28/05/2025
ایک غریب کی فریاد: جمعہ خان شالوانی بگٹی کی مدد کی اپیل
اوچ گیس فیلڈ نزد حیردین کے رہائشی جمعہ خان شالوانی بگٹی پر زندگی کا ایک المناک لمحہ اس وقت ٹوٹا جب اچانک اس کے گھر میں آگ بھڑک اُٹھی۔ آگ اتنی شدید تھی کہ پلک جھپکتے میں اُس کا سادہ سا مکان راکھ کا ڈھیر بن گیا۔ جمعہ خان نے اپنی مدد آپ کے تحت آگ پر قابو پانے کی بھرپور کوشش کی اور بڑی حد تک کامیاب بھی ہوا، مگر بدقسمتی سے گھر کا تمام سامان، ضروریات زندگی کا ہر ایک ساز و سامان، مکمل طور پر جل کر خاکستر ہو گیا۔
جمعہ خان ایک غریب، نادار اور محنت کش انسان ہے۔ اُس کے پاس نہ تو اتنے وسائل ہیں کہ وہ خود سے دوبارہ زندگی کا پہیہ چلا سکے، نہ ہی کوئی سہارا ہے جو اُس کی مالی مدد کر سکے۔ آج وہ کھلے آسمان تلے، ملبے کے ڈھیر پر بیٹھا انصاف، ہمدردی اور مدد کا منتظر ہے۔
ہم ضلع صحبت پور کے ڈپٹی کمشنر اور انسانیت کا درد دل میں رکھنے والے افراد، فلاحی ادارے، اور خاص طور پر او جی ڈی سی ایل کمپنی کے اعلیٰ حکام سے پُر زور اپیل کرتے ہیں کہ وہ آگے بڑھیں، جمعہ خان کی فوری امداد کریں، اور اُس کے نقصان کا ازالہ کرنے میں اپنا کردار ادا کریں۔
یہ صرف ایک شخص کی نہیں، انسانیت کی آواز ہے۔ آئیں، مل کر اُس کا سہارا بنیں اور اُس کی جلتی زندگی کو امید کی روشنی دیں۔۔
