30/04/2026
متحدہ عرب امارات کی حکومت نے غیر ملکی سرمایہ کاروں کے لیے دبئی کے ویزا قوانین میں اہم نرمی کا اعلان کیا ہے، جس کے تحت جائیداد کی خریداری پر 2 سالہ رہائشی ویزا حاصل کرنا اب پہلے سے زیادہ آسان ہو گیا ہے۔
نئی پالیسی کے مطابق 2 سالہ انویسٹر ویزا کے لیے سنگل اونر (Single Owner) کی سابقہ شرط ختم کر دی گئی ہے، اور اب مشترکہ ملکیت (Joint Property) پر بھی ویزا حاصل کیا جا سکے گا، بشرطیکہ ہر سرمایہ کار کا حصہ کم از کم 4 لاکھ درہم ہو۔ اس اقدام کا مقصد چھوٹے اور درمیانے درجے کے سرمایہ کاروں کو دبئی کی جانب راغب کرنا ہے۔
ویزا پالیسی کے دیگر پہلوؤں میں 5 سالہ ریٹائرمنٹ ویزا کے لیے 10 لاکھ درہم کی سرمایہ کاری کی شرط برقرار رکھی گئی ہے، جبکہ درخواست دہندہ کی عمر کم از کم 55 سال ہونا ضروری ہے۔
اسی طرح 10 سالہ گولڈن ویزا کے لیے 20 لاکھ درہم کی سرمایہ کاری کی حد مقرر ہے۔ اس ویزے کے حامل افراد کو اہل خانہ اور گھریلو ملازمین کو اسپانسر کرنے کی سہولت حاصل ہوگی، جبکہ طویل عرصے تک ملک سے باہر رہنے کے باوجود ویزا برقرار رکھنے کی اجازت بھی دی جائے گی۔
معاشی ماہرین کے مطابق ان نئی سہولیات سے دبئی کی رئیل اسٹیٹ مارکیٹ میں مزید بہتری آئے گی اور دنیا بھر سے سرمایہ کاروں کی دلچسپی میں اضافہ ہوگا۔
