07/07/2026
گوجرانوالہ: سٹی ہاؤسنگ سوسائٹی گوجرانوالہ کی انتظامیہ کی جانب سے مبینہ طور پر اراضی مالکان کے واجبات ادا نہ کیے جانے پر متاثرین نے شدید احتجاج کرتے ہوئے شیخوپورہ روڈ کی جانب واقع سوسائٹی کے مرکزی گیٹ سمیت مختلف راستوں پر مٹی ڈال کر آمدورفت بند کر دی اور اپنی اپنی اراضی پر دوبارہ قبضہ حاصل کر لیا۔
متاثرین کا مؤقف ہے کہ سوسائٹی انتظامیہ نے 100 ایکڑ سے زائد اراضی کی ادائیگیاں تاحال مکمل نہیں کیں، جس کے باعث وہ احتجاج پر مجبور ہوئے۔ ان کا کہنا ہے کہ متعدد مقامات پر راستے بند کر کے اپنی ملکیتی زمینوں پر قبضہ واپس لے لیا گیا ہے۔
ذرائع کے مطابق فریقین کے درمیان ہونے والے مذاکرات بھی کسی نتیجے پر نہ پہنچ سکے، جس کے بعد کشیدگی برقرار ہے۔
احتجاج میں سابق ڈپٹی ڈائریکٹر فوڈ سردار احتشام الحق، سردار ریاض الحق سمیت دیگر متاثرہ زمین مالکان بھی شریک تھے۔ مظاہرین نے سٹی ہاؤسنگ سوسائٹی کی انتظامیہ کے خلاف نعرہ بازی کرتے ہوئے مطالبہ کیا کہ ان کے تمام واجبات فوری طور پر ادا کیے جائیں، بصورت دیگر احتجاج کا دائرہ مزید وسیع کیا جائے گا۔
دوسری جانب اس معاملے پر سٹی ہاؤسنگ سوسائٹی کی انتظامیہ کا مؤقف تاحال سامنے نہیں آ سکا۔
