15/03/2025
近日收到一系列的貴價物業, 其實呢D貴價LIST, 我地公司久唔久都會收到... 收到的同事們循例就會開番盤啦, 突然間, 聽到佢哇的一聲...
先講下呢位同事KENNETH, 佢既地產資歷可以話係我地公司最長既, 數埋數埋都有30年從事地產經驗。睇過, 賣過既豪宅物業真係無百間都大幾十間, 基本上香港唔會有好多物業會令佢有咁既反應。而今次呢間皇府灣下排屋, 就令佢興緻出晒嚟。點解呢? 因為原來當年佢做緊一手樓花組時, 皇府灣亦同時開賣, 當時新地現樓發售時, "特點"就係無得睇樓... 而小篇曾經有幸睇過佢既上排細屋已經足夠議論一陣子...
今次呢張豪宅LIST, 最囑目既就係一間皇府灣既下排屋。3302呎實用, 採上行4房雙套3廳間格再加一個可以放3部車既車庫同埋前後花園, 4間房裡邊有3間都可以享受大潭灣全海景加海灘景, 由於佢唔剩係得海景, 而且仲可以隔個海望倒赤柱, 所以佢呢個海景喺夜晚都叫有啲野睇, 唔會漆黑一片, 可以話係南區海景中既極品。
入到屋既第一層就係一個非常方正而且樓底非常高既客飯廳, 空間感一流, 外連平台花園, 外望已可享大潭海景, 花園有啲亂, 不過稍加修輯一定會係一個靚花園, 因為除左景靚外, 更多係佢個間格方正, 而且呢個花園樓下係車庫, 所以免除左好多獨立屋低私隱既問題。廁房同工人套房亦位於一樓呢層, 廚房唔算好大, 不過好用而且夠豪華。
上多一層就係偏廳同客房們, 客房SIZE略小, 只有大約100呎, 但外望都係超靚全海景, 洗手間就有浴缸同企缸, 以客廁嚟講真係交足功課。
再上到最頂層, 可以話係呢間屋仔既精心傑作。點傑作法呢? 首先, 呢間屋係無天台的, 開頭會覺得點解咁失敗呢? 當你上到嚟頂樓後, 就會明白, 原來3樓天台好多地方都有透光玻璃, 包括埋佢個主人廁, 樓梯, 而主人房個頂則是羅馬式圓拱頂. 先講間格, 一上到頂樓, 超過800呎既主人房, 打橫一排窗全海景, 個主套就酒店式加鑽石型宅古池, 用豪華已經不足以形容。主套另一邊則是一個古典味既書房, 基本上呢一層都係為主人而設, 以屋仔嚟講, 佢既間格分配真係算係頂級。
單位現在放租17萬, 呢個數字好似好大咁, 但係其實睇番整個南區, 呢個只不過係租海景屋既入場費嚟, 呢家有間頂級貨比你租, 其實真係可預難求。
