07/06/2026
المنصورة من 115 سنة
واللى خلق الخلق الصورة دي أعجوبة من أعاجيب الزمان ولولا إن إنا إللي جايبها وعارف جايبها منين وواثق و100% منها لو كان حد قاللي عليها مكنتش صدقت مكانها فين؟ تخيل الصورة دي فين؟!
اولا.. الصورة دي عمرها طويل جدااااااا قول مثلا 115 سنة واللى صورها رجل فرنسي اسم لويس لاكروا من فوق متن مركب بخاري,,
لو انت من المنصورة ركز معايا
اللى على اليمين دا مبنى ري الدقهلية ومكانه دلوقت مكتبة مصر العامة زي ما سمعت واللى على الشمال البنك الزراعي المصري ومكانه حاليا برضوا البنك الزراعي المصري على ناصية شارع الجيش الحالي.
← فرع القناة اللى في النص دا اللى واقف فيه المراكب مكانه حاليا مبنى محافظة الدقهلية ... أي والله .. وكان اسمه البحر الصغير ..
← خد عندك كمان الشارع الترابي اللى على الشمال دا من 100 سنة قاموا برصفه واسموه شارع الأمير فاروق والشارع الترابي اللى عليى اليمين اسموه شارع سعد زغلول ..
← وسنة 1957 تقريبا قام الوزير عبد اللطيف بغدادي ابن المنصورة بردم هذه الترعة ونقلها إلى مكانها الحالي في قولنجيل .. وسنة 1960 بنوا عليها مبنى محافظة الدقهلية اللي تم افتتاحه سنة 65 تقريبا ، والميدان اللى فيه تمثال أم كلثوم ثم جامع النصر المفتتح سنة حاجه وسبعين ..
← اكتر تعليق فصلني ضحك من أحد متابعي الصفحة لما قال لي : انت بتجيب تاريخ المنصورة من وقت لما كانت لسا على المحاره..
د. إيهاب الشربيني
