24/07/2023
IN TAQWA MAGMANYATAKAN HA PITU PARKALA’
In sabunnal bar-iman amuna in tau in kabuga' niya pa Allah yaun ha katan anggawta' baran niya. In agi hi Faqeeh Abul Laith: “In kabuga’ pa Allah magmanyatakan ha pitu parkala’.”
1. Ha Dila’ sin tau, amuin mamu'pu-i kaniya dayin ha pagputing, paglimut, pagtumbi’, pagbissara tuhuma bukun bunnal, iban pagbissara lukat-lambing (way pus paidda). Sarta', tattap sadja siya ha pag dhikir pa Allah, ha pagbassahan Qur'an iban ha pagtuntutan ilmu’-agama.
2. In Pangatayan niya, amuin duun ha yaun gumuwa’ in dugal, in tumbi’, in iggil iban abughu’ pa taymanghud niya manusiya'. Sabab in iggil iban abughu' mamapasi sin hinang marayaw.
Sabda sin Rasulullah sallallahu alayhi wa sallam, “Pupurun sin iggil iban abughu' in ammal marayaw biya' sin kayu pupurun niya in kahuy-du'ngul.”
Subay niyu ingatun bat in iggil amuna in dayin ha mga salaggu’-laggu’ sakit sin pangatayan. Sarta’ in sakit sin pangatayan di' kaubatan puas dayin ha labayan ilmu'-agama iban sin pag-anggawata' ha mga ilmu’-agama nadawhat.
3. In Mata atawa Pangatud niya. Subay siya di' umatud ha mga hiyaram sibu' da kakaun, iinuman, tamungun iban sin kaibanan. Subay niya di’ aturun in dunya ini sin pangatud manapsu, gam mayan bang siya umatud subay pangatud namimikilan malawum. Subay siya di' tuud umatud pa mga unu in hiyaram kaniya.
Sabda sin Rasulullah sallallahu alayhi wa sallam, “Hi siyu siyu tau, hipuan niya in mata niya sin haram, ha Adlaw Qiyamat hipuan sin Allah in mata niya sin kayu.”
4. In Tiyan niya. Subay wayruun haram makasud pa lawum tiyan niya, sabab malaggu' dusa in pagkaun atawa pag-inum haram. Sabda sin Rasulullah sallallahu alayhi wa sallam, “Apabila awun hangka sungit kakaun in nakasud pa lawum tiyan sin hambuuk tau in tiyap-tiyap malaikat ha babaw gumi iban ha taas langit sumukna' kaniya ha salugay in kakaun hangka sungit yaun pa ha lawum tiyan niya. Bang siya mapatay ha bihan kahalan, in tampat niya Narka’.”
5. In Duwa Lima niya. Subay niya di pakayun in lima niya ha unu-unu na haram. Gam mayan, subay niya pakayun in duwa lima niya ha katan parkala’ manunjuki pa pagtaat iban pag-ibadat pa Allah. Kiyabayta’, bakas nagkabtangan hi Ka'ab Ahbar, agi niya, “Awun piyapanjari sin Allah astana' gaddung. Awun kapituwan nga-ibu (70,000) kabayan niya, iban ha tiyap-tiyap bay awun kapituwan nga-ibu (70,000) bilik niya. Wayruun makapaghula’ duun ha astana’ yaun buwat malayingkan amuin tau bakas tiyukbalan parkala' haram (kakaun, alta', tamungun, kawasa, bissara, iban kaibanan pa) sumagawa' wala' niya tiyayma’ sabab sin kabuga’ niya pa Allah.”
6. In duwa s**i niya. Subay di’ hitikang pa unu-unu na pagma'siyat pa Allah. Subay siya manaw pa Pagtaat iban Karidaan sin Allah. Iban madtu pa mga pag-inumpung iban sin mga Ulama' iban na sin mga Saliheen eepun sin Allah.
7. In Pagtaat niya. In katan Pagtaat niya subay ha tunggal maksud, karna' Allah. Subay siya mabuga' ha pagpakita'-kita' (riya') iban Nifaq (Sifat sin Munafiq). Bang niya baugbugan in katan ini, malamud na siya dayin ha mga pag-iyanun sin Allah (ha Surah Zukhruf, ayat 35)
وَالْآخِرَةُ عِندَ رَبِّكَ لِلْمُتَّقِينَ
“Iban in Akhirat ha hadarat sin Tuhan Tag rizzikian kaniyu suku' sin mga sila nagmamabuga' Kaniya.”Ha dugaing ayat (ha Surah al-Hijr, ayat 45),
إِنَّ الْمُتَّقِينَ فِي جَنَّاتٍ وَعُيُونٍ
“Bunnal tuud in mga sila tattap nagmamabuga' ha Allahu nagduruhul-baya’ sila ha kakabbun-kabbunan kagaddungan, iban ha kasapa’-sapaan nag-aanud-anud.” Parman Niya pa, (ha Surah at-Tur, ayat 17)
إِنَّ الْمُتَّقِينَ فِي جَنَّاتٍ وَنَعِيمٍ
“Bunnal tuud in mga sila nagmamabuga' ha Allahu Taala maghula' na sila ha lawum surga’ mahayang, iban ha sampurna’ ni’mat.” Parman niya pa, (ha Surah ad-Dukhan ayat 52)
إِنَّ الْمُتَّقِينَ فِي مَقَامٍ أَمِينٍ
“Bunnal tuud in mga nagmamabuga’ pa Allah ha tampat mataas in darajat nila, salamat in ginhawa nila duun hayan.”
Biya' sin sakaula-ula namayta' na in Allahu Taala bat ha Adlaw Qiyamat in mga sila yaun lappas na dayin ha kayu sin Jahannam. Hangkan, kiyawajiban in hambuuk Muslim dumawhat kabuga' pa Allah iban angan-angan iban panghuwat-huwat ha (Rahmat sin) Allah. Subay siya manghuwat-huwat ha Rahmat sin Allah, iban ayaw malawa' in angan-angan niya ha Allah. Parman sin Allah (ha Surah Zumar, ayat 53),
لَا تَقْنَطُوا مِن رَّحْمَةِ اللَّه
“Ayaw malawa’ in panghuwat-huwat niyu ha Ulung sin Allah.” Subay niya sumbahun, pagtag-eepunan in Allah, iban subay siya umanib lumayu' dayin ha mga kakahinang niya mangi', sarta' magtawbat siya pa Allah.
