05/09/2023
سوال یہ ہے کہ آن لائن بزنس کیوں نہیں چل پاتا۔
پہلی چیز تو یہ ہے کہ ہر کسی کو خواتین کے کپڑوں کا یا شہد، مٹھائی، حلوے کا ہی بزنس کیوں کرنا ہے؟ بچوں کے کپڑے، کھلونے، کتابیں، کچن گیجٹس، آرگینک میک اپ، نیچرل کلینرز وغیرہ یا اور بھی بہت کچھ۔ کچھ جدت لائیے۔
یہ بھی دیکھا گیا ہے کہ خریدار پیسہ لگانے سے نہیں ہچکچاتے لیکن وہ اپنے پیسے سے بہترین معیاری چیز خریدنا چاہتے ہیں۔تو آپ یہ خیال رکھیے کہ سستے کے چکر میں کوالٹی پر کامپرومائز نہ ہو۔ چیز معیاری ہو تا کہ انسان دوبارہ آپ کے پاس آنا چاہے بلکہ اپنے جاننے والوں سے بھی آپ کا تذکرہ کرے۔
پھر یہ کہ جب آن لائن سٹور کھول لیا ہے تو اس کی اچھی مارکیٹنگ کرنا سیکھیے۔ کئی بار اپنی پروفائل پر کہا کہ اپنے بزنس کو پروموٹ کریں۔ کوئی آپ سے چیز لے تو کیوں لے۔ اب لوگوں کو مارکیٹنگ کا طریقہ ہی نہیں آتا۔ وہی گھسا پٹا لنک کامنٹس میں پیسٹ کر کے یہ جا وہ جا۔ آپ مختصر، جامع اور دلچسپ انداز میں بتائیے تو سہی کہ کوئی آپ سے چیز لے تو کیوں؟ آپ کی پروڈکٹ میں، آپ کی سروسز میں ایسا کیا ہے؟
جان رکھیے کہ ہزاروں سیلرز میں سے خود کو نمایاں کرنا آپ کا کام ہے۔ ہزاروں بائیرز میں سے کسی کو اپنی جانب کھینچنا سیلر ہی کا کام ہے۔
ان سب کے ساتھ ساتھ کسٹمر سروسز بہترین ہوں۔ اول تو چیز ایسی ہو کہ کسٹمر واپس کرنا ہی نہ چاہے لیکن اگر ایسا موقع آ بھی گیا ہے تو چاہے نقصان اٹھا کر چیز واپس کرنی پڑے، کھلے دل سے کیجیے۔ یہ لانگ رن میں آپ کے لئے بہترین ثابت ہو گا۔ کسٹمر کے سوالات کا مناسب ترین جواب دینا، اسے مطمئن کرنا ضروری ہے، اور یہ سب چڑچڑے لہجے میں نہیں، بلکہ عزت کے ساتھ۔
اگر آپ مارکیٹ میں بہترین معیار کی پروڈکٹ یا سروسز لا رہے ہیں، پرانی چیز کو بھی جدت کے ساتھ پیش کر رہے ہیں، مارکیٹنگ کرنا جانتے ہیں، کسٹمر سروس ٹاپ کلاس ہے، تو اب اپنا ایک فیس بک پیج بھی بنا رکھئے جہاں لوگوں کے بہترین ریویو اپ لوڈ کر دیجیے تا کہ باقی لوگوں کو سند مل سکے۔
آپ یہاں اپنے یوٹیوب چینل، اپنے قرآن سینٹر، اپنے سمال بزنس کی تفصیلات شئیر کر سکتے ہیں۔ حلال رزق ہو اور بہت بابرکت ہو۔ دعائیں۔ لیجیے، اب کامنٹ سیکشن آپ کا ہے :)
از نیر تاباں
