31/08/2024
معظم سكان طنطا صادفوا نصابين شركة ايمدج في المولات والشوارع وكتير منهم وقعوا ضحايا لنصبهم وانا واحد منهم.
هحكيلكم في المنشور ده تفاصيل نصباية تمليك حصة في شاليه وهمي ملوش وجود وازاي بيقنعوا الناس ويستنزفوا أموالهم ويأكلوها بالباطل.
بداية النصباية هتلاقي واحد من المندوبين بتوعهم لابس لبس كويس وبيوقفك في اي مول ويقنعك انك بحاجه ماسة انك تصيف انت وأهلك في مكان كويس وبدل اما تشتري شاليه بمبلغ وقدره عشان تصيف فيه اسبوع او اسبوعين في السنة انت ممكن تشتري حصة بس في الشاليه بمشاركة مجموعة تانية من الاشخاص والشركة هتكون مسؤولة عن التنظيم ومش بس كده لا ده كمان لو زهقت من المكان الشركة ممكن تبدل لك كل سنه مكان تاني مع حد تاني تقضي فيه المدة بتاعتك.
وعشان يجيب رجلك اكتر بيعملك دعوة تزور الفرع وياخد منك اي حاجه رهن عشان يضمن انك تروح الفرع ويعرفوا ينصبوا عليك كويس.
بعد انا تروح الفرع بيخليك تقعد انتظار ويجيبلك عصير تانج بشلن عشان تتفرج على بروفة الفيلم الحمضان بتاعهم، اللي هو حد يدخل غرفة مع احد كبار النصابين وبعد اما يلبسه في عقد يخرج من الغرفة ويسقفوله ويوزعوا عليه شوية جوايز عبيطة (بيلبسوه الطاسه)، تقوم انت تتحمس انك تاخد دورك في الخزوقه.
وبالفعل بعد اما تاخد دورك وتلبس انت كمان وياخدوا منك مبلغ محترم, وتاخدلك يومين مصيف هدية, تبدأ تفوق لنفسك وتقرأ العقد كويس وتلاقي الخوازيق وتفكر ترجع في كلامك تلاقي خازوق بيضيع عليك كل الفلوس اللي دفعتها.
هتضطر تكمل وتستنى تشوف ايه هيحصل بعد كده.
يجي بأه معاد المصيف تكلم الشركة عشان تحجزلك المدة بتاعتك، لو انت مسدد كل أقساطك المستحقة هيقلولك مفيش مواعيد قريبة ويرموك في وقت يكون موسم المصايف خلص فيه ولو لسه باقيلك أقساط هيقولك مينفعش تحجز الا اما تدفع القسط ويجيبوا معاك ناعم ويحجزولك بشرط تدفع الأقساط.
حصل معايا بأه اني عملت ناصح ومدفعتش القسط الا في اخر ميعاده وحجزت في وقت كويس وبعد شوية لاقيتهم بيكلموني بيقولوا تدفع الأقساط الباقبة وتاخد عليها خصم قولتلهم ماشي ووقعت في الفخ ودفعت كل الأقساط اللي في العقد.
خلصت كل الأقساط والمفروض بأه تروح كل سنة بدون اما تدفع حاجه الا مصاريف الصيانة اللي هي ٥٠٠ جنيه دفعوني ٢٠٠٠ جنيه اصلا الكهربا غليت، دفعت الالفين جنيه.
باقي على موعد الحجز اسبوع اتصلت عليهم عشان اذن الدخول للقرية قالولي هنبعته قبلها بيوم، قبلها بيوم مبعتوش حاجه, اتصلت عليهم ١٠ مرات يوزعوني لبعض ويقفلوا السكة في وشي ما خلاص بأه خدوا اللي عاوزينه.
تاني يوم برده اتصالات ونفس القصة فاضطريت اروحلهم الشركة والحمد لله اني مسافرتش للقرية، طلعلي مسؤول وقعد يحور عليا ويقولي اصل انت عليك ١٣٠٠٠ جنيه عشان كده لغوا الحجز بتاعك(طيب على الاقل كلموني وعرفوني)، قولتله بتوع ايه قالي وديعة صيانة قولتله ما انا لسه دافع ٢٠٠٠ جنيه صيانه قالي مهو بدل اما تدفع كل سنة هنبقى ناخد من الوديعة قولتله لا انا عاوز ادفع كل سنه زي العقد، قالي طيب بص انت عليك ١٠% من قيمة التعاقد ضرايب عقارية لازم تدفعها (الضرائب العقارية المفروض على صافي الربح من الإيجار مش قيمة العقار) قولتله الكلام ده مش مظبوط وانتم بتحوروا وتنصبوا علينا قالي مش هينفع تدخل اي شاليه تبعنا الا اما تدفع اللي نقولك عليه، طبعا مرضيتش ادفع وسيبته ومشيت وقررت اني أشارك التجربه مع الناس وأحذرهم وبجهز مع المحامي أوراق قضية النصب والاحتيال دي.
