09/08/2025
SEN. ERWIN TULFO’S EXPLANATION OF VOTE ON THE IMPEACHMENT CASE AGAINST VICE PRESIDENT SARA DUTERTE
Ginoong Pangulo, mga kapwa kong Senador, at sa sambayanang Pilipino:
Bumoto po ako ng “YES” sa mosyon na sumasang-ayon sa desisyon ng Korte Suprema sa impeachment case laban kay Vice President Duterte. Ito po ay hindi dahil sa gusto kong iligtas ang Bise Presidente, kundi dahil malinaw ang sinasabi ng ating batas, at mas malinaw pa ang desisyon ng Korte Suprema na ito po ay labag sa Konstitusyon.
Alinsunod po sa “one-year bar rule,” hindi maaaring magsampa muli ng impeachment complaint ng isang taon matapos ang naunang reklamo. Ayon po sa Kataas-taasang Hukuman, ito ay nilabag. At bilang mambabatas, hindi ako pwedeng pumikit na lang sa harap ng isang tahasang paglabag sa ating Saligang Batas. At para saan o ano pa ang saysay ng panunumpa natin noong nakaraang linggo sa tungkulin na nakasaad doon na “That I will protect and defend the Constitution” kung ito ay susuwayin lang naman natin?
Ngunit linawin ko ito: ang boto kong ito ay hindi para i-abswelto si VP Sara Duterte. Sa totoo lang po gusto ko siyang humarap sa paglilitis—upang maipaliwanag ang mga isyu, upang sumagot sa mga tanong ng taongbayan, at upang harapin anumang pananagutan kung ito’y nararapat.
Dahil ang paninilbihan sa taumbayan ay hindi [lamang] po pribilehiyo, kundi isa ring pananagutan. Public service is not just a privilege, rather it carries also huge responsibilities.
Sa loob ng mahabang panahon, nasanay na ang ilang matataas na opisyal na kapag may kapangyarihan, may lusot. Kapag mataas ang posisyon, immune sa tanong o imbestigasyon. Tama na. Panahon nang baguhin ito.
Kung tunay po na walang kasalanan si VP Duterte, dapat siya mismo ang manguna sa pagbubukas ng lahat ng dokumento, paggamit ng budget, at mga hakbangin niya bilang Pangalawang Pangulo at kalihim ng DepEd. Walang dahilan para umiwas kung malinis po ang konsensya.
Ang boto kong “YES” ay hindi pagtatanggol sa kanya, kundi pagtatanggol sa legalidad ng proseso. hindi po ito ang wakas. Kung may basehan at sa tamang panahon, hind po ako magdadalawang-isip na suportahan muli ang isang lehitimo at makatarungang impeachment.
Dahil ang pamahalaan ay para sa taongbayan—hindi po para sa iilang nasa poder.
Maraming salamat, at mabuhay ang sambayanang Pilipino.
