09/07/2026
ХҮҮХЭД ХАМГААЛЛЫН ТУХАЙ ХУУЛИЙН ДӨРӨВДҮГЭЭР ЗҮЙЛ
ХУУЛИЙН НЭР ТОМЬЁОНЫ ТОДОРХОЙЛОЛТ
Хүүхэд хамгаалал гэдэг нь зөвхөн хүчирхийлэл гарсны дараа хүүхдийг хамгаалах ажил биш.
Энэ нь хүүхдийн сайн сайхан байдал, аюулгүй орчин, эрүүл мэнд, сэтгэл санаа, боловсрол, нийгэмшихүй, хөгжил, эрсдэлээс урьдчилан сэргийлэх, шаардлагатай үед тусламж, үйлчилгээ үзүүлэх цогц үйл ажиллагаа юм.
📖 Хүүхэд хамгааллын тухай хуулийн 4 дүгээр зүйлд дараах нэр томьёог тодорхой заасан байдаг. Үүнд:
✅ Хүүхдийн сайн сайхан байдал
Хүүхдийн бие махбод, эрүүл мэнд, сэтгэл санаа, нийгэмшихүй, танин мэдэхүй, боловсрол, эдийн засгийн хэрэгцээ хангагдаж, хүүхдийн хөгжлийг дэмжсэн орчин нөхцөлийг хэлнэ.
✅ Хүүхэд хамгаалал
Нийгмийн бүх орчинд хүүхдийг зүй бус харьцаа, хүчирхийлэл, мөлжлөгөөс хамгаалах, нөхөн сэргээх, урьдчилан сэргийлэхэд чиглэсэн бодлого, үйл ажиллагаа, үйлчилгээг хэлнэ.
✅ Хүүхдийн эсрэг хүчирхийлэл
Хүүхдийн өсөлт хөгжил, эрүүл мэнд, аюулгүй байдалд хор хохирол учруулах бие махбод, сэтгэл санаа, эдийн засаг, бэлгийн дарамт, хүчирхийллийн үйлдэл болон эс үйлдэхүйг хэлнэ.
✅ Эрсдэлт нөхцөлд байгаа хүүхэд
Амь нас, эрүүл мэнд, аюулгүй байдал, хөгжих хэвийн орчин нь алдагдсан; хүчирхийлэлд өртсөн эсвэл өртөх нөхцөлд байгаа; эцэг эх, асран хамгаалагчгүй; гамшиг, онцгой нөхцөл байдалд байгаа хүүхдийг хэлнэ.
✅ Хэрэг хянан шийдвэрлэх ажиллагаанд оролцогч хүүхэд
Гэмт хэрэг, зөрчлийн хохирогч, гэрч хүүхэд; өсвөр насны сэжигтэн, яллагдагч, шүүгдэгч; зөрчилд холбогдогч хүүхэд; иргэний болон захиргааны хэрэгт эрх ашиг нь хөндөгдөж буй хүүхдийг хэлнэ.
✅ Хүүхдийг үл хайхрах
Хүүхдийн аюулгүй байдал, эрүүл мэнд, сэтгэл санаа, боловсрол, хөгжлийн хэрэгцээг хангаагүй, асран хамгаалах үүргээ биелүүлээгүйн улмаас хүүхдийг эрсдэлт нөхцөлд оруулахыг хэлнэ.
✅ Гэмт хэрэг, зөрчлийн хохирогч хүүхэд
Хуулийн байгууллагаар хохирогчоор тогтоосон эсэхээс үл хамааран гэмт хэрэг, зөрчлийн улмаас хохирсон хүүхдийг хэлнэ.
✅ Үе тэнгийн дээрэлхэлт
Нэг буюу хэд хэдэн хүүхэд өөр хүүхдийг бие махбод, сэтгэл санааны хувьд гэмтээх, зовоох, ялгаварлан гадуурхах, айлган сүрдүүлэх, заналхийлэх зорилгоор давтамжтайгаар биеэр, амаар болон цахим орчинд үйлдэхийг хэлнэ.
✅ Хүүхэд хамгааллын үйлчилгээ
Хүүхдийн хамгаалуулах эрхийг хангах зорилгоор үзүүлж буй шуурхай тусламж, хамгаалах, нөхөн сэргээх, урьдчилан сэргийлэх үйлчилгээг хэлнэ.
✅ Хүүхдийн эрхийн хууль зүйн хороо
Хэрэг хянан шийдвэрлэх ажиллагаанд оролцож буй хүүхдэд шаардлагатай тусламж, үйлчилгээ үзүүлэх шийдвэр гаргах, хэрэгжилтийг хангах чиг үүрэгтэй орон нутгийн орон тооны бус нэгж юм.
✅ Хамтарсан баг
Гэр бүлийн хүчирхийлэлтэй тэмцэх тухай хуульд заасан, хүүхэд, гэр бүлийн эрсдэлд хариу арга хэмжээ авах олон салбарын хамтын ажиллагааны нэгж юм.
✅ Асралт гэр бүл
Гэр бүлээсээ тусгаарлагдсан, эрсдэлт нөхцөлд байгаа хүүхдийг тодорхой хугацаанд асран халамжилж буй төрөл, садны бус гэр бүлийг хэлнэ.
✅ Кейс менежмент
Хүүхэд, гэр бүлд шаардлагатай үйлчилгээг үе шаттайгаар хүргэх, зохицуулах, хяналт тавих мэргэжлийн үйл ажиллагаа юм.
✅ Хүүхэд хамгааллын мэргэжлийн удирдлага
Хүүхэд хамгааллын үйлчилгээ үзүүлж буй нийгмийн ажлын мэргэжилтнийг арга зүйгээр удирдан чиглүүлэх, дэмжих, зөвлөн туслах үйл ажиллагаа юм.
✅ Хориотой агуулга
Хуулиар хориглосон контент, бүтээл, мэдээ, мэдээлэл, зар сурталчилгааг хэлнэ.
✅ Хүүхдэд хортой агуулга
Хуулиар хориглоогүй боловч хүүхдийн эрүүл мэнд, нас, бие махбод, оюун санаа, ёс суртахууны хөгжил, төлөвшил, хүмүүжилд сөргөөр нөлөөлөх контент, мэдээлэл, зар сурталчилгааг хэлнэ.
🌱 Тиймээс хүүхэд хамгаалал бол зөвхөн нэг байгууллагын ажил биш.
Энэ бол гэр бүл, сургууль, эрүүл мэнд, цагдаа, нийгмийн хамгаалал, хэвлэл мэдээлэл, цахим орчин, орон нутаг, төрийн болон төрийн бус байгууллага гээд бүх талын хамтын үүрэг юм.
Хүүхдийг хамгаална гэдэг нь хүүхдийг сонсохоос, эрсдэлийг эрт харахаас, үл хайхрахгүй байхаас эхэлнэ.
Та хүүхдийн төлөө ЗА бол ЗААВАЛ хийе хөдөлгөөнд нэгдэж хүүхдийн эрсдэл аюулгүй байдлыг хамгаалан e-mongolia аппликейшний ekids цэсэнд мэдэгдэж хүүхдийг болзошгүй эрсдлээс урьдчилан сэргийлээрэй.
