Rinduwangi

16/05/2018

Waktu nitih ka mangsa
Geusna aya di Lahul Mahfudz
Lajuna waktu mapag bulan romadhon
Bumi, langit jeung Malaikat
Mugia jadi saksi ieu diri anu laip
Kuring anu dina kurung
Opat dulur lima pancer
Seja sumujud singkur ka Gusti
Ku ucap kedal Marhaban ya Ramadhan

Nanging sateuacana
Rumaos kalbu nu kajurung laku pinuh kapaur
Kajajap rasa melang hariwang
Tinangtos kantos aya carios anu teu sapagodos
Aya talajak anu campelak
Salami urang sasarengan sempal guyon

Simkuring salaku salah sawios admin Rinduwangi
Seja ngawakilan ais pangampih
Sadaya rengrengan admin saparakanca ieu rohangan
Seja tawakup anu kasuhun
Jembar pangampura anu di seja tisadaya baraya
Sumawona rengrengan saparakanca
Clik putih clak herang
Teu geuneuk teu maleukmeuk
Estuning caang bulan opat welas
Jalan gede sasapuan taya pisan gantar kakaitan,,,

www.rinduwangi.com

21/04/2018

Teu kedah riweuh, candak we hikmahna

13/04/2018

Boa-Boa

Langit pamustrungan
Basa angkeub nyimbutan pasosore
Taya layung nu bisa di teuteup
Taya katumbiri nu bisa di sawang
Ukur ha'atna kalangkang panutan
Nu sakolebat hiber dina lamunan
Nyipta mangrupa rasa
Nu sesah di pangpalerkeuna

Basa angkeub mimiti nyingray
Hanjakal mangsa geus reup-reupan
Taya paningal nu ngabebenjokeun
Sumawona suanten panutan nu sholawatan
Ngidungkeun kawih pupujian
Ka Dzat Robbi nu murbeng alam
Ka Baginda Rosul nu jadi panutan

Hawar-hawar sora adzan ti katebihan
Ngageterkeun hate nu keur anteng
Galindeng nu taya kidung pikeun nanding
Taya getretan jieunan manusa
Nu bisa ngelehkeun geteran adzan

Meureun ngan ukur jijiriman
Nu nandingkeun adzan jeung kakawihan
Meureun ngan ukur aakuan
Pedah keur reuay nu nyiliwuri

Geulis,,,
Estuning kaendahan nu titipan
Mangga di jaga di riksa
Mangkade aurat ambarayah
Simbutan mastaka ku kaendahan
Sanajan ngan ukur tudung salambar
Hakekatna langkung agung ti gelung jucung

Sanajan tudung salambar
Ukur di papaes paniti jeung jarum pentul
Mungguhing kawajiban ti Gusti
Eta langkung sae ti mangrupi konde

Haturan nu galeulis
Wanoja tatar sunda nu nyar'i dina syar'i
Nu laleunjang dina tetekon nini moyang
Wanoja sunda nu ngajungjung budaya
Budaya nu di dadasaran syare'at agama
Sangkan hirup langkung mulya,,,

25/01/2018

25/01/2018

17/02/2017

Dadali...
Nguriling malipir wanci
ngalayang ngalanglang mangsa
nyungsi kaasih wanci janari
neang kanyaah mangsa sareupna.

Meulah jagat neang duriat
nyungsi janari nganti birahi
mapag kaheman nyiar laratan
wirahma cinta nu kungsi marengan.

Di mumunggang tegalan kamelang
dadali nyangsaya di rungkun kiara
jangjangna reunggas sorana peura
kembang impian geus aya nu boga.

Saban mangsa diteangan
tiap beja dianjangan
wirahma kacinta nu ditungguan
gening tunggara nu karandapan,,,

16/02/2017

Di kalangkang bulan
lengkah anjeun ngantunkeun impian
bentang dareuda ngeunteung lamunan
nyungsi janari suda harepan.

Di kalangkang bulan
seungit malati geus laligaran
kasapu angin kebat ngajauhan
kasimbeuh hujan mupus lamunan.

Di kalangkang bulan
raray anjeun ngeunteung lamunan
najan duriat katunggel jaman
tapi kanyaah anjeun tetep maturan
ubar kasono mangsa nyorangan
najan ukur sawates lamunan.

02/01/2017

Manusa,,,
Hiji wujud anu bakal perlaya
Leungit bentuk ilang rupa
Nembus alam taya cahya
Mangsa nyawa kaluar sakuduna
Tina jasad, ragana manusa

Manusa,,,
Naon anu bisa dibawa
Kana liang hiji ka dua
Anu heurin pikeun usik
Anu heureut pikeun ngejat
Paadu tuur jeung padung
Pakepis leungeun jeung lalandak

Manusa,,,
Naon anu bisa dibawa
Sabab harta geuning taya harti
Pangkat jabatan taya guna
Sanak baraya moal maturan
Sakabehna taya bisa anu nulungan

Manusa,,,
Wujud jeung rupa
Sagalana saukur titipan
Heunteu bisa ngabogaan
Najan salambar buuk anu jadi itungan

Manusa,,,
Eta wujud anu bakal perlaya

05/12/2016

Katineung,,,
Balebat tos nyampeur deui
Satia tigin kana jangji ngageuing jiga kamari
Ngajak mieling ka Illahi Robbi

Katineung,,,
Singlar simbut kahoream
Singkil geura susuci
Sing isin ku temah wadi

Katineung,,,
Hayu urang sasarengan mapag poe ku harepan
Diandung du'a sapinuhna, kalawan ridona Gusti,,,

18/10/2016

Balebat nu bakal hibar ti belah wetan
Jadi tanda robahna mangsa
Beurang geus tereh datang
Ngaganti peuting nu baris pamit seja indit,,,,