22/09/2025
2160 АЙЛЫН ЦОГЦОЛБОР ХОТХОНЫ ТӨСЛИЙН ТАНИЛЦУУЛГА, НЭЭЛТТЭЙ ӨДӨРЛӨГ АМЖИЛТТАЙ ЗОХИОН БАЙГУУЛАГДЛАА
Өнөөдөр 2160 айлын орон сууцны цогцолбор хотхоны шав тавих ёслолын дараа аймгийн төв талбайд төслийн танилцуулга, нээлттэй өдөрлөг амжилттай зохион байгуулагдлаа.
Арга хэмжээний хүрээнд тус төслийн зорилго, хэрэгжих хугацаа, техник эдийн засгийн үзүүлэлтүүд, зураг төсөл болон ирээдүйд авчрах үр өгөөжийн талаар иргэдэд дэлгэрэнгүй мэдээлэл өглөө.
Түүнчлэн аймгийн удирдлагууд болон төслийг хамтран хэрэгжүүлэгч “Голден Эй Эн Ти” ХХК-ийн санаачилгаар эмзэг бүлгийн иргэдэд зориулан тус хотхоноос 24 айлын орон сууцыг 100 хувийн тэтгэлгээр олгохоор болсныг албан ёсоор танилцуулсан бөгөөд судалгаанд хамрагдсан эхний 7 иргэнд тэтгэлгийн батламжийг гардууллаа.
Үүнээс гадна, төслийн хэрэгжилтийн хүрээнд аймгийн Орон Сууц Корпорацийн гүйцэтгэх захирал К.Ерген болон “Голден Эй Эн Ти” ХХК-ийн захирал Ц.Энхтунгалаг, аймгийн Мэргэжлийн боловсролын сургуулийн захирал Х.Раушан, “Өлгий Повер” ХХК-ийн захирал Г.Алтан-Од нар хамтран ажиллах гэрээнд гарын үсэг зурж, харилцан үр өгөөжтэй хамтын ажиллагааг эхлүүллээ.
Аймгийн удирдлагууд төслийг хамтран хэрэгжүүлж буй байгууллага, компаниудын төлөөлөлд талархал илэрхийлж, цаашдын хамтын ажиллагаанд амжилт хүслээ.
Энэхүү төсөл нь орон нутагт орон сууцны хүртээмжийг нэмэгдүүлэх, нийгмийн эмзэг бүлгийн иргэдийг орон сууцаар хангах, суурьшлын бүсийн дэд бүтцийг шинэ түвшинд гаргах чухал алхам болж байна.
https://www.facebook.com/share/v/1K99Krmna3/?mibextid=wwXIfr
