Ҳаёт манзиллари / Hayot manzillari

01/09/2025

16/09/2024

Абдулла Орипов

АЖИБ ҲОЛАТ

Етаклайди сўқирни сўқир,
Шуълаларга қасида ўқир.

Кар одамга қўшиқ айтар кар,
Иккинчиси бақирар баттар.

Улар бари мард эрур ғоят,
Ўз ҳолидан қилмас шикоят.

Дуч келсак-да ёмонга, бироқ
Яхшиларни койиймиз кўпроқ.

✍🏻2016 йил 1 сентябрь

06/07/2024

Бу дунёда тасодиф бўлмайди: ё синов ё жазо, ё мукофот, ё ҳикмат.

06/07/2024

Ҳар буюк шахс ортида – китоб туради!

29/06/2024

Бу ўзбек аёли, олима аёл!

Ватан равнақини истаб яшайди,
Илмдан доимо яшнаб яшайди.
Ҳалол ризқни доим ошаб яшайди,
Бу ўзбек аёли, олима аёл!

Маърифат бўстони асли сизлардан,
Ёшлар ўрнак олар сиздек инсондан.
Қизлар юринг мана азиз излардан,
Бу ўзбек аёли, олима аёл!

Не-не кашфиётлар яратябди,
Дунё аҳлини лол қаратябди.
Инсон машаққатин аритаябди,
Бу ўзбек аёли, олима аёл!

Ишдан қайтгандан сўнг дам ҳам олмайди,
Уйда рўзғор қилиб сира толмайди.
Меҳнат қилиб ҳеч ҳам хордиқ олмайди,
Бу ўзбек аёли, олима аёл!

Қайғусин кўзида ёши айтмайди,
Юрган йўлларидан сира қайтмайди.
Юксак марраларни доим кўзлайди,
Бу ўзбек аёли, олима аёл!

✍️ Камолиддин САМАРҚАНДИЙ
(Камолиддин Комилов)

28/06/2024

Шайтоннинг феъли!

Дурадгорлар ишлатадиган “шайтон” деган асбоб бор. Қайси томон баланд бўлса, “лип” этиб ўша томонга ўтиб олади. Бунақалар одамлар орасида ҳам учраб туради. Қизиғи шундаки, биров ундан “кеча у томонда эдинг, бугун нега бу томонга ўтиб олдинг?” деб сўрамайди.

“Шайтон”нинг шайтонлиги ҳам шунда бўлса керак-да!..

Ўткир Ҳошимов, “Дафтар ҳошиясидаги битиклар”

27/06/2024

Бу жазирама иссиқда ўзингизни эҳтиёт қилинг, куйиб кетманг. Муздек сув ичиб, салқин жойда ўтиринг.
Бугун энг иссиқ кун эканмиш😊

Ҳаёт манзиллари / Hayot manzillari

26/06/2024

Ҳолингизда маъюслик мўл ―
Ким учун бу ғам ― аза?
Мана сизга покиза қўл,
Мана сизга қалб ― тоза.

Юрагимнинг ҳорғин вазни
Дунёга, сизга аён.
Баъзан баҳор, баъзан ҳазин
Куз баҳрида намоён.

Бунча нафис, бунча ростсиз ―
Чиройингиз ― ботартиб.
Юрагимда тиниқ ёшсиз,
Йиллар қўёлмас артиб.

Бу паришон ҳолингизда
О, кетасиз қайтмасдан.
Рухсат беринг, ёнингизда
Юрай ― бир сўз айтмасдан.

Қор кечади ялангюрак
Кўчалар қиш ― кетгунча.
Айтинг, неча умр керак
Биз манзилга етгунча?

© Усмон Азим

20/02/2024

КИЧКИНА КАТТАЛАРГА

Мартаба берганда феъл ҳам берса кенг,
Адлу мурувватдан қилмаса жудо.
Даргоҳи катталар бор бўлсин, лекин
Кичик катталардан асрасин худо.

Сен бирор эшикка бош уриб борсанг,
Юз бор ҳақ бўлсанг-да битмаса ишинг,
Билки, кўкси ичра қалб эмас, харсанг,
Кичкина каттадир учраган кишинг.

Сен олим бўлсангу ихтиро билан
Лол қилгудек бўлсанг агар дунёни,
Сенга йўл очгунча бир имзо билан
Кичкина каттанинг узилар жони.

Тадбиркор бўлсангу эл нафи учун
Бир тадбир ўйласанг, изласанг чора,
Улар топар албат ечилмас тугун,
Суягинг қолгунча қилар овора.

Аскар қасам ичар бўлмоққа фидо,
Табиб қасам ичар бахш этмоққа жон.
Кичкина катталар онт ичар аммо
“Фалон бўлай, сени қилмасам сарсон”.

Чинор бўлсанг, улар кемиргувчи қурт,
Пўлат бўлсанг, улар емирувчи занг.
Эй тангрим, эл унмас, қад кўтармас юрт
Кичик катталарга инсоф бермасанг.

Ҳеч кимса бўлмаган дунёга устун,
Уқбога зар олиб кетмаган одам.
Каттаю кичикнинг бошида бор кун
Келар, ахир кичик катталарга ҳам.

Мен шеър айтдим, холос, не ҳам қилай ман,
Не илож, изтироб жонга ўт қалар.
Фақат кўнглингизга имон тилайман,
Диёнат тилайман, кичик катталар.

✍️Ўзбекистон Қаҳрамони, Ўзбекистон халқ шоири Эркин Воҳидов, 2000 йил

16/02/2024

Кишига билганингни ўргат-у, ақл ўргатма.

Бошқаларга қулоқ тут, бироқ айтилган гапларнинг барини тўғри деб ўйлама.

Сукут сақлаган кишини бевоқиф, кўп гапирган кишини ақлли, деб билма.

Ҳаммани ўзингдай кўра кўрма!

Ким бўлишидан қатъи назар, кишини паст деб топиш – аҳмоқлик, кўкка кўтариш – қўрқоқликдир.

Онгли равишда содир этилган жасоратгина ҳақиқий жасорат, саводсизликдан келган жасорат – жаҳолатдир.

Жалолиддин Румий

31/01/2024

Бу ўзбек аёли, ўзбек онаси

Бир қўлда бешик, бир қўлда боласи,
Дард алам чекса ҳам чиқмас ноласи.
Ҳеқ қачон узулмасди мехр толаси,
Бу ўзбек аёли, ўзбек онаси.

Файзидан хонадон ораста бўлар,
Ўсмалар қошига пайваста бўлар.
Гуллар қўлларида гулдаста бўлар,
Бу ўзбек аёли, ўзбек онаси.

Вафодор ёрига садоқати бисёрдир,
Кимлар унга ёр, кимлардир ағёрдир.
У шундай оқила, шундайин ёрдир,
Бу ўзбек аёли, ўзбек онаси.

Кимлар кўнглин олиб қадрига етар,
Кимлардир хор қилиб ташлаб ҳам кетар.
Фаришталар унга савоблар битар,
Бу ўзбек аёли, ўзбек онаси.

Алломалар атаб ғазаллар битган,
Севганлар қўлига гулларин тутган.
Не – не даҳолар ҳам етолмай ўтган,
Бу ўзбек аёли, ўзбек онаси.

Турсуной Ваҳобова

Ҳаёт манзиллари / Hayot manzillari