07/09/2025
ركز معايا في الكلمتين دول عشان مهمين👌
فيه خسوف كلي للقمر يوم الأحد الجاي 7 سبتمبر.
الخسوف من آيات التخويف اللي بيخوف الله بها الناس عشان نركز في آيات الكون ونعرف النعم اللي إحنا فيها وقدرة ربنا علينا، وهو فرصة جميلة للدعاء والتضرع لله بكشف الغمة اللي إحنا فيها.
👈 طيب إحنا المفروض نعمل إيه وقت الخسوف؟؟
المفروض نتضرع لربنا ونلجأ ليه زي ما النبي ﷺ علّمنا ونصلي صلاة الخسوف.
حسب اللي قاله معهد الفلك: ذروة الخسوف في مصر الساعة 9 وربع مساءً وهينتهي الساعة 11 مساءً والله أعلم.
⛔ صلاة الخسوف بتتصلى إزاي؟
عددها ركعتين ✌
👈 الركعة الأولى هنعمل الآتي:
هنقرأ الفاتحة وبعدين قراءة طويلة لأي سورة.
وبعدين نركع.
وبعدين نقوم من الركوع ونقول: "سمع الله لمن حمده".
ركّز معايا... مش هتسجد بقى ❌.
هتبدأ تقرأ الفاتحة مرة تانية وتقرأ سورة مرة تانية.
وبعدين نركع تاني ونقوم من الركوع، وبعدها نسجد السجدتين.
وبكده نكون خلصنا أول ركعة.
هنكرر نفس الخطوات في الركعة التانية.
👈 المفروض نطوّل في القراءة على قد ما نقدر (والأفضل طول وقت الخسوف)، والقراءة في الركعة الأولى تكون أطول من التانية.
👈 طيب ينفع أقرأ من مصحف في صلاة الخسوف؟
_ أيوه، ينفع عادي.
👈 طيب ينفع أصليها لوحدي من غير جماعة؟
_ الأصل إنها بتتصلى في جماعة، لكن ينفع تصليها لوحدك من غير جماعة.
👈 طيب أنا هكون في الشغل أو في الدروس ومش هعرف أصلي، أعمل إيه؟
_ يبقى عليك إنك تلزم الذكر والدعاء والاستغفار، لحديث النبي ﷺ:
"فَإِذَا رَأَيْتُمْ شَيْئًا مِنْ ذَلِكَ فَافْزَعُوا إِلَى ذِكْرِهِ وَدُعَائِهِ وَاسْتِغْفَارِهِ".
تمام كدة عرفت هتعمل ايه يومها ؟
