10/06/2026
پشاور کے قدیم اور تاریخی علاقے بازار کلاں میں واقع یہ شاندار عمارت اور اس کے اندر قائم یہ پرانا قہوہ خانہ آج بھی ماضی کی عظمت، تہذیب اور روایات کا امین ہے۔ شاہین بازار کے عین سامنے واقع یہ مقام نہ صرف شہر کی قدیم طرزِ تعمیر کی یاد دلاتا ہے بلکہ اُس دور کی جھلک بھی پیش کرتا ہے جب قہوہ خانے صرف چائے نوشی کی جگہ نہیں بلکہ علمی، ادبی اور سماجی نشستوں کے مراکز ہوا کرتے تھے۔
یہاں برسوں سے پشاوری قہوہ، خوش گپیوں اور یادگار ملاقاتوں کی روایت زندہ ہے۔ مقامی لوگوں کے ساتھ ساتھ دنیا بھر سے آنے والے سیاح بھی اس تاریخی مقام کا رخ کرتے رہے ہیں، جہاں بیٹھ کر وہ پشاور کی مہمان نوازی، ثقافت اور صدیوں پرانی روایات کو قریب سے محسوس کرتے ہیں۔ پشاور کے قدیم بازاروں اور قہوہ خانوں کی روایت آج بھی اس شہر کی شناخت سمجھی جاتی ہے۔
وقت کے بے رحم دھارے، بدلتے حالات اور جدید تعمیرات کے باوجود یہ عمارت اور قہوہ خانہ اپنی اصل شناخت برقرار رکھے ہوئے ہیں۔ یہ صرف اینٹوں اور لکڑی کا ڈھانچہ نہیں بلکہ ہزاروں یادوں، ملاقاتوں اور گزرے زمانوں کی داستان اپنے اندر سموئے ہوئے ہے۔
سید حبیب اورکزئی — لندن
