24/02/2026
Nis sot në datë 24 Shkurt 2026 Rrivlerësimi i pasurisë së paluajtshme, përgjatë gjithë vitit vetëm 5%!
Të gjithë pronarët e pasurive të paluajtshme kanë mundësi të bëjnë rivlerësimin me vlerën e tregut deri më 31 dhjetor 2026, sipas Ligjit nr. 85/2025. Ky proces ju mundëson të përditësoni vlerën e pronës suaj dhe të siguroheni që tatimi të përllogaritet sipas vlerës aktuale të tregut.
Si mund të bëni rivlerësimin:
Përmes një eksperti të licencuar për vlerësimin e pasurisë së paluajtshme,
Përmes drejtorive vendore të Agjencisë Shtetërore të Kadastrës, referuar çmimeve minimale fiskale.
Si përllogaritet: 5% e diferencës midis vlerës së përftuar nga procesi i rivlerësimit (sipas çimeve minimale në fuqi) dhe vlerës së zbritshme sipas aktit të fundit të regjistruar në ASHK (kontratë blerje, trashëgimi, dhuratë, heqje dorë apo rivlerësimi i fundit i kryer)
Cmimi minimal fiskal konsiderohet:
Për ndërtesat - çmimi i referencës
Për tokën – çmimi sipas hartës së vlerave.
Të gjitha kërkesat për rivlerësim duhet të dorëzohen deri më 31 dhjetor 2026.
Si të aplikoni:
Përmes llogarisë suaj në portalin e-Albania, aplikoni “Rivlerësimi i pasurisë” dhe shtoni shërbimin “Lëshim kopje kartele të pasurisë së paluajtshme”
Në rast se keni kryer rivlerësim përmes një eksperti të licencuar bashkëngjitni në aplikimin tuaj aktin e vlerësimit të kryer nga ai dhe një kopje të licensës të ekspertit.
Pas përllogaritjes së vlerës së rivlerësimit, ju do të pajiseni me faturën përkatëse në profilin tuaj në e-albania.
