26/07/2024
HMANA AN RUKRU MAN KHA.
A hmâ pawha an man fo tawh ngawlvei pakhat chuan, an vênga pa hausa uchuak lutukte Camera hlui, an hman tawh ngai loh, an naupangin a ken chhuah, khawlaiah a ṭhiante nêna an infiamna bul vêla a dah mai mai chu a lo la a, a lo hralh a, an man a, an lo bawr deuh laih laih lai chuan..
: "Eng maw a tihsual a..?"
"A tam mai, sawi sên a ni lo, nimina Camera bo pawh kha ama rûk hi a lawm!"
: "Anih chu mawle, engtin nge in lo tih a..?"
"E.. a mit kan tûam daih a, a hnungzâng leh malpui, a kephah hnuai pawh kan vaw duk vek, a ngal kan roll bawk!"
: "Chu.. in vaw nasa bawk a, ṭha takin a awm tawh dâwn chu.."
"A teuh lo lutuk tlat, a hmâ pawhin âr rûk leh mi insakna rod b**g a lo hralh rûk avângin kan vaw hrep tawh!"
: "Chuti chu, a va sim si lo ve, in vaw na tâwk lo ani ang..!?"
"E.. hei aia vuak nat chuan a thi mai ang! Hmânah duty zînga mi hian a hnek thal tawp a, a náknêmah a chhuih hrep bawk a, a ruh no 2 a tliak a, kan thup thei hrâm a lawm!"
: "Chu... k*t chu in thlâk vîau tawh a ni maw..?"
"Aw, kan thlâk nasa tawh a, a sâwt lo!"
: "Home ah te in dah ve tawh em..?"
"Dah ngun tawh, Jail ah pawh ṭum 4 kan dah tawh!"
: "Home leh Jail ah in dah tawh a, K*t inthlâk nasa a; tûnah pawh nâ tiin a khua a s*k mêk a ni a, tûnhmâin in lo thlâk ṭhin tawh bawk i ti tiraw..?"
"Aw, dah fo ve, nia, kan k*t a tuar hnem viau tawh!"
: "Chutianga in tih chu 'a ṭhat phah lo' i ti em ni kha..?"
"Umm, engmah a sâwt lo ve, a dinhmun avâng pawh hian sim tûr a nia, a ni ang fahrah; hmeithei fa ve mai mai leh nghâl, zah ngawih ngawih záwk âwm a nia!"
: "Eheu... an dinhmun azira man duh leh man duh loh in nei a ni maw..!?"
"Umm.. Nia.. Ih, nei lutuk chuang lo ve!"
: "Ngawi teh, hmeithai fa leh chhungkaw rethei nilo ta se, Officer leh Upa fa chu nisela hetiang hian in ti lo vang a..?"
"Ti ve tho, A... ka hre bîk lo!" tiin a lu thak lo pui chu a hiat hruap hruap a!
: "Engpawh nise la, tûna in man Iakah hian theihtâwp in chhuah tawh maw..?"
"Aw, hei bâk hi tih dân a awm tawh lo vang!"
: "A ṭhat phah si lo maw..?"
"Teuh lo, a bei nasa zual zâwk!"
: "Theih tawp in chhuah tak meuh maw..?" a tih lai chuan midang pakhat, tiang keng, an hausak êm avânga chanvo an pêk thar, la junior deuh hian aw ki sâng lam deuh lek lek hian...
"Ekhai, hetiang bâk hi chu khawdangah pawh tihdan an hre bîk lo vang!" a rawn ti vel! Chumi vênga an pêm luh hma chuan, an khuaah hruaitu a lo ni ve tawh a, ruihhlo khawih nasate (Hardcore) an lo enkawl ṭhin tawh rèng emaw chu aw; sawi zui tawh lo mai ang! A tîra zâwttu bawk khan:
: "A ṭha duh tlat si lo va maw..?"
"Aw, ṭha duh tlat lo!"
: "Kawng hrang hrangin in bei nasa tawh a maw..?"
"Aw, ti nasa tawh tak kan ni!"
: "A sual zêl tho si a maw..?"
"Aw, theihtâwp kan chhuah, a sual leh zêl tho!"
: "Ani maw, anih leh ṭum khat tal a tihsual hi in NGAIDAM tawh em aw..!?"
A reh ta ṭhap mai, a hma khân sawi tûr an ngah hlawm teh l*l nen..!
: "Ka zawhna chu min chhâng thei in awm em, 'Vawikhat tal he misual hi in ngaidam tawh em?' Min lo hrilh..."
"Aih, keini hian vawikhatmah kan la ngaidam miah lo!"
: "Umm, Hmangaihna rilru nên ngaidam ula, tuamhlâwm ru! Hmangaihna leh Ngaihdamna aia misualte enkawlna atâna hlâwk leh thiltithei hi a awm lovang, keini pawh hi Lal Isua zâra ngaihdam chawp vek kan ni a sin!" a ti ta a.
K*m 3 a han liam leh chuan, an misual man ṭhin kha a piangthar tawh a; Kohhran Ṭhalaiah te a inhmang chho va, Pathian hruaina zârah amah lo man fo ṭhintute nen ngei chuan, 'Mihring mantu' atân Petera'n Lal Isua kohna a chhâng ang deuh khan, Pathian rawng an bâwl ho ta zâwk a ni! Pathian tân hmuh an va nuam dâwn tak êm! Kan rawngbâwlnaah hian 'Pathian khawngaihna' hi dah pawimawh hmasakah i nei zêl ang u. Thu dangte pawh ngai pawimawh bawk ila, 'Pathian khawngaihna' zuan khûmna tûr khawpa thu pawimawh hi a awm thei tlat lo!
'A pawimawh lai ber chu Pathian khawngaihna hi a ni. Pathian pawhin a hlauhawmna aiin a khawngaihna hi kan hriatfiah a duh a, mi zawng zawng tân a Fapa a rawn hlân tawp a ni.!'
SH.Mapuia.🙏🏻
