24/09/2026
ලොව සුප්රකට සුපිරි මෝටර් රථ, Formula 1 රථ නිෂ්පාදකයකු වන McLaren සමාගම සිය නවතම සන්නාම සංකේතය නිල වශයෙන් එළිදක්වා තිබෙනවා.
නවතම McL 6GT මාදිලියේ මෝටර් රථය සමඟින් කරළියට පැමිණි මෙම නව ලාංඡනය පිටුපස ඉතා හැඟීම්බර මෙන්ම අභිමානවත් අතීත කතාවක් සැඟවී තිබෙනවා.
මෙම නව අකුරු රටාව සහිත ලාංඡනය නිර්මාණය කිරීම සඳහා ආභාසය ලබාගෙන ඇත්තේ, McLaren සමාගමේ නිර්මාතෘ Bruce McLaren ගේ පවුලට අයත්ව නවසීලන්තයේ Auckland නගරයේ Remuera හි පිහිටා තිබූ පවුලේ වාහන Service Station එකෙහි සවිකර තිබූ නාමපුවරුවෙනි.
Bruce McLaren සිය ප්රථම ජයග්රාහී මෝටර් රථය නිර්මාණය කළේද මෙම සේවා ස්ථානය තුළදී වීම විශේෂත්වයකි.
McLaren සමාගමේ Chief Creative Officer ලෙස කටයුතු කරන David Woodhouse සඳහන් කරන ආකාරයට, මෙම වෙනස්කම් හරහා සමාගමේ අනන්යතාවය තවදුරටත් ශක්තිමත් කෙරෙනු ඇතියි.
දැනට භාවිත වන සුප්රකට Speedmark ලාංඡනය ඉවත් නොවන අතර, එයද ඉදිරියට භාවිත වන නමුත් නව නාම අකුරු රටාව ඉදිරියේදී ප්රධාන ලෙස කැපී පෙනෙනු ඇතැයි ඔහු සදහන් කොට තිබෙනවා.
මෙම නව අකුරු රටාව McLaren Automotive අංශය සහ McLaren Racing අංශය යන අංශ දෙකම එකම තේමාවකට ගෙන ඒමට භාවිත කිරීමට අපේක්ෂා කෙරෙනවා.
තරඟ සදහා භාවිතා කෙරෙන මෝටර් රථ සඳහා McLaren සමාගමේ අනන්යතාවය වන Papaya හෙවත් තැඹිලි වර්ණය දිගටම භාවිත වන අතර, සාමාන්ය මහාමාර්ග සඳහා නිපදවන මෝටර් රථ සඳහා තද නිල් පැහැය ප්රධාන වර්ණය ලෙස හඳුන්වා දී තිබෙනවා.
මෙම නව ලාංඡනය හරහා McLaren සමාගම සමාගමේ නිර්මාතෘ Bruce McLarenගේ මූලාරම්භයට සහ අතීත උරුමයන්ට ඉහළම ගෞරවය පුද කරමින් සිය අනාගත මෝටර් රථ යුගයට පා තැබීමට සූදානම් වනවා.