင့် မြတ်စွာဘုရားက- နတ္ထိခန္ဓသမာဒုက္ခာတဲ့။ခန္ဓာနဲ့တူတဲ့ဒုက္ခ တခြားမှာမရှိပါတဲ့။ဘာဒုက္ခတွေလဲဆိုရင် အို နာ သေဒုက္ခတွေပေါ့။ အို နာ သေ မလွတ်တဲ့ခန္ဓာ ဘာသစ္စာ(ဒုက္ခသစ္စာပါဘုရား) ဘာဝဋ်ပါလိမ့်(ဝိပါကဝဋ်ပါ ဘုရား)သံသရာ ဝဋ်ဒုက္ခ မရချင်ရင် မအိုခင်၊မနာခင်၊မသေခင်မှာ တရားရအောင်ရှာကြပါ။(ဆက်ရန်)
#နန်းခမ်း

08/08/2023

#ယောဂီသိရန်အခြေခံ(၁၈)။ ။နှစ်ရပ်မူလကတော့ အသွယ်ရှစ်သွယ်ထဲ မပါဘူး။ လင်္ကာဆောင်ပုဒ် ချောအောင်ထည့်ခြင်းသဘောပါ။ မူလနှစ်ဖြာကို ရှေ့နောက်ပြောင်းပေးထားလို့ ရှေ့သွားခေါင်းဆောင်ချင်းမတူကြပါဘူး။ နှစ်ရပ်မူလဆိုတာ တဏှာခေါင်းဆောင်၊အဝိဇ္ဇာနောက်လိုက်ဘဲ ထူးခြားတယ်လို့မှတ်ကြပါ။
နောက်အသွယ်က ဝဋ်သုံးဝတဲ့နော်။ဝဋပါဠိကနေ ဝဋ်ဖြစ်လာပါတယ်။ဝဋ်ဆိုတာ လုံးတယ်၊ လည်တယ်၊ လှည့်တယ်လို့ရှေ့ပိုင်းကယောဂီတို့ဆိုခဲ့ကြပြီနော်။ ကိလေသာဝဋ်ကသုံးပါးရှိပါတယ်နော်၊အဝိဇ္ဇာ(အမှန်တရားမသိတာ)ကို တရားကိုယ်ကောက်တော့ မောဟတရားပါ။ တဏှာကို တရားကိုယ်ကောက်တော့ လောဘတရားပါ။ ဥပါဒါန်ကို တရားကိုယ်ကောက်ရင်လည်း လောဘတရားပါပဲ။ တဏှာလောဘကအသေးစား၊ ဥပါဒါန် စွဲစွဲလမ်းလမ်းဖြစ်တဲ့လောဘက အကြီးစားလို့ မှတ်ထားကြပါ။ ကိလေသာဝဋ်သုံးပါး တရားကိုယ်အရပြောရင် မောဟကိလေသာရယ် (လောဘကိလေသာရယ်ပါဘုရား) ဟုတ်တယ် မောဟနဲ့လောဘဆိုတာ ကိလေသာ၊ ဝဋ်ဆိုတာကဘာတဲ့လဲ (လုံးတယ်၊ လည်တယ်၊ လှည့်ပါတယ်ဘုရား) ကိလေသာဆိုတာ ပူလောင်စေတတ်၊ နှိပ်စက်တတ်လို့(ကိလေသာ)လို့ခေါ်တာတဲ့။ ဒါဆိုရင် ဒို့ယောဂီများ ကိလေသာရယ်၊ ဝဋ်ရယ် ဘာခေါ်တယ်ဆိုတာ ရှင်းသွားပါပြီ။ နောက် ကမ္မဝဋ်တဲ့၊ ကမ္မဆိုတာဘာလဲ၊ဝဋ်ဆိုတာတော့သိပြီးပြီ။ ကမ္မဆိုတာ အမှုပြုခြင်းကို ဆိုလိုပါတယ်။ ဘာအမှုပြုလဲဆိုရင် ကိုယ်ဖြင့်ပြုတဲ့အမှု(ကာယကံ)၊နှုတ်ဖြင့်ပြုတဲ့အမှု(ဝစီကံ)၊စိတ်ဖြင့်ကြတွေးတဲ့အမှုက(မနောကံ)ဆိုတော့ ကံဘယ်နှစ်မျိုးလဲ(ကံသုံးမျိုးပါဘုရား) နောက်တစ်မျိုးပြောရရင် ကာယကုသိုလ်ကံနဲ့ ကာယ အကုသိုလ်ကံ၊ ဝစီကုသိုလ်ကံနဲ့ဝစီအကုသိုလ်ကံ၊ မနောကုသိုလ်ကံနဲ့ မနော အကုသိုလ်ကံရယ်လို့အမျိုးမျိုးရှိပါတယ်။အဲဒီလို ကံသုံးပါးနဲ့ပြုလုပ်တာတွေကို(ကမ္မ)လို့ခေါ်ပါတယ်၊ဝဋ်ဆိုတာက လုံးလည်လှည့်တာ၊ ကမ္မနဲ့ဝဋ် ပေါင်းတော့(ကမ္မဝဋ်ပါဘုရား) ကိလေသာဝဋ်နဲ့ ကမ္မဝဋ်က ဘာသစ္စာ(သမုဒယသစ္စာပါဘုရား) အလွှာလိုပြောတော့ (အတိတ်အကြောင်းတစ်လွှာပါဘုရား) ဘယ်ကာလပါလိမ့်(လွန်လေပြီးသောအတိတ်ကာလပါဘုရား)(ဆက်ရန်)
#နန်းခမ်း

Address

Singu
Singu

Telephone

+959789198212

Website

Alerts

Be the first to know and let us send you an email when Nang kham posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Nang kham:

Shortcuts

Share

Category