25/08/2026
إيه حكمتك يارب 💔
كيرلس وديع .. شاب جميل، من قرية "الكشح" بسوهاج، معروف بأدبه وأخلاقه، وكان امبارح بالليل يوم فرحه ..
كل حاجة كانت ماشية زي ما أي عريس يحلم ..
الكنيسة، والزفة، والفرح، والقاعة، والناس حواليه فرحانة بيه وبعروسته، والدنيا كلها بتقول إن دي بداية أجمل حكاية في حيات مع حبيبته كارول 🤍
وبعد ما الفرح تمام، والناس انبسطت ، جه الوقت اللي كان المفروض يبدأ فيه كيرلس أول مشوار مع عروسته كارول ..
راح يركب العربية وفجأة وقع من طوله ..!
العربية اللي كانت المفروض توصله هو وعروسته لبداية حياتهم سوا، بقت هي نفسها العربية اللي نقلته للمستشفى ..
وفي لحظات قليلة جدًا، كل حاجة اتغيرت ..
الزغاريد بقت صمت ..
والضحكة بقت صدمة ..
والفرحة بقت دموع ..
وأجمل يوم كانت أسرة كيرلس مستنياه، اتحول لأصعب يوم ممكن يعيشوه.
إزاي الإنسان يقدر يستوعب إن شخص كان من ساعات واقف وسط الناس عريس، ببدلته وفرحته، يصبح فجأة في المستشفى والكل بيجري علشان ينقذ حياته؟
أحيانًا الحياة بتحطنا قدام حاجات أكبر من قدرتنا على الفهم .. وبنفضل نسأل: ليه؟ وليه دلوقتي؟ وليه بالطريقة دي؟
ومهما حاولنا نلاقي إجابة، بنكتشف في الآخر إن مفيش غير ربنا نقدر نسند عليه قلوبنا المكسورة.
ربنا يرحم كيرلس ويجعله في أحضان القديسين
Kero Wadeeh
ويعزي قلب عروسته اللي ما لحقتش تعيش معاه أول يوم في بيتهم، ويصبر أهله وكل شخص حبه وعاش معاه فرحته.
يا رب .. ادّيهم قوة من عندك، لأن فيه وجع بيكون أكبر من أي كلام، وأصعب من إن القلب يستحمله لوحده. 🙏🏻💔
