16/07/2026
حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ کوئی مرض متعدی نہیں نہ بدشگونی ہے ، نہ صفر کا مہینہ منحوس ہے نہ مردے کی کھوپڑی میں سے کوئی الو وغیرہ نکلتا ہے ۔‘‘ ایک بدوی نے کہا : اے اللہ کے رسول ! آپ ان اونٹوں کے متعلق کیا کہیں گے جو ریگستان میں ہرنیوں کے مانند ہوتے ہیں ‘ مگر ان میں کوئی خارش زدہ اونٹ آ ملتا ہے تو سب کو خارش والا کر دیتا ہے ؟ آپ نے فرمایا :’’ بھلا پہلے کو کس نے بیماری لگائی تھی ؟‘‘ معمر نے کہا کہ زہری نے ایک آدمی کے واسطے سے حضرت ابوہریرہ رضی اللہ عنہ سے روایت کیا کہ انہوں نے نبی ﷺ سے سنا ‘ آپ فرماتے تھے :’’ کسی بیمار کو صحت مند کے ساتھ ہرگز نہ ملاؤ ۔‘‘ تو اس آدمی نے حضرت ابوہریرہ رضی اللہ عنہ سے کہا : کیا آپ نے ہمیں یہ حدیث بیان نہیں کی ہے کہ نبی ﷺ نے فرمایا :’’ کوئی بیماری متعدی نہیں ہوتی ‘ نہ کوئی صفر کا مہینہ منحوس ہے اور نہ کسی مردے کی کھوپڑی سے الو نکلتا ہے ۔‘‘ تو حضرت ابوہریرہ رضی اللہ عنہ نے جواب دیا : میں نے تمہیں ایسی کوئی حدیث بیان نہیں کی ۔ زہری نے کہا کہ ابوسلمہ نے کہا : حدیث تو انہوں نے بیان کی تھی اور میں نے نہیں سنا کہ حضرت ابوہریرہ رضی اللہ عنہ کو اس حدیث کے سوا کبھی کوئی حدیث بھولی ہو ۔
کتاب: سنن ابوداؤد
حدیث نمبر: 3911
حکم: صحیح
حضرت سعد بن مالک ؓ سے روایت ہے کہ رسول اللہ ﷺ نے فرمایا :’’ نہ الّو منحوس ہے اور نہ کوئی بیماری متعدی ہے اور نہ ہی کوئی بدشگونی ہے ۔ اور اگر بدشگونی (یعنی نحوست) کسی چیز میں ہوتی تو گھر ، گھوڑے اور عورت میں ہوتی ۔‘‘ ، رواہ ابوداؤد ۔
کتاب: مشکوٰۃ المصابیح
حدیث نمبر: 4586
حکم: صحیح
یزید تستری نے کہا : ہمیں ابوزبیر نے حضرت جابر رضی اللہ عنہ سے روایت کی ، کہا : رسول اللہ ﷺ نے فرمایا :’’ کسی سے کوئی مرض خود بخود نہیں چمٹتا ، نہ چھلاوا کوئی چیز ہے ، نہ صفر کی ( نحوست ) کوئی حقیقت ہے ۔‘‘
کتاب: صحیح مسلم
حدیث نمبر: 5796
حکم: صحیح
( عبداللہ ) ابن عطیہ رضی اللہ عنہ سے روایت ہے کہ بلاشبہ رسول اللہ ﷺ نے فرمایا :’’ نہ عَدْویٰ ( کوئی متعدی بیماری ) ہے ، نہ کوئی ہام ( اُلّو کی نحوست والا عقیدہ ) ہے اور نہ کوئی صفر ہے ، اور بیمار اونٹوں والا شخص صحت مند اونٹوں والے کے پاس پڑاؤ نہ ڈالے اور صحت مند اونٹوں والا جہاں چاہے قیام کرے ۔‘‘ لوگوں نے عرض کیا : اے اللہ کے رسول ! اس کا کیا سبب ہے ؟ تو رسول اللہ ﷺ نے فرمایا :’’ بلاشبہ یہ باعث اذیت ہے ۔‘‘
کتاب: موطا امام مالک
حدیث نمبر: 1723
حکم: صحیح
حضرت انس رضی اللہ عنہ سے روایت ہے ، نبی ﷺ نے فرمایا :’’ بیماری کا متعدی ہونا کوئی چیز نہیں ، بد فالی کچھ نہیں ، اور میں اچھی فال کو پسند کرتا ہوں ۔‘‘
کتاب: سنن ابن ماجہ
حدیث نمبر: 3537
حکم: صحیح
#صفر * #مہینہ
