UA Marketing agency

27/05/2026

🔴 Өнөөдрийн UA-г бүтээлцсэн хүн бүр энэ түүхийн нэг хэсэг.

Би анх мэргэжилтэйгээ холбож бодож ҮХХ салбарт орсон юмаа. Миний мэргэжил газар зохион байгуулалт, газрын албатай холбоотой. Дипломын ажил маань хүртэл “Үл хөдлөх хөрөнгийг орлогын хандлагын аргаар үнэлэх” сэдэвтэй байсан.
Тэгээд оюутнууд цагийн ажил хийдэгшдээ. Тэр ажил маань үл хөдлөх хөрөнгийн компани байсан. Одоо бодоход бараг 10 орчим жилийн өмнөх үе. Тухайн үед шуурхай зараас листээ олдог байж билээ 😂
Баруун дөрвөн замын хавьд оффистой. Зар оруулна, хүн ирнэ, байр үзүүлнэ… “Аан ийм ажил байдаг юм байна” гэж ойлгоод л нэг, хоёр сар ажилласан. Тэгээд гарчихсан. Тухайн үед аав ээж ч ажил хийлгэх дургүй, би өөрөө ч яг сайн ойлгоогүй байсан.

Одоо бодоход тэр үеэс л энэ салбар надтай холбоотой явж байсан юм шиг.

Мэдээж амьдрал үргэлжилдэгээрээ л үргэлжилнэ.
Сургуулиа төгссөн. Удирдлагын академи төгссөн. Солонгост сурсан. Нөхөртэйгөө танилцсан. Ээж болсон.
Тэгээд нэг мэдэхэд “Одоо буцаад ажиллъя” гэж бодогдоод…

Тэр үед Урангоо захирлын контентуудыг их үздэг байлаа. UA Properties тэлэлт хийгдэхээс ч өмнө бараг би анх CV-гээ явуулж байсан юм. Хариу ирдэггүй ээ 😂

Тэгээд дараа нь тэлэлт хийж байгааг мэдээд
онлайн ярилцлагад орсон. Коронагийн үе таараад… тэгээд би тэнцээгүй 🥹😂 Намайг аваагүй.
Тэр үедээ бол жоохон эвгүй шдээ 😂
Гэхдээ дотроо “Би ер нь энд ажилламаар байна” гэсэн бодол байсаар байсан.

Тэгээд би бууж өгөлгүй CV-гээ ахиж явуулсан
Дараа нь ярилцлагад дуудсан. Бэлдэж бэлдэж очоод уулзахад одоогийн манай ахлах Б.Ууганбаяр ахлах /CEO/ ярилцлага авч байсан. Тэгээд “Тэнцсэн” гэж хэлсэн.
Анхны өдрөөсөө ажилдаа орсон.

Тухайн үед 11 сар байсан юмаа. Ороод удаагүй байхад “Монита” зарлаад би А.Урангоо захирлыг сугалчихсан 😂
Компаний захирал гээд жоохон сүрдэж байгаа шдээ 🤭 Тэгээд 7 хоног болгон бэлэг авна. Ажилд ороод удаагүй захирлын юунд дуртайг мэдэхгүй дэлгүүр ороол баахан тойрдог байж билээ.
Одоо бодохоор инээдтэй мөртлөө их гоё дурсамж.

Тэгж л би энэ салбартай жинхэнээсээ холбогдож байсан.
Манай эгч, гэр бүлийнхэн намайг их дэмждэг байсан. Би ер нь багаасаа идэвхтэй, илтгэл энэ тэр тавьдаг, оюутны зөвлөлд байдаг хүүхэд байсан болохоор “Энэ ажил яг чамд тохирно” гэж их хэлдэг байлаа.

Эхний жилдээ “Би яг борлуулагч хүн мөн үү?” Гэдэгээ өөртөө тодорхойлох л надад хамгийн чухал байсан.

Тэгээд анхны борлуулалт гарсан.
Тэр үед л би:
“Аан, болох юм байна шд” гэж бодож байсан санагддаг.
Тэгээд ар араасаа борлуулалтууд гарч эхэлсэн. Том обьектууд гаргаж, “Шилдэг Агент” болж эхэлсэн.
Гэхдээ би өөрийгөө одоо хүртэл “аймар мундаг борлуулагч” гэж боддоггүй.
Зүгээр л хийх ёстой зүйлсээ хийдэг.
Өглөө босоод ажилдаа ирнэ.
Хүмүүстэй уулзана. Суралцана. Алдаа гаргана. Дахиад үзнэ.

Манай компани миний хувьд шинэлэг, шинэ ажлын орчин байсан. Харин ҮХХ салбарт орж ирээд олон төрлийн хүмүүстэй хэрхэн харилцах түүнийгээ дагаад хариуцлагын түвшин ч нэмэгдэж байсан.
Манай хамт олон ч их залуу хүмүүс байдаг. Хоорондоо ярилцах хамтдаа өсөж дэвшиж олон зүйлийг суралцаж байна даа.
Гэхдээ болоогүй л байна. Одоо ч гэсэн сураад л явж байна. Цаашдаа ч сурах юм их байгаа.

Манай хамт олны уур амьсгал маш гоё намайг энэ компанид үлдээсэн хамгийн том зүйл нь хамт олон байж. Анхан үедээ Агентын ажил амаргүй ээ…
Хажуугийн хүмүүс:
“Шантрахгүй шүү.”
“Эхэндээ бүгд л ийм байдаг.” гэж хэлдэг байсан. Тэр үгс тухайн үедээ их түшиг болдог байж дээ.

Одоо бодоход энэ хэдэн жилд би зөвхөн ажил сураагүй юм байна. Өөрийгөө ч бас олсоор байна.
Бүтэлгүйтэж үзлээ, Гомдож үзлээ, Уйлж ч үзлээ

Гэхдээ л үлдсэн.

Эцэст нь А.Урангоо захиралдаа баярлалаа.
Цаг наргүй ажилладаг энэ ажлыг ийм хэмжээнд авч явж, энэ том компанийг босгосон эмэгтэй хүнийг харахаар одоо ч бахархдаг.

“Одоо та амарч бай. Бид нар зарж байя” гэж хэлмээр байдаг шүү 🤍

Мөн Б.Ууганбаяр ахлахдаа /CEO/ маш их баярлалаа.
Шинэхэн агентууд багтаа дасан зохицох, өөрийн арга барилаа олоход удирдлагын хандлага, харилцаа маш их нөлөөлдөг юм байна гэж боддог.
Ямар нэг асуудал гараад яваад очиход үргэлж тайван хандаж нэг талыг барьж дэвэргэдэггүй ноён нуруутай түшиг тулгууртай хүн байдаг.

Манай багийн хувьд ахлах маань маш том тулгуур.

Би мэдээж сул талтай л хүн. Тэрийг хүртэл зөв чиглүүлж, “Яаж энэ хүний давуу талыг гаргаж ирэх вэ?” гэдгийг олж хардагт нь баярладаг.
Энэ хугацаанд таниас сурсан маш их зүйл бий.
Маш их баярлалаа 🙏🏻

Хүмүүс хааяа:
“Яаж ингэж олон сар дараалж шилдэг агент болдог юм бэ?”
“Сар бүр яаж тэрбум тэрбумын борлуулалт гаргадаг вэ?” гэж асуудаг.

Үнэндээ надад гоё нууц байдаггүй ээ 😂
Би зүгээр л:
“Одоо хийх ёстой зүйл юу вэ?”
гэдгээ бодоод тэрийгээ хийдэг байсан.

Тэгээд эргээд харахад 5 жил өнгөрчихсөн байна.

🔴 Happy 13th Birthday, UA!🔴

27/05/2026

🔴 Өнөөдрийн UA-г бүтээлцсэн хүн бүр энэ түүхийн нэг хэсэг.

"Урангоо захирлын нэг зүйл миний шарыг малтсан..."
UA Properties компанийн төсөл хариуцсан захирал О. Дөлгөөнтамир:

Шулуухан хэлэхэд би ер нь бүх юмыг магадлал гэж хардаг хүн. Тийм болохоор ч тэр үү, айгаад зогсож байсан үе надад нэг их байхгүй. Алдана, унана, бүтэлгүйтнэ, тэр бол бүр ойлгомжтой. Харин юууу ч хийхгүй суух л миний хувьд хамгийн том fail л дээ.

ҮХХ зах зээлд анх орохдоо би удаан ажиллана гэж яг бодоогүй ээ. Үнэнийг хэлэхэд “энэ салбарыг нэг үзье” гэсэн л байр суурьтай орж ирсэн. Нэг мэдсэн салбартаа 8-9 жил, UA-д 4 жил өнгөрчихсөн байсан.

Тэрнээс өмнө би өөрийгөө олон юманд туршсаан. Программ хангамж, Forex, хувьцаа, хөрөнгийн зах зээл дээр хүртэл улайрсан нэгэн байв аа. Data ухна, system гаргана, эрсдэл тооцно, хянана, нягтлана... Ямар үед авах уу, хэзээ зарахаа хүртэл algorithm шиг боддог байсан. Ер нь би угаасаа урсгалаараа явдаг хүн биш. “Ингэж л байх ёстой” гэдэг хязгаарлагдмал хандалагад дургүй.

Тэр бүх юмны дунд хэсэг би өөрөө burnout болчихсон, орлого ч тааруу, эрүүл мэнд ч асуудалтай хэцүү цаг үе тууллаа. Covid-ын үеэр хуучин ажлаасаа гараад хэдэн сар зүгээр л юу ч хийхгүй гэртээ суусан. Яг тэр гацанг үед би юу ч хийхгүй байгаадаа гутарч дотроосоо бачууран, байж сууж чадахгүй сoin, bet энэ тэр гээд л бас л буруу замлуу явж өгөв. Гол нь өрх толгойлж яваа хүн орлогогүй, тэгснээ орлогогүй дээрээ нэмээд маш алдагдалтай сонголтууд хийж явсан нь давхар намайг нэлээн сэрээсэн гэх юм уу.

Нэг бодлын азтай ч юм шиг, би Урангоо захирлын vlog-уудыг аягүй үздэг байсан. Лаг G-class унаад л, нэг house үзүүлээд л, ганц үзүүлэлтээрээ зараад л… Яг л “wow” гээд биширч хараад суухаас илүү миний шар хөдөлдөг байлаа.

“Яаж ингэж зараад байна аа?” гэж сониуч зангаараа анх UA -руу өөрөө өөрийгөө зүглүүллээ. За тэгээд 2,3 удаа анкет явуулаад хариу ирсэнгүй ээ. Миний CV-г бүр мартчихсан эсвэл тоогоогүй ч юм шиг байгаа юм. Сүүлдээ өөрөө араас нь хөөцөлдөж байж анх 2022 онд орж ирж байсан юм.
Одоо бодоход бол хамгийн зөв шийдвэрүүдийн минь нэг нь үнэн. Агент байхдаа хандлагад суралцаж, багийн ахлах болоод хариуцлагыг тултал ойлгож байсан. Мянга мянган айлын төсөл хариуцсан захирал болоод итгэл ба итгэл дүүрэн хариуцлага гэдэг ямар үнэтэй вэ гэдгийг бүр ч их ойлгосон. Миний удирдаж буй төсөл бүрийн цаана хамт олныхоо итгэлийг алдахгүй, урмыг хугалахгүй явах хүсэл хамгийн томоор байдаг.

Аав маань эрт өөд болж, ээж маань ажилтай байнга гадуур явдаг байсан болохоор хоёр дүүгээ харж, хар жоохноосоо л хариуцлага үүрч сурсан. Тэр болгонд хүмүүс намайг үнэлэх, урам зоригоор дэмжих нь ховор л байлаа. Гэтэл эмээ маань нэг удаа намайг дуудаад сэтгэлээсээ хэлж байсан одоо хүртэл тод санагддаг хамгийн их урам өгсөн зүйл бол “Миний хүү хүний ажилд их тус болдог шүү, миний хүү маш их баярлалаа” гэж хэлж байсан. Тэр үгийг би одоо хүртэл мартдаггүй. Хүн магтуулах албагүй юм байна лээ. Гэхдээ хичээл зүтгэлийг чинь хүмүүс хардаг юм байна гэдгийг тэр үед анх урамшиж ойлгосон.

Эцэст нь бодоход, намайг өнөөдрийн энэ хүн болоход зөв хүмүүс, зөв орчин, зөв өрсөлдөөн хамгийн их нөлөөлжээ. Өрсөлдөөн гэснээс, инээдтэй нь би анх UA-д орж ирэхдээ би “Урангоо захиралтай өрсөлдөнө, илүү давна” гэж бодож, их л бадрангуй амбицтай гар орж ирж байлаа. Одоо бодоход тэр бодол тэр үед ямар хол зөрүүтэй байсан юм бэ? Бараг цэцэрлэгийн хүүхэд, их сургуулийн оюутан хоёрыг харицуулаад байгаа юм шиг л хол зөрүүтэй байсан.

Жинхэнэ өрсөлдөөн гэдэг чинь бусадтай биш, өчигдрийн өөртэйгөө хийх өрсөлдөөн юм байна лээ. Одоо би ганцаараа өөрөө л сайн байх тухай биш, багаа яаж илүү хүчтэй болгох вэ, төслөө яаж хамгийн топ level дээр гаргах вэ гэдэг дээр л толгой ажилладаг болсон.

13 жилийн турш салбартаа тэргүүлж чадсан UA-дээ ойн баярын мэнд хүргэе ээ.

🔴 Happy 13th Birthday, UA!🔴

27/05/2026

🔴 Өнөөдрийн UA-г бүтээлцсэн хүн бүр энэ түүхийн нэг хэсэг.

“Нэг жижигхэн чат миний амьдралыг өөрчилсөн...”
UA Properties компанийн Борлуулалтын захирал
Ю. Мина

Би 2 хүүхэд төрүүлж, 2 их сургууль төгсчихөөд өөрийгөө юуг сайн хийж чаддаг юм болдоо гэж бодсоор л явсан. БНСУ-д 7 жил сураад амьдраад ирлээ. Бас л болдоггүй ээ. Гэхдээ тэндээс ажил амьдралын тухай их юм сурсаан. Монголд ирээд хэд хэдэн газар ажил хийж үзэв. Ямар ч ажил хийсэн чадаад байдаг, тэгсэн мөртлөө буруу газраа байгаа юм шиг мэдрэмж төрөөд л яваад байлаа. Багадаа хичээл дундуур их ярьдаг “чалчаа хүүхэд” гэдэг хочтой байнга багшдаа загнуулдаг байж билээ.
Өвөө эмээ минь намайг “хэнтэй ч хамаагүй яриад зогсчих юм, танихгүй хүн аваад явчихвал яана” гээд л санаа нь зовчихно. Сүүлдээ яриасаг, нүүрэмгий зан чанараа дутагдал юм боловуу гэж боддог болсон. 10 гаран жилийн өмнө нэг оны, нэг сард төрсөн ээжүүдийн групп хоорондоо найзлаж уулздаг, хүүхдүүдээ хамт тоглуулдаг тренд яг эрчээ авч байсан үе. Тэр группээсээ л Урангоо захиралтайгаа танилцаж байлаа.
Үл хөдлөх хөрөнгө, салбарын талаар үнэндээ бараг юу ч мэддэггүй байсан. Гэхдээ нэг өдөр зүгээр л зориг гаргаад:
“Танайх үл хөдлөх хийдэг тээ?”
гэж чат бичлээ…
Одоо эргээд бодоход тэр жижигхэн мессеж миний амьдралын хамгийн том эргэлтийн цэг байж дээ.

UA-д орсон эхний хоёр сардаа нэг ч борлуулалт хийж чадаагүй. Өөртөө эргэлзэж, ажлаасаа гарах хүртлээ шантарч байсан үе бий. Ер нь агентуудад нилээн олон удаа тохиолддог сэтгэл зүйн нэг үзэгдэл л дээ. Харин яг тэр үед Ууганаа буюу өнөөдрийн UA Properties-ийн гүйцэтгэх захирал Ууганбаяр надаас:
“Чи үлдэхийг хүсэж байна уу?”
гэж асуув.
Би “тийм” гэж хариулахад тэр миний ажиллаж байсан байрыг хамт борлуулж өгч, дахин нэг боломж олгосон юм. Уг нь бол надтай л адилхан шинэхэн агент байлаа. Тэр үед маш тод ойлгосон нэг зүйл нь: “хүнийг өөрчилдөг хамгийн том хүч бол итгэл юм байна”

Өнөөдөр би борлуулалтын салбарын нэг л зүйлийг баттай хэлж чадна. Борлуулалт гэдэг нь зөвхөн бараа зарахыг хэлэхгүй. Энэ бол хүний хэрэгцээг ойлгох, итгэл бий болгох, шийдвэр гаргалтад нь үнэ цэн нэмэх ажил.
Угийн нээлттэй, яриа сайтай, хүнтэй амархан ойлголцдог зан чанараа олон жил сул тал гэж боддог байжээ.
Харин энэ салбарт орсоноор анх удаа өөрийнхөө хамгийн том давуу талаа олчихоод сууж байна.
Барилгын салбар хэмээх томоохон их айлын үүд хаалгаар орж бүтээн байгуулагчдийн хүсэл мөрөөдөл, зорьсон зорилгыг аз жаргалын өргөө гэрээ хайж буй гэр бүлүүд, залуустаа хүргэж хооронд нь уулзуулж, бодит гүүр нь болж чадна гэдгээ ойлгосон.
UA надад зөвхөн ажил өгөөгүй. Өөрийгөө олох боломж өгсөн. Өөртөө итгэх итгэл өгсөн. Санхүүгийн эрх чөлөө өгсөн.
Гэр бүл, хүүхдүүдтэйгээ чанартай цаг өнгөрүүлэх орон зай өгсөн. Ам бүл 6-уулаа болохынхоо хажуугаар ч ажлаа хийсээр л байна. Ховор боломж шүү дээ.
Хамгийн чухал нь хүн өөрөөрөө байж амжилт гаргаж болдгийг ойлгуулсан.
Урангоо захиралтай танилцаж, энэ салбар, энэ том хамт олонтой болоход тусласан ээжүүдийн группдээ баярладаг даа.
Компани өргөжиж олон салбар ажилтантай болохын хажуугаар улам суралцаж, өөрийнхөө хамгийн сайн хувилбар болохын төлөө, хамт олныхоо хамгийн сайн сайхан чанарыг өнгөлж гялалзуулахын төлөө хичээсээр л явна. Сул талаа бодон шаналж суухаас илүү, сайн сайхан талаа зүлгэж улам тод гялалзахыг чинь хаа нэгтээ хүлээж суугаа заяаны хамт олон гэж заавал байгаа шүү.
8 жилийн өмнө 7 хүний бүрэлдэхүүнтэй шижигнэтэл ажилладаг байсан бол, өнөөдөр бид гадаад дотоодын 4 салбартаа 100 гаруй ажилчидтай бужигнаж сууна.
13 жилийн ойгоо тэмдэглэж буй UA Properties-ийн заяаны хамт олондоо чин сэтгэлийн баяр хүргэе.
Бидний хамгийн том амжилт бол зөвхөн барилга, борлуулалт, тоо биш.
Харин хүмүүсийн амьдралыг өөрчилж, гялалзуулж чадсан түүхүүд юм."

🔴 Happy 13th Birthday, UA!🔴

27/05/2026

🔴 Өнөөдрийн UA-г бүтээлцсэн хүн бүр энэ түүхийн нэг хэсэг.

2022 онд би UA-д анх ажилд орж байсан. 20 хэдхэн настай, зүгээр л ажил хийе гэсэн бодолтой залуу орж ирж байлаа.

Үнэндээ би багаасаа ажил хийж сурсан хүүхэд. 14 настайгаасаа үйлчилгээний салбарт ажиллаж эхэлсэн. Бармен хийж үзсэн, зөөгч ч хийж үзсэн. Хүнтэй харилцах, үйлчилгээ үзүүлэх гэдэг зүйлсд анхнаасаа бэлтгэгдчихсэн гэх юм уу даа.

UA-д орсноосоо хойш ердөө 14 хоногийн дараа анхны борлуулалтаа хийж коммишноо аваад ямар их баярлаж байсан гээч. Тэр мэдрэмж миний хувьд мөнгөнөөсөө илүү “би чаддаг юм байна” гэсэн хамгийн анхны урам байсан.

Гэхдээ миний хамгийн их зүрхэнд үлдсэн дурсамж амжилтын үе биш. 2023 онд би хувийн асуудлаасаа болон ажлаасаа хэсэг завсардлаа. Өөрийгөө алдчихсан мэт, хэцүү цаг үе туулж байв. Яг тэр үед Урангоо захирал надруу залгаж байсныг мартдаггүй юм. “Эгч нь ч гэсэн чам шиг залуу байсан. Алдаж, онож явсан. Ийм залуу байж юунд ингэтлээ уначихдаг юм бэ? Одоо ажилдаа ор оо. Хүрээд ир ээ” хэмээн захирал гэхээсээ илүү яг л миний төрсөн эгч шиг минь надтай ярьж байсан нь хамгийн их хоногшиж, одоо бодоход ч дотор зурс хийж сонин болж байна. Тэр ярианы дараа миний дотор нэг л юм буцаад асчих шиг болсон. Араас нь энэ салбарт миний “А” үсгийг заасан Мина захирал, Ууганбаяр захирал хоёр ч надтай ярьж, дэмжлэг үзүүлсэн. Одоо бодоход тэр хүмүүсийн надад үзүүлсэн итгэл л намайг өнөөдөр хүртэл энэ компанид үнэнч, тууштай авч явж байгаа юм шиг санагддаг.

Аав, ээжийн маань өгсөн хамгийн том хүмүүжил бол “хүнд худлаа ярьж болохгүй, хулгай хийж болохгүй”. Тэр зарчмаараа өнөөдөр хүртэл ажиллаж яваа. Магадгүй энэ ажил дээр амжилттай яваа хамгийн том шалтгаан маань ч тэр байх.

Одоо би төслүүдээ ахлаад явж байна. 1100 айлын том төсөл дээр ажиллаж, баг удирдаж эхлэхдээ манлайлал гэдэг зөвхөн өөрөө сайн байхаас илүү бусдыг дагуулж, өсгөж, зөв чиглүүлэх тухай юм байна гэдгийг ойлгосон. Энэ компанид би зөвхөн мөнгө олоогүй. Хүн болж өссөн. Хариуцлага сурсан. Хүний итгэлийг дааж явах ямар үнэ цэнтэйг мэдэрдэг болсон.

Заримдаа утсан дээрх зургуудaa эргүүлэн үзэхээр миний амьдралын хамгийн том дурсамжууд бүгд UA-тай холбоотой байдаг. Сүүлийн 5 жилийн амьдралын минь хамгийн том хэсэг энэ компанитай хамт өнгөрчээ.

Тийм болохоор 13 жилийн ойгоо тэмдэглэж байгаа UA-даа, мөн энэ бүхнийг бүтээлцэж яваа удирдлагууд, хамт олондоо чин сэтгэлээсээ баярлалаа гэж хэлмээр байна. 13 жилийн ойн баярын мэнд.

🔴 Happy 13th Birthday, UA!!! 🔴

20/10/2025