26/06/2026
ТЭРБУМ ТӨГРӨГИЙН ҮНЭ ХҮРЧ БУЙ АНХНЫ МОНГОЛ САГСЧИН
Итгэхэд бэрх ч найдвартай эх сурвалжаас сонссон учраас энэ тоог бодитой гэдэгт эргэлзэхгүй байна. SG APES баг Хасын Хүлэгүүд багийн холбон тоглогчид тэрбум төгрөгийн санал тавьжээ. Дотооддоо ийм мөнгөн дүн амлаж байгаа анхны тохиолдол энэ байх.
Гурван жилийн өмнө 150 саяын гэрээ Монголдоо хамгийн томд тооцогдож, гэрчилж суусан хүний хувьд гайхах, алмайрах зэрэгцэж байгаа ч Барсболдод л санал болгохгүй бол өөр хэнд санал болгох билээ гэж бодов.
Барсболд шийдвэрээ гаргаагүй байгаа ч, ойр тойрныхонтойгоо зөвлөж байгаа гэдгийг эх сурвалж мэдээллээ. Хэрэв шийдвэрээ эцэслэчихээгүй бол залуу хүнд ирээдүйд нь харамсахааргүй шийдвэр гаргахад нь зөвлөе гэж бодлоо.
Азийн лигт хоёр жил дараалан амжилт үзүүлсний дараа Азбаяр, Барсболд хоёрт Японы лигээс тоглох санал ирсэн. Хүлэгүүд багаа бодох уу залуусаа бодох уу гэдэг шийдвэр гаргах гэж байна гэдгийг нь сонсоод гайхах, бухимдах зэрэгцэж байснаа нуугаад яахав.
Монголын лигт Азийн ийм том лигээс урилга ирүүлж, импорт тоглогчид очдог жим гарах гэж байхад бодох хэрэг юу билээ, гуяыг нь алгадаад явуулах бишүү гэж бодсонтой минь ижил шийдвэрийг Хүлэгүүдийн удирдлагууд гаргаж. Тэд хоёр залуудаа амжилт хүсээд, арлын оронд Монголынхоо нэрийг өндөрт гаргаарай гэж ерөөсөн юм.
Харин энэ үетэй Эйпс багийн санал давхцжээ. Түүхэнд байгаагүй өндөр үнийн дүнг SG Эйпс багийн эзэн Батсайхан өөрийн биеэр Барсболдод тавьсан гэх. Мориноос сагс руу урвасан анхных нь АПУ-ын босс биш, хамгийн хөрөнгөтэй нь бол маргашгүй үнэн. Тэр л ийм санал тавьж чадна.
Барсболд Япон руу явах эсэх шийдвэртээ эргэлзэх болсон гэдгийг дуулаад энэ бичвэрийг бичих ёстой юм байна гэж бодсоноо эхлээд хэлье.
Монголын шилдэг холбогчийг авъя гэж санал тавьсан Эйпс багийн буруу биш, харах битгий хэл сонсож ч байгаагүй саналыг эргэцүүлж суугаа Барсболдын ч буруу биш. Монголдоо бол багтаа үлд гэж шахаж байгаа Хүлэгүүдийн ч буруу биш. Ер ийм холбогч түүхэнд цөөхөн байсан учраас алийг нь ч буруутгах аргагүй.
Гэхдээ буруутахгүй ч, магадгүй ирээдүйд харамсах ганцхан л шийдвэр гэж би хувьдаа харж байгаа нь аль ч багт тоглосон бай Монголдоо үлдэх. Дахиж Японы лигт тоглох санал ирээ ч үү үгүй ч үү.
Хэдхэн цагийн өмнө Ш.Энхийн-Од Монголын залууст ямар том зам гаргаж өгч буй талаар подкастдаа ярьсан юм. Тэгвэл Азаа, Барсаа хоёрт яг ижилхэн боломж ирээд байна. Магад Энхийн-Од Монголдоо үлдсэн бол хавь илүү мөнгө авах байсан ч, тэр мөрөөдлийнхөө араас тууштай зүтгэсээр драфтад нэрээ өгчихөөд бэлтгэлийн зааландаа хүлээж байна. Үүнтэй адилаар Азийн томоохон лигт очиж мөрөө гаргах анхдагч нь болох боломж Барсболдын өмнө ирсэн. Энэ саналаас бүү татгалзаарай, хожим нь би биш, Эйпс биш, Хүлэгүүд биш, харамсах ганцхан хүн нь чи юм шүү гэх байна.
Гадны улсуудаас санал хүлээн авсан тамирчдын яриаг бишгүйдээ сонсож явлаа. Ялгаатай нь тэдэнд улсынхаа далбааг солих шаардлага мөнгөн дүнтэй хамт ирж байсан болохоор тэд татгалзсан ч, эцэст сүүлд нь бахархсан нь биш харамсангуй хуучилдаг нь олонтаа. Ц.Шаравжамц гавъяатыг Америк руу явж Портланд Блэйзерсийн шалгаруулалтад орох гэж байхад байр амлаад үлдээж байсанд, одоо Шараваа ах өөрөө л харамсдаг юм.
Чи яг ийм л шийдвэрийн өмнө ирчихээд байна, Барсаа. Чиний явах эсэх зөвхөн чамаар зогсохгүй, дараагийн олон тоглогчдод жим биш зам болно гэж итгэж байгаа болохоор энэ боломжийг бүү алдаасай гэж хүсэж байна. Тоглогчид маань Вьетнамын лигт зундаа очиж тоглодог болтлоо сагсан бөмбөг маань томорч, одоо Япон руу, тэрний дараанаас Солонгос руу гардаг болвол жинхэнэ хөгжил биш гэж үү? Хэтэрхий том юм бодох ч шаардлагагүй дээ.
Чамд тавьсан санал Японд тоглоод ирсний чинь дараа ч хүлээж байна гэдэгт итгэ. Учир нь чиний зүрх тийм л том, ховор юм билээ. АМЖИЛТ ХҮСЬЕ ЧАМД.
