15/10/2025
زي ما ظهور أبلكيشن "إنستاباى" من 3 سنين تقريباً عمل طفرة وبقى شيء أساسي في حياة معظمنا فيه أبلكيشن تاني جديد اسمه "هوية" البنك المركزي بيستعد لإطلاقه بشكل رسمي خلال الأيام الجاية.. التطبيق هيكون عبارة عن نسخة إليكترونية آمنة من بطاقتك لكن على موبايلك مش متشالة في محفظة..
يعني إيه؟.. يعني بدل ما تطلع بطاقتك البلاستيك في كل مشوار محتاج فيه تثبت شخصيتك هيكون التطبيق ده بـ "الكيو آر كود" اللي عليه هو وسيلة حكومية رسمية تعرّف بيها نفسك وأنت قاعد مكانك..
طيب "الكيو آر كود" هيكون فيه إيه؟.. كل شيء يخصك.. رقمك القومي + صورتك + مؤهلاتك + حالتك الإجتماعية + بصمة إيدك + بصمة وجهك +رقم موبايلك اللي بيتربط جوّا هويتك الرقمية..
إيه اللي هتقدر تعمله من خلال "هوية"؟.. خُد عندك: هيمنع إنتحال شخصيتك.. هتمشي في الشارع بدون بطاقتك البلاستيك وهيبقى الأبلكيشن بـ "الكيو آر كود" اللي عليه هو البديل لـ شيل البطاقة.. هتقدر تفتح حساب بنكي أو محفظة إليكترونية وأنت في البيت بدون ما تروح فروع ولا تقف في طوابير.. هتقدر كمان تعمل أي معاملات رسمية من مكانك.. هتقدر تثبت هويتك قدام شركات الإتصالات ..
الأبكليشن هيكون مؤمن تأمين قوي سواء من ناحية التشفير أو الـ FaceID يعني محدّش هيقدر ينتحل شخصيتك، والمفروض إننا نخلص بعدها من قصة تليفونات النصـــ ب اللي بتيجي عشان تستولى على بياناتنا وحسباتنا خصوصاً مع أهالينا كبار السن..
بالمناسبة.. الأبلكيشن ده موجود في معظم دول أوروبا وفي أمريكا وفي كذا دولة عربية.. مش مهم إننا بنعمله متأخرين بس الأهم إننا جايين.
