29/07/2026
XOG-OGAAL
Aniga oo ku xidhnaa Dhakhtarka Guud ee Hargeysa muddo ilaa lix bilood ah, gaar ahaan qaybta kelyaha oo aan xog-ogaal buuxa u ahay, bal aan laba eray ka idhaahdo dhibkaa halkas ka jira.
Maxay yihiin adeegyada uu dhakhtarku bixiyo ee sifeynta kelyuhu?
Dhakhtarku wuxuu leeyahay mashiinno bilaash ah (free) balse aan ku filayn bukaannada, saddex (3) kaadh oo shaybaadh oo bilaash ah halkii mar (shift)—kuwaas oo ku kooban shaybaadhka dhiigga—iyo irbadda dhiigga xinjirta ka ilaalisa ee Heparin.
Maxay iibsadaan bukaannadu?
Bukaannadu waxay soo iibsadaan:
Faleembooyinka
Gooska iyo shiliishka
Dawooyinka matagga/caabuqa (infeekshanka)
Irbadda dhiigga kordhisa ee Epoetin
Gacmo-gashiga dhaymaha (Sterile gloves)
Xabagta nabarka lagu daboolo iyo agab kale.
Sidee ayayna mashiinnadu ugu filnayn bukaanka?
Bukaanka kelyaha loo sifeeyo wuxuu sida xeerka caafimaadku dhigayo u baahan yahay inuu helo usbuucii saddex (3) jeer, oo halkii marba ay tahay afar (4) saacadood—taas oo u dhiganta 12 saacadood usbuucii.
Imisa maalmood/saacadood ayay helaan bukaannada ku xidhan Dhakhtarka Guud ee Hargeysa?
Hargeysa, qofka ugu fursadda fiican wuxuu helaa usbuucii laba (2) jeer, oo halkii marba ay tahay laba (2) saacadood ilaa saddex saacadood iyo badh (2 - 3.5 saac), sida badanna saddex (3) saacadood.
Taasi waxay ka dhigan tahay: qofka usbuucii hal mar helaa wuxuu helaa 3 saacadood; kan laba jeer helaana wuxuu helaa 6 saacadood—isaga oo u baahnaa 12 saacadood usbuucii.
Maxaa dhacaya haddii uu qofku heli waayo usbuucii saddexdii jeer ee uu u baahnaa?
Waxa dhacaya:
Qofku wuu bararayaa, wuu xanuunsanayaa.
Qashinka dhiigga ku jira ayaa isbiirsanaya oo xanuunno hor leh keenaya.
Cunto ma cuni karo, cabitaan hadalkiisaba daa.
Naqaska ayaa qabanaya, ma seexan karo, mana jiifsan karo.
Jidhka ayay biyo galayaan, ugu dambayna wuxuu noqonayaa xaalad u dhexaysa nolol iyo geeri, iyadoo ay u dheer tahay inaanu joogin dhakhtar takhasus ah.
Maxay u baahan yihiin bukaannadu?
Mashiinno ku filan: In ay helaan usbuucii 3 jeer oo markiiba 4 saacadood ah.
Dhakhtar Takhasus ah: In la helo dhakhtar kelyaha ku takhasusay (Nephrologist).
Taageero Dhaqaale iyo Agab: Kaabis dhaqaale, agab, iyo dawooyin bilaash ah.
Kaadh Caafimaad: In qof kasta oo u baahani uu si dhib yar ku heli karo.
Si guud, intaasi waa baahiyaha aasaasiga ah ee cabashadu ka taagan tahay. Inta ogaalkayga ah, ma jirto siyaasad kale oo dabada ka riixaysa ee dadkaas waxa ka hadliinaga waa naf , waxayna u baahan yihiin gurmad bini-aadanimo oo degdeg ah!
Xogtaasi waa sida aan ku ogaa dhawr usbuuc ka hor, cabashaduna waxay taagnayd wakhti dheer. Marka, idinka ayaa ka jawaabi doona: Ma siyaasad ayaa ku jirta dadkaas, mise wasiirka ayaan xog-ogaal ahayn, mise waa loo badheedhayaa?!
