11/07/2026
فردات پر عائد پابندی ختم، “فرد” کا نام تبدیل کر کے “نقلِ اراضی ریکارڈ” رکھ دیا گیا لاہور: پنجاب لینڈ ریکارڈ اتھارٹی (PLRA) نے صوبے بھر میں زمینوں کی خرید و فروخت سے متعلق ایک اہم فیصلہ کرتے ہوئے فردات پر عائد پابندی ختم کر دی ہے۔ اتھارٹی کی جانب سے جاری کردہ نوٹیفکیشن نمبر PLRA/ADG/2026/162 مورخہ 10 جولائی 2026ء کے مطابق، سابقہ “فرد” کو اب “نقلِ اراضی ریکارڈ” کا نام دے دیا گیا ہے نوٹیفکیشن کے مطابق پنجاب لینڈ ریکارڈ اتھارٹی ایکٹ 2017 کی متعلقہ دفعات کے تحت نقلِ اراضی ریکارڈ کو باقاعدہ قانونی دستاویز قرار دے دیا گیا ہے، جو اب لین دین اور زمین کی خرید و فروخت کے معاملات میں قابلِ قبول ہوگی۔ اس فیصلے کے بعد شہری نقلِ اراضی ریکارڈ کی بنیاد پر جائیداد کی خرید و فروخت اور دیگر متعلقہ قانونی کارروائیاں انجام دے سکیں گے پنجاب لینڈ ریکارڈ اتھارٹی نے واضح کیا ہے کہ یہ نوٹیفکیشن فوری طور پر نافذ العمل ہوگا اور اس پر بلا تاخیر عمل درآمد کیا جائے گا اس سلسلے میں نوٹیفکیشن کی نقول وزیر اعلیٰ پنجاب کے پرنسپل سیکرٹری، سینئر ممبر بورڈ آف ریونیو، تمام ڈویژنل کمشنرز، ڈپٹی کمشنرز، ڈسٹرکٹ رجسٹرارز، سب رجسٹرارز، متعلقہ سرکاری محکموں اور پنجاب کی تمام ترقیاتی اتھارٹیز کو ارسال کر دی گئی ہیں تاکہ نئے فیصلے پر مؤثر انداز میں عمل درآمد یقینی بنایا جا سکے ماہرین کے مطابق پنجاب لینڈ ریکارڈ اتھارٹی کا یہ اقدام اراضی کے لین دین کو مزید سہل، شفاف اور قانونی تقاضوں سے ہم آہنگ بنانے میں اہم پیش رفت ثابت ہوگا۔
