22/03/2024
نصاءح......
وانت بتشترى شقة
(١) مهم جدا عمر المبنى بمعنى تاريخ انشاؤه فالشقة اللى مبنية من سنتين تلاته سعرها غير الشقة اللى مبنية من ١٥ ل٢٠ سنه او أكتر
فالمبنى القديم اكيد خرسانة الاعمدة والأسقف ضعفت والحديد صدى خاصة لو كانت السباكة سوقية وشغل اهالى وده بيظهر لو بصيت على مواسير الصرف وحوائط المنور وبالتالى بتكون سبب ان المبنى مش حيعيش كتير حتى لو كانت الشقة مدهونه وشكلها كويس
(٢) لو فيه بدروم لازم تدخل تشوفه وتشوف هل فى الأرضية مياه جوفيه وهل الاعمدة سليمة مفيهاش شروخ او صدأ
ولو لقيت البدروم مقفول وممنوع الدخول امشى ومتشتريش
(٣) خد بالك
لازم تعرف انت حتشترى من مين بمعنى اللى بيبيع يكون هو نفسه مالك الشقة
ولازم يكون معاك محامى عشان يراجع تسلسل أوراق الملكية
ولو بتشترى من مقاول ممكن يكون له شركاء والشقة اللى بيبيعها مش من نصيبه
او انه بيبيع الشقة الواحدة كذا مره عشان كده السؤال عن سمعة المقاول مهمه
ومهم جدا جدا جدا إن التوقيع على عقد البيع يكون أمامك مفيش إحراج فى الموضوع ده سيبك من الثقة الزايده
(٤) وياريت لو تسأل مكوجى او بواب فى المنطقة عن العمارة وعن الشقة ممكن تعرف حكاية مستخبية
زى إن العمارة بدء يظهر فيها شروخات أو بدأت تميل فالسكان بدأ يبيعوا شققهم
او زى القتيل اللى بسببه بيبيعوا الشقة
او البلطجى أو الجار المشاغب اللى ساكن فى العمارة والسكان بتعزل بسببه
(٥) خد بالك
لازم تشوف مطلات الشقة بمعنى ممكن شباك الغرفة يكون منور وزى الفل بس لانه بيطل على أرض فضاء او بيت قديم ممكن يتبنى ويسد عليك
(٦) خد بالك
وعاين بنفسك وشوف بعنيك واطلع السطح برجليك
هل الشقة بالدور الاخير ولا فوقيها دور
لأنها لو كانت الدور الاخير حيكون فيه مشكله لازم تعرفها وتعمل حسابها
لو السطح مش معزول ضد المياه السقف حيسرب مياة الشتاء يبقي لازم السطح يكون معزول
(٨) خد بالك
هل الشقة بتطل على مدرسة او حضانة لأنك حتقوم مع جرس المدرسة يوميا وحتحضر طابور الصباح والفسحة
او يكون اسفل المبنى قهوة بلدى بتستغل الشارع والرصيف وتضايق السكان
او فرن بلدى او مستودع انابيب بوتاجاز
او بياع سمك او مشويات دخان الشوى حيخليك قافل الشبابيك طول اليوم
(٩) خد بالك
اوعى تشترى شقة فى دور عالى فيها أسانسير واحد لازم على الاقل اتنين اسانسير لانه بيعطل وحتضطر كتير تطلع على رجليك
وفيه مقاولين بيركب باب الاسانسير فقط للايحاء بوجود اسانسير ومش حيركبه
(١٠) إتأكد إن إسم عداد الكهرباء والمياة والتليفون والغاز بنفس إسم اللى بيبيع ومفيش إختلاف
(١١) خد بالك
اوعى تشترى شقة لسه حتتبنى إلا لو من شركة معروفة ومحترمة وليها سابقة اعمال
غير كده اشترى الشقة بعد معاينتها على الطبيعة ونعرف طبعا الشقة لما تكون داخل الرخصة افضل وأأمن من الشقق المخالفة لأنها ممكن يكون ليها ازالة من الحى
وخلى بالك ممكن العمارة لها رخصة لكن الشقة مخالفة فى دور زيادة عن عدد الادوار المسموح بيها
واشغلها وحط عفشك بمجرد شراءها وغير كالون الباب. منقول ملحوظة اكتب تعليق علي المنشور وقم بعمل اعجاب ومتابعة للصفحه لكي يصلكم كل جديد
كل عام وانتم بخير
