05/11/2025
საჯარო მიმართვა ბიზნესომბუდსმენს!
საჯაროდ მივმართავთ საქართველოს ბიზნესომბუდსმენს ბატონ ოთარ დანელიას,
ბატონო ოთარ,
სს „სფერო ინვესტი“ პირველი ქართული საინვესტიციო კომპანიაა, რომელიც არის საფონდო ინსტიტუციის ფლაგმანი და რომელმაც შექმნა ფულადი სახსრების მოზიდვის და კაპიტალდაბანდების განსხვავებული მოდელი, ვიდრე ეს საბანკო სესხებით სარგებლობაა. მისი პროდუქტებით წლები სარგებლობდა მოსახლეობა, გასცემდა ბანკზე მეტ სარგებელს და ქმნიდა უძრავ ქონებას მყარი კაპიტალის სახით. სწორედ ამიტომაც, სს „სფერო ინვესტი“ იქცა ქართული კომერციული ბანკების სამიზნედ, რომელთაც მასში კონკურენტი დაინახეს და დაუწყეს ბრძოლა არაკეთილსინდისიერი მეთოდებით. ჯერ იყო და 2025 წლის ივნისში, „თიბისი ბანკმა“ დაუხურა საბანკო ანგარიშები სს „სფერო ინვესტს“ ბანკის შიდა პოლიტიკიდან გამომდინარე - ყოველგვარი განმარტებისა და დასაბუთების გარეშე. შემდგომ, იგივე გაგრძელდა სხვა ბანკებშიც...
ანგარიშების გაუქმების გამო ფულადი მიმოქცევის შეწყვეტამ და დაინტერესებული ოპოზიციური პირებისა და ოპოზიციური ტელევიზიების მიერ აგორებულმა კამპანიამ, ფინანსური სირთულეების წინაშე დააყენა კომპანია. ამ მოვლენების გამო, თანხების გრაფიკით დაბრუნების ნაცვლად კომპანიას უწევს თანხების ერთიანი დაბრუნება,
პრობლემის შესახებ ვაცნობეთ საქართველოს ეროვნულ ბანკს, მაგრამ მათგან არ მიგვიღია პასუხი. საბანკო ანგარიშების აღდგენის გარეშე კი შეუძლებელი იქნება კომპანიის ფუნქციონირება.
ფაქტობრივად, მიმდინარეობს ბიზნესის შევიწროება და განადგურება, რაც სს „სფერო ინვესტის“ ასობით მომხმარებელს აზარალებს. ეს მაშინ, როცა 2025 წლის ივნისამდე კომპანიის კაპიტალის ზრდა ყოველწლიურად გეომეტრიული პროგრესიით მიმდინარეობდა.
გთხოვთ თქვენ თანადგომას, საკითხის კანონიერ შესწავლას და სამართლიანი გადაწყვეტილების მიღებას საბანკო ანგარიშების აღდგენაზე.
სს „სფერო ინვესტის“ ადმინისტრაცია
