https://www.facebook.com/104489292168660/

Post Time, Kuala Lumpur (2026)

12/07/2026

ချောက်မြို့နယ်တွင် စစ်ကောင်စီတပ်က PDF အသွင်ယူ စီးနင်းမှုကြောင့် တော်လှန်ရေးရဲဘော် ၂၀ ဦး ကျဆုံး
၁၂ ဇူလိုင် ၂၀၂၆

မကွေးတိုင်း၊ ချောက်မြို့နယ်ရှိ တော်လှန်ရေးတပ်ဖွဲ့စခန်းတစ်ခုကို စစ်ကောင်စီတပ်က PDF အသွင်ယူကာ အနီးကပ် ဝင်ရောက်စီးနင်းခဲ့သဖြင့် တော်လှန်ရေးရဲဘော် ၂၀ ဦး ထိခိုက်ကျဆုံးခဲ့ရကြောင်း သိရသည်။

ဇူလိုင်လ ၁၀ ရက် မွန်းတည့် ၁၂ နာရီခန့်တွင် ချောက်မြို့နယ်၊ တောင်သာ ကျေးရွာနှင့် စမ်းကန်ကျေးရွာအနီးရှိ မကွေးခရိုင် အမှတ် ၃ တပ်ရင်း စုဖွဲ့မှုနယ်မြေအတွင်း အဆိုပါ ဖြစ်စဉ် ဖြစ်ပွားခဲ့ခြင်း ဖြစ်သည်။

ဒေသတွင်း သတင်းရင်းမြစ်များအရ စစ်ကောင်စီတပ်ဖွဲ့ဝင်များသည် အရပ်ဝတ်များ ဝတ်ဆင်ကာ ဦးထုပ် (Helmet) နှင့် စစ်အသုံးအဆောင်အချို့ကိုသာ ဆင်ယင်ပြီး PDF ရဲဘော်များအသွင်ဖြင့် ချဉ်းကပ်လာခြင်းဖြစ်သည်။

စခန်းရှိ ရဲဘော်များက ၎င်းတို့အား မဟာမိတ်တပ်ဖွဲ့ဟု ထင်မှတ်ကာ လက်ပြနှုတ်ဆက်ခဲ့ရာမှ အနီးကပ် လှည့်ဖြားစီးနင်းမှုကို ခံလိုက်ရခြင်းဖြစ်သည်။

ယင်းသို့ ဝင်ရောက်တိုက်ခိုက်ခံရမှုကြောင့် PDF ရဲဘော် ၃ ဦး နေရာတွင်ပင် ကျဆုံးခဲ့ပြီး ၁၇ ဦး ဖမ်းဆီးခြင်း ခံခဲ့ရသည်။

ဖမ်းဆီးခံရသူများအနက် ၂ ဦးသာ ပြန်လည်လွတ်မြောက်လာနိုင်ခဲ့သည်။

စစ်ကောင်စီတပ်သည် ဖမ်းဆီးသွားသည့် ရဲဘော်များကို တောင်သာ (တောင်) ကျေးရွာ စာသင်ကျောင်းသို့ ခေါ်ဆောင်သွားခဲ့ပြီးနောက် ၎င်းတို့၏ အသက်အန္တရာယ်ကို ရန်ရှာခဲ့ခြင်း ဖြစ်သည်။ ကျဆုံးသွားသူများတွင် ပြင်းထန်ဒဏ်ရာများ ရရှိထားကြောင်း တွေ့ရှိရသည်။

ကျဆုံးသွားသည့် ရဲဘော် ၂၀ ဦးမှာ -
၁။မကွေးခရိုင် အမှတ် ၃ တပ်ရင်းမှ ၁၃ ဦး
၂။ မကွေးခရိုင် အမှတ် ၁ တပ်ရင်းမှ ၁ ဦး
၃။ မကွေးခရိုင် ပြည်သူ့ကာကွယ်ရေးအဖွဲ့ (ပကဖ) မှ ၆ ဦး တို့ ဖြစ်ကြသည်။

စစ်ကောင်စီဘက်က ယမန်နေ့ ညနေ ၃ နာရီခန့်တွင် ဖြစ်စဉ်နှင့် ပတ်သက်သည့် ဓာတ်ပုံများကို ထုတ်ပြန်လာပြီးနောက်တွင်မှ အဆိုပါအခြေအနေကို အတည်ပြုနိုင်ခဲ့ခြင်း ဖြစ်သည်။

လက်ရှိတွင် စစ်ကောင်စီတပ်သည် တောင်သာကျေးရွာ၌ ဆက်လက်တပ်စွဲထားပြီး စစ်ကြောင်းထိုးနေသဖြင့် နယ်မြေအတွင်း တိုက်ပွဲများ ဆက်လက်ဖြစ်ပွားနေသည်။ ထို့ကြောင့် ကျဆုံးရဲဘော်များ၏ ရုပ်အလောင်းများကို ယနေ့တိုင် ပြန်လည်ကောက်ယူနိုင်ခြင်း မရှိသေးကြောင်း သိရသည်။

သတင်း - ရွှေမို

12/07/2026

မောတောင်မြို့တွင် တိုက်ပွဲပြန်လည်ဖော်ဆောင်ရန် အသင့်ရှိနေပြီဖြစ်၍ ပြည်သူများလိုက်နာရမည့် လုံခြုံရေးသတိပေးချက်များ ထုတ်ပြန်၊ မြို့ခုခံကာကွယ်ရေး ၁ နှစ်ကျော်အတွင်း စစ်ကောင်စီတပ်သား ၅၀၀ ကျော်ကို ချေမှုန်းသုတ်သင်ရှင်းလင်းနိုင်ခဲ့

၁၂ ဇူလိုင် ၂၀၂၆

တနင်္သာရီတိုင်း၊ တနင်္သာရီမြို့နယ်၊ မောတောင်မြို့တွင် တိုက်ပွဲများ ပြန်လည်ဖော်ဆောင်ရန် တော် လှန်ရေးတပ်ဖွဲ့များအနေဖြင့် အသင့်အနေအထားရှိနေပြီဖြစ်ပြီး ပြည်သူများ လိုက်နာရမည့် လုံခြုံရေးသတိပေးချက်များကို BLACK COBRA COLUMN က သတိပေးထုတ်ပြန်လိုက်သည်။

တော်လှန်ရေးတပ်များ သိမ်းပိုက်ထားသော မောတောင်မြို့ကို ၂၀၂၄ ခုနှစ် ဒီဇင်ဘာလမှစတင်၍ စစ်ကောင်စီက တနင်္သာရီ-မောတောင်လမ်းကြောင်းကို ပြန်လည်ထိန်းချုပ်နိုင်ရေး ထိုးစစ်ဆင်လာခဲ့ပြီး တော်လှန်ရေးတပ်ဖွဲ့များက လူအင်အား၊ လက်နက်ခဲယမ်းနှင့် နည်းပညာအင်အား မမျှတသည့် အခြေအနေများကြားမှ ၁ နှစ်နှင့် ၄ လကြာ ခုခံတိုက်ခိုက်နိုင်ခဲ့ကြောင်း သိရသည်။

ယင်းကာလအတွင်း တော်လှန်ရေးတပ်ဖွဲ့များက မောတောင်မြို့ကို သိမ်းပိုက်ကာ ၆ လခန့် ထိန်းချုပ်ထားနိုင်ခဲ့သော်လည်း ၂၀၂၆ ခုနှစ် ဧပြီလမှစတင်၍ စစ်ကောင်စီက ဗျူဟာ ၂ ခုနှင့် တပ်ရင်း ၁၁ ရင်းပါဝင်သော အင်အားအလုံးအရင်းဖြင့် မြေပြင်ထိုးစစ်ဆင်ခြင်း၊ လေကြောင်းဗုံးကြဲတိုက်ခိုက်ခြင်း၊ လက်နက်ကြီးနှင့် ဒရုန်းများ အသုံးပြုတိုက်ခိုက်ခြင်းများ အပြင်းအထန်ပြုလုပ်လာခဲ့ကြောင်း သိရသည်။

ထို့ကြောင့် ကာလရှည်ကြာ တိုက်ပွဲများကြောင့် တော်လှန်ရေးတပ်ဖွဲ့ဝင်များ စစ်ပမ်းလာခြင်းနှင့် စစ်ကောင်စီ၏ လေကြောင်းတိုက်ခိုက်မှုများကြောင့် အရပ်သားထိခိုက်မှုများ တိုးလာသဖြင့် မောတောင်မြို့နှင့် ထုံခါး-မောတောင် လမ်းပိုင်းကို ၂၀၂၆ ခုနှစ် မေလ ၆ ရက်တွင် နည်းဗျူဟာအရ ဆုတ်ခွာပေးခဲ့ရကြောင်း သိရှိရသည်။

BLACK COBRA COLUMN ၏ အဆိုအရ မောတောင်မြို့ ခုခံကာကွယ်ရေးကာလ ၁ နှစ်နှင့် ၄ လအတွင်း စစ်ကောင်စီတပ်သား ၅၀၀ ကျော် သေဆုံးခဲ့ပြီး ၁,၀၀၀ ကျော် ဒဏ်ရာရရှိခဲ့ကြောင်း၊ စစ်ကောင်စီတပ်သား ၄၆ ဦးမှာ တော်လှန်ရေးတပ်ဖွဲ့များထံ ဘက်ပြောင်းခိုလှုံလာခဲ့ပြီး လက်နက် ၃၇ လက် ယူဆောင်လာခဲ့ကြောင်း သိရသည်။

တော်လှန်ရေးဘက်မှလည်း ရဲဘော် ၅၁ ဦး ကျဆုံးခဲ့ပြီး ရဲဘော် ၁၃ ဦးမှာ ကိုယ်အင်္ဂါအစိတ်အပိုင်းများ ဆုံးရှုံးခဲ့ရကာ အခြားဒဏ်ရာရရှိသူများလည်း အများအပြားရှိခဲ့ကြောင်း သိရှိ၇သည်။

အဲဒါက တစ်နှစ်နဲ့ လေးလအတွင်း၊ ၂၀၂၄ ဒီဇင်ဘာလကနေ ကျနော်တို့ မောတောင်မြို့ကို ခွာတဲ့အချိန်အထိ အခြေအနေကို ခြုံငုံဖော်ပြထားတာပါ။ စစ်ကောင်စီက မောတောင်ကို စပြီးထိုးစစ်ဆင်လာတဲ့အချိန်ကတည်းက ကျနော်တို့ ခုခံတိုက်ခိုက်ခဲ့တဲ့ ခံစစ်ကာလတစ်ခုလုံးရဲ့ အခြေအနေဖြစ်ပါတယ် ဟု BLACK COBRA COLUMN မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနသို့ ပြောကြားသည်။

မောတောင်မြို့သိမ်းတိုက်ပွဲအတွင်း စစ်သုံ့ပန်း ၅၃ ဦး ဖမ်းဆီးရမိခဲ့ပြီး ယင်းနှင့်သက်ဆိုင်သော အသေး စိတ်အချက်အလက်များကို သီးခြားထုတ်ပြန်သွားမည်ဟု BLACK COBRA COLUMN ကအသိပေးထားသည်။

လက်ရှိတွင် တော်လှန်ရေးရဲဘော်များသည် အနားယူခြင်း၊ ပြန်လည်မွမ်းမံပြင်ဆင်ခြင်းများ ပြုလုပ်ပြီးဖြစ်သဖြင့် တိုက်ပွဲဝင်ရန် အသင့်အနေအထားတွင် ရှိနေပြီဖြစ်ကြောင်း BLACK COBRA COLUMN က ဆိုသည်။

ထို့ပြင် ဒေသခံပြည်သူများအနေဖြင့် မောတောင်မြို့အဝင် (နကသဂိတ်) မှ အမှတ် (၉) ကျေးရွာအထိ ကုန်တင်ယာဉ်များ ဖြတ်သန်းသွားလာခြင်းကို မပြုလုပ်ရန်၊ သွားလာရန်လိုအပ်ပါက အိမ်စီးကားများနှင့် ဆိုင်ကယ်များကိုသာ အသုံးပြုရန် အသိပေးထားသည်။

ထုံခါးလမ်းဆုံမှ အမှတ် (၉) ကျေးရွာအထိ လမ်းပိုင်းကို အထူးတားမြစ်ဇုန် အဖြစ် သတ်မှတ်ထားပြီး ယင်းဧရိယာအတွင်း ဖြတ်သန်းသွားလာပါက စစ်ရေးပစ်မှတ်အဖြစ် မှားယွင်းထိခိုက်နိုင်သဖြင့် သတိပေးချက်များကို အတိအကျလိုက်နာကြရန် တိုက်တွန်းထားသည်။

ထို့အပြင် စစ်ကောင်စီတပ်ဖွဲ့များနှင့် သတင်းပေး၊ သတင်းယူ၊ အကူအညီပေးသူများကို စိစစ်ဖော်ထုတ်ကာ ထိရောက်စွာ အရေးယူသွားမည်ဖြစ်ကြောင်း၊ စစ်ကောင်စီနှင့် သက်ဆိုင်သော လူ၊ လက်နက်၊ ခဲယမ်းနှင့် အခြားပစ္စည်းများ တင်ဆောင်လာသည့် ယာဉ်များကို စစ်ရေးပစ်မှတ်အဖြစ် သတ်မှတ်မည်ဖြစ်သဖြင့် ယင်းပစ္စည်းများကို သယ်ဆောင်ခြင်းမပြုရန်လည်း သတိပေးထားသည်။

BLACK COBRA COLUMN က လုံခြုံရေးဆိုင်ရာ ထုတ်ပြန်ချက်များကို လိုက်နာခြင်းမရှိပါက ဖမ်းဆီးအရေးယူခံရခြင်း သို့မဟုတ် ပြင်းထန်သော အရေးယူမှုများ ကြုံတွေ့ရနိုင်သဖြင့် ဒေသခံပြည်သူများအနေဖြင့် လုံခြုံရေးသတိပေးချက်များကို အလေးထားလိုက်နာကြရန် အသိပေးထုတ်ပြန်ထားသည်။

ဓာတ်ပုံ- ၂၀၂၅ ခုနှစ် နိုဝင်ဘာလ မောတောင်မြို့သိမ်းတိုက်ပွဲအတွင်း ဖမ်းဆီးသိမ်းဆည်းရရှိခဲ့သော စခန်း၊ စစ်သုံ့ပန်းနှင့်လက်နက်များ။ (ပုံအဟောင်းများဖြစ်ပါသည်။)

07/07/2026

စစ်ကောင်စီက အသက် ၁၈ နှစ်အောက်ကလေးစစ်သား အများအပြားကို အသုံးပြုနေပြီ

၇ ဇူလိုင် ၂၀၂၆

စစ်ကောင်စီသည် အသက် ၁၈ နှစ်အောက် ကလေးသူငယ်အများအပြားကို စစ်သားအဖြစ် အဓမ္မစုဆောင်းအသုံးပြုနေဆဲဖြစ်သော်လည်း စစ်မှုထမ်းသင်တန်း အမှတ်စဉ် ၁ မှ ၂၄ အထိအတွင်း မှားယွင်းဆင့်ခေါ်ခံခဲ့ရသည်ဟုဆိုသော အသက် ၁၈ နှစ်မပြည့်သေးသည့် ကလေး ၁၁၃ ဦးကိုသာ မိဘများထံ ပြန်လည်အပ်နှံကြောင်း ထုတ်ပြန်ကာ ဝေဖန်မှုများကို ဖုံးကွယ်ရန် ကြိုးပမ်းနေကြောင်း မြန်မာ့စစ်ဖက်ရေးရာနှင့် လုံခြုံရေးဆိုင်ရာ လေ့လာရေးအဖွဲ့ (MDSI) က ပြောသည်။

ဇူလိုင်လ ၂ ရက်နေ့တွင် စစ်ကောင်စီခန့် ကာကွယ်ရေးဝန်ကြီး ဗိုလ်ချုပ်ကြီး ထွန်းအောင်က စစ်မှုထမ်းသင်တန်း အမှတ်စဉ် ၁ မှ ၂၄ အထိအတွင်း အသက် ၁၈ နှစ်မပြည့်သေးသည့် ကလေး ၁၁၃ ဦးကို သက်ဆိုင်ရာအာဏာပိုင်များမှတစ်ဆင့် မိဘများထံ ပြန်လည်အပ်နှံခဲ့ပြီးဖြစ်ကြောင်း ပြောဆိုခဲ့သည်။

သို့သော် ယင်းထုတ်ပြန်ချက်သည် စစ်ကောင်စီ၏ ကလေးစစ်သား စုဆောင်းအသုံးပြုနေမှုကို ဖုံးဖိရန် ကြိုးပမ်းမှုတစ်ခုသာဖြစ်ကြောင်း MDSI တာဝန်ခံ ကိုနောင်ရိုးက ပြောသည်။

စစ်တပ်က ဒီလိုမျိုး ဝေဖန်မှုတွေ ပြင်းထန်လာတဲ့အချိန်၊ ကလေးစစ်သား စုဆောင်းနေတယ်ဆိုတဲ့ သတင်းတွေ ကျယ်ကျယ်ပြန့်ပြန့် ထွက်လာတဲ့အခါမျိုးမှာ ကလေးစစ်သားတွေကို စိစစ်ပြီး ပြန်လွှတ်ပေးပါတယ်ဆိုတဲ့ ပုံစံနဲ့ အလီဘိုင်ပြဖို့ လုပ်လေ့ရှိပါတယ်။ ဒါက စစ်တပ်ရဲ့ အစဉ်အလာတစ်ခုလို ဖြစ်နေပါတယ် ဟု ကိုနောင်ရိုးက ပြောကြားသည်။

၎င်းက ဆက်လက်၍ စစ်ကောင်စီထုတ်ပြန်သည့် ကလေး ၁၁၃ ဦးဆိုသည့် အရေအတွက်သည် မြေပြင်တွင် အဓမ္မစုဆောင်းခံထားရသည့် ကလေးစစ်သားအရေအတွက်ကို ကိုယ် စားမပြုကြောင်း၊ အသက်ငယ်ရွယ်သူများကို စုဆောင်းပြီး မှတ်ပုံတင်နှင့် အခြားစာရွက် စာတမ်းများကို ပြင်ဆင်ကာ စစ်တပ်အတွင်း ထည့်သွင်းနေမှုများ ရှိနေကြောင်း ပြောဆိုသည်။

ဒီ ၁၁၃ ဦးဆိုတဲ့ အရေအတွက်က မြေပြင်မှာ တကယ်စုဆောင်းထားတဲ့ ကလေးစစ်သားအရေအတွက်ကို မထင်ဟပ်ပါဘူး။ အသက်ငယ်တဲ့သူတွေကို စုဆောင်းပြီး စာရွက် စာတမ်း အထောက်အထားတွေကို ပြင်ဆင်ကာ စစ်တပ်ထဲ ထည့်သွင်းနေတာတွေ ရှိပါတယ်။ အဲဒီလို လူငယ်တွေက သင်တန်းအပတ်စဉ်တိုင်း၊ သင်တန်းကျောင်းတိုင်းမှာ အများအပြား ပါဝင်နေပါတယ် ဟု ၎င်းက ရှင်းပြသည်။

MDSI ၏ အဆိုအရ စစ်ကောင်စီသည် စစ်မှုထမ်းဥပဒေကို အကြောင်းပြ၍ အသက် ၁၅ နှစ်အရွယ် ကလေးများအထိ ပေါ်တာဆွဲဖမ်းဆီးမှုများ ပြုလုပ်နေပြီး၊ မှတ်ပုံတင်နှင့် အိမ်ထောင်စုစာရင်း စာရွက်စာတမ်းအတုများ ပြုလုပ်ကာ စစ်တပ်အတွင်း ထည့်သွင်းလျက်ရှိကြောင်း သိရသည်။

ယင်းကဲ့သို့ အဓမ္မစစ်မှုထမ်း စုဆောင်းမှုများကြောင့် လူငယ်အများအပြား ပေါ်တာဆွဲဖမ်းဆီးခံရခြင်းနှင့် လူကုန်ကူးရောင်းစားခံရခြင်းများလည်း ဖြစ်ပေါ်နေကြောင်း ဆိုသည်။

စစ်ခေါင်းဆောင် မင်းအောင်လှိုင်က ၂၀၂၄ ခုနှစ် ဖေဖော်ဝါရီလတွင် စစ်မှုထမ်းဥပဒေကို အသက်သွင်းပြီးနောက် စစ်မှုထမ်းသင်တန်း အမှတ်စဉ် ၂၅ အထိ ဖွင့်လှစ်ထားပြီး အမှတ်စဉ် ၂၃ အထိ သင်တန်းဆင်းထားကာ စစ်မှုထမ်းတပ်သား တစ်သိန်းနှစ်သောင်းကျော် စုဆောင်းထားပြီးဖြစ်သည်။

ကုလသမဂ္ဂ အတွင်းရေးမှူးချုပ်၏ ကလေးသူငယ်များနှင့် လက်နက်ကိုင်ပဋိပက္ခဆိုင်ရာ နှစ်ပတ် လည်အစီရင်ခံစာတွင်လည်း မြန်မာစစ်တပ်နှင့် ၎င်း၏ လက်အောက်ခံအဖွဲ့အစည်းများသည် ကလေးသူငယ်များကို ရှေ့တန်းစစ်မျက်နှာများတွင် ပါဝင်စေခြင်း၊ ကင်းစောင့်ခိုင်းခြင်း၊ သတင်းပို့ခိုင်းခြင်းနှင့် ပစ္စည်းသယ်ယူခိုင်းခြင်း စသည့် စစ်ရေးတာဝန်များတွင် အသုံးပြုလျက်ရှိကြောင်း ဖော်ပြထားသည်။

07/07/2026

အတုအယောင်ရွေးကောက်ပွဲကနေ သမ္မတဖြစ်လာတဲ့ စစ်ခေါင်းဆောင်မင်းအောင်လှိုင်က နိုင်ငံတကာအရေးမှာ အသာစီးရသွားပြီလာ?"

ပြည်ထောင်စုလွှတ်တော်ကိုယ်စားပြုကော်မတီ(CRPH)၊ အမျိုးသားညီညွတ်ရေးအတိုင်ပင်ခံကောင်စီ(NUCC) နဲ့ အမျိုးသားညီညွတ်ရေးအစိုးရ(NUG) တို့ စီစဉ်ထုတ်လွှင့်တဲ့ တော်လှန်ပြည်သူ့ စကားဝိုင်း အစီအစဉ် (၂) မှာ NUG ဖက်ဒရယ်ရေးရာဝန်ကြီးဌာန ပြည်ထောင်စုဝန်ကြီး ဒေါက်တာလျန်မှုန်းဆာခေါင်ရဲ့ ဆွေးနွေးမူ့

07/07/2026

တရုတ်တောင်ပိုင်းတွင် မိုးသည်းထန်ပြီး ရေကာတာများ ကျိုးပေါက်ကာ လူရာပေါင်းများစွာ ဘေးလွတ်ရာသို့ ရွှေ့ပြောင်းရ
၇ ဇူလိုင် ၂၀၂၆
တရုတ်နိုင်ငံတောင်ပိုင်း ကွမ်ရှီးဒေသသို့ မေဆတ်တိုင်ဖွန်းမုန်တိုင်း ဝင်ရောက်လာသဖြင့် မိုးသည်းထန်စွာရွာသွန်းပြီး ရေကြီးရေလျှံမှုများ ဖြစ်ပွားခဲ့ရာ အာဏာပိုင်များက ဇူလိုင် ၆ ရက်တွင် ရေကြီးမှုသတိပေးချက်အဆင့်ကို တိုးမြှင့်သတ်မှတ်ခဲ့သည်။

ကွမ်ရှီးဒေသ၏ မြို့တော်နန်နင်းတွင် ရေကာတာများ ကျိုးပေါက်လာသည့်အတွက် အာဏာပိုင်များက ရေဘေးကာကွယ်ရေး အရေးပေါ်တုံ့ပြန်မှုကို အမြင့်ဆုံးအဆင့်သို့ တိုးမြှင့်ခဲ့ရသည်။

နိုင်ငံပိုင်ရုပ်သံ CCTV က ဖော်ပြခဲ့သည့် ရုပ်သံမှတ်တမ်းများအရ လျိုလန်ရေလှောင်ကန်မှ ရေကာတာတစ်ခု ကျိုးပေါက်သွားပြီးနောက် ရွှံ့နွံများရောနှောနေသောရေများ အနီးအနားရှိ အဆောက်အအုံများဘက်သို့ စီးဝင်နေသည်ကို မြင်တွေ့ရသည်။

လျိုလန်ရေလှောင်ကန်အပြင် နောက်ရေလှောင်ကန်နှစ်ခုတွင်လည်း ရေကာတာကျိုးပေါက်မှုနှင့် ရေကျော်မှုများ ဖြစ်ပွားခဲ့ကြောင်း နန်နင်းမြို့အာဏာပိုင်များက တရားဝင် WeChat စာမျက်နှာတွင် ထုတ်ပြန်ထားသည်။ထို့ပြင် ကွမ်ရှီးဒေသအတွင်းရှိ ဖန်းချန်းကန်မြို့တွင်လည်း ရေကြီးမှုဆိုးရွားခဲ့သဖြင့် ဒေသခံ ၈၀၀ ကျော်ကို ဘေးလွတ်ရာသို့ ရွှေ့ပြောင်းပေးခဲ့ရသည်။

မေဆတ်မုန်တိုင်းသည် တရုတ်ပြည်မကြီးသို့ ဝင်ရောက်ပြီးနောက် အပူပိုင်းမုန်တိုင်းအဖြစ် အားပျော့လာသော်လည်း လာမည့်ရက်များအတွင်း ကွမ်ရှီးဒေသနှင့် နိုင်ငံတောင်ပိုင်းဒေသတို့တွင် မိုးဆက်လက်ရွာသွန်းနိုင်ကြောင်း သတိပေးချက်ထုတ်ထားသည်။

07/07/2026

ပေါ်တာဆွဲတဲ့ကိစ္စကို မကျေနပ်လို့ အုပ်ချူပ်ရေးမှူးကို ဓားနဲ့ခုတ်သတ်

၇ ဇူလိုင် ၂၀၂၆

မကွေးတိုင်း၊ အောင်လံမြို့နယ်၊ ပြလို့တိုက်နယ်၊ ကွမ်းလောင်းကျေးရွာအဝင်အနားမှာ အုပ်ချူပ်ရေးမှူးတဦး ဓားခုတ်ခံရပြီးသေဆုံးခဲ့ကြောင်း အောင်လံမြို့နယ်ပကဖ တာဝန်ရှိသူထံက သိရပါတယ်။

ဓားနဲ့ခုတ်ခံရသူဟာ ကွမ်းလောင်းကျေးရွာ အုပ်ချုပ်ရေးမှူး အသက် ၇၀ အရွယ် ဦးအေးဟန်ဆိုသူဖြစ်ပြီး ဇူလိုင်လ ၅ ရက်နေ့ နေ့လည်ပိုင်းက ကျေးရွာထဲကနေ ဆိုင်ကယ်နဲ့ထွက်လာရာ ရွာအဝင်အရောက်မှာ ဓားနဲ့ခုတ်ခံရတာလို့ဆိုပါတယ်။

"ခုတ်တဲ့သူနဲ့က ရန်ငြိုးရန်စရှိတယ်လို့ သိရတယ်။ အုပ်ကြီးက *(စစ်သား)နဲ့အတူသွားအတူလာ၊ ပေါ်တာဆွဲတာမှာ ပါခဲ့တာတွေလည်း ရှိတယ်။ ပေါ်တာဆွဲတာကို မကျေနပ်လို့ ခုတ်တာလို့လောလောဆယ် သိရသေးတယ်"လို့ အောင်လံမြို့နယ်ပကဖ တာဝန်ရှိသူက ပြောပါတယ်။

သူကိုဓားနဲ့ခုတ်သူဟာ ကျောက်ဆွယ်ကျိုးရွာခံ အသက် ၃၀ ကျော်အရွယ်အမျိူးသား ၁ ဦးဖြစ်ပြီး ဓားနဲ့ခုတ်ခံရလို့ ဦးအေးဟန်မှာ ဦးခေါင်းနဲ့လက်တွေမှာ ဒဏ်ရာတွေရပြီးနေရာမှာသေဆုံးခဲ့တယ်လို့ ဆိုပါတယ်။

ဓားခုတ်မှုကျူးလွန်ခဲ့တဲ့ အမျိုးသားကို စစ်ကောင်စီအဖွဲ့တွေက လိုက်လံရှာဖွေနေပေမယ့် ထွက်ပြေးလွတ်မြောက်နေတယ်လို့ ဆိုပါတယ်။

သေဆုံးသူအုပ်ချုပ်ရေးမှူးရဲ့ နာရေးကိုတော့ ဇူလိုင်လ ၆ ရက်နေ့ညနေပိုင်းမှာ ကျေးရွာသုသာန်မှာပင် သဂြိုလ်သွားမယ်လို့ သိရပါတယ်။

ပြီးခဲ့တဲ့ ဇန်နဝါရီလ ၃၀ ရက်နေ့ကလည်း
အောင်လံမြို့နယ်၊ မိုးကောင်းကျေးရွာမှာ အုပ်ချုပ်ရေးမှူး ၁ ဦးပစ်သတ်ခံရလို့ သေဆုံးသွားတယ်လို့ သိရပါတယ်။

ဓာတ်ပုံ - ကွမ်းလောင်းကျေးရွာဆိုင်းဘုဒ်

07/07/2026

လွိုင်ကော်တွင် စစ်ဘေးရှောင်များကို ကူညီပေးနေသည့် ခရစ်ယာန် ကက်သလစ် သီလရှင် ၁ ပါးကို စစ်တပ်က ဖမ်းဆီးပြီး နိုင်ငံတော်အကြည်ညိုပျက်စေမှု ပုဒ်မ ၅၀၅ (က) ဖြင့် ထောင်ဒဏ် ၈ လ ချမှတ်

၇ ဇူလိုင် ၂၀၂၆

ကရင်နီပြည်၊ လွိုင်ကော်မြို့တွင် စစ်ဘေးရှောင်ပြည်သူများကို ကျန်းမာရေးနှင့် လူသားချင်းစာနာထောက်ထားမှုဆိုင်ရာ အကူအညီများ ပေးနေသည့် ခရစ်ယာန်ကက်သလစ်သီလရှင် ၁ ပါးကို စစ်တပ်က နိုင်ငံတော်အကြည်ညိုပျက်စေမှု ပုဒ်မ ၅၀၅(က) ဖြင့် ထောင် ဒဏ် ၈ လ ချမှတ်လိုက်ကြောင်း သိရသည်။

အသက် ၅၀ အရွယ်ရှိ သီလရှင် ဆစ္စတာ ဘင်နီဒက်တာ ညာမိုး (Sr. Benedetta Nya Moe) သည် Sisters of Charity of Saints Bartolomea Capitanio and Vincenza Gerosa သီလရှင်အသင်းမှ ဖြစ်ပြီး၊ ဇွန်လ ၁၀ ရက်နေ့တွင် ကရင်နီ (ကယား) ပြည်နယ် လွိုင်ကော်မြို့အနီး၌ စစ်ဘေးရှောင် အမျိုးသမီးလူနာတစ်ဦးကို ဆေးရုံသို့ ပို့ဆောင်နေစဉ် စစ်ကောင်စီတပ်ဖွဲ့နှင့် တွေ့ဆုံကာ ဖမ်းဆီးခံခဲ့ရခြင်းဖြစ်သည်။

သီလရှင်နှင့်အတူ ဒေသခံ ၂ ဦးလည်း လိုက်ပါလာခဲ့ပြီး စစ်သားများက ၎င်းတို့၏ ဖုန်းများကို စစ်ဆေးရာ Kpay မိုဘိုင်းငွေလွှဲစနစ်မှ အလှူငွေလက်ခံထားသည့် မှတ်တမ်းများနှင့် လက်နက်ကိုင်ပဋိပက္ခဆိုင်ရာ သတင်းအချက်အလက်များကို တွေ့ရှိခဲ့သဖြင့် ဖမ်းဆီးစစ်ဆေးခဲ့ကြောင်း ဒေသခံများက ပြောသည်။

ဒေသခံ ၂ ဦးကို ၄ ရက်အကြာတွင် ပြန်လွှတ်ပေးခဲ့သော်လည်း သီလရှင်ကို ဆက်လက်ထိန်းသိမ်းထားပြီး ဇွန်လ ၂၄ ရက်နေ့တွင် အကျဉ်းထောင်အတွင်းရှိ စစ်ခုံရုံးက ရာဇသတ်ကြီးပုဒ်မ ၅၀၅(က) ဖြင့် ထောင်ဒဏ် ၈ လ ချမှတ်ခဲ့ကြောင်း သိရသည်။ ပြစ်ဒဏ်ချမှတ်သည့်နေ့မှာပင် လွိုင်ကော်အကျဉ်းထောင်သို့ ပို့ဆောင်ခဲ့ကြောင်းလည်း သိရသည်။

ရာဇသတ်ကြီးပုဒ်မ ၅၀၅(က) သည် ၂၀၂၁ ခုနှစ် စစ်အာဏာသိမ်းပြီးနောက် စစ်ကောင်စီက နိုင်ငံရေးဆန့်ကျင်သူများ၊ အရပ်သားပြည်သူများနှင့် လူမှုကူညီရေးလုပ်ငန်းများ ဆောင်ရွက် သူများကို ဖမ်းဆီးအရေးယူရာတွင် ကျယ်ကျယ်ပြန့်ပြန့် အသုံးပြုနေသည့် ဥပဒေပုဒ်မဖြစ်ပြီး အမြင့်ဆုံး ထောင်ဒဏ် ၃ နှစ်အထိ ချမှတ်နိုင်သည်။

ကယန်းတိုင်းရင်းသူဖြစ်သည့် ဆစ္စတာ ညာမိုးသည် သီလရှင်ဘဝ အနှစ် ၂၅ ပြည့်မြောက်ခဲ့သူဖြစ်ပြီး လွိုင်ကော်ဂိုဏ်းချုပ်သာသနာနှင့် ပူးပေါင်းကာ ဒီမော့ဆိုမြို့နယ်နှင့် လွိုင်ကော်အနီးရှိ စစ်ဘေးရှောင်စခန်းများ၊ ကျေးရွာများတွင် ကျန်းမာရေးစောင့်ရှောက်မှု၊ ဆေးဝါးထောက်ပံ့မှုနှင့် အာဟာရအစီအစဉ်များကို နှစ်ပေါင်းများစွာ ဆောင်ရွက်ပေးနေသူဖြစ်ကြောင်း သိရသည်။

သီလရှင်နှင့် အတူလုပ်ကိုင်ခဲ့ဖူးသူတစ်ဦးက ဆစ္စတာ ညာမိုးသည် စစ်ဘေးရှောင်လူနာကို ဆေးရုံပို့ဆောင်နေစဉ် စစ်ကောင်စီတပ်နှင့် ကြုံတွေ့၍ ဖမ်းဆီးခံခဲ့ရခြင်းသာဖြစ်ပြီး လူသားချင်းစာနာထောက်ထားမှုလုပ်ငန်းများကိုသာ ဆောင်ရွက်နေသူဖြစ်ကြောင်း ပြောဆိုသည်။

လက်ရှိတွင် မြန်မာနိုင်ငံတစ်ဝန်းရှိ ကက်သလစ်ဘုရားကျောင်းများနှင့် သီလရှင်အသင်းအဖွဲ့များက ဆစ္စတာ ညာမိုး ဘေးကင်းလုံခြုံစေရေး၊ စိတ်ခွန်အားရရှိရေးနှင့် အမြန်ဆုံး ပြန်လည်လွတ်မြောက်လာရေးအတွက် ဆုတောင်းပွဲများ ပြုလုပ်လျက်ရှိကြောင်း သိရသည်။

ဆစ္စတာ ညာမိုး အဓိက ကူညီဆောင်ရွက်ခဲ့သည့် ဒီမော့ဆိုမြို့နယ်သည် ယခင်က ကရင်နီတော် လှန်ရေး အင်အားစုများ ထိန်းချုပ်ထားသည့် ဒေသဖြစ်ပြီး စစ်ကောင်စီက မြို့ကို ပြန်လည်ထိန်းချုပ်ထားသည်ဟု ဆိုထားသော်လည်း ဒေသအများစုတွင် တော်လှန်ရေးတပ်ဖွဲ့များ ဆက်လက်လှုပ်ရှားနေဆဲဖြစ်ကြောင်း ဒေသတွင်းအခြေအနေကို စောင့်ကြည့်နေသည့် အဖွဲ့အစည်းများက ဖော်ပြထားသည်။

မြန်မာနိုင်ငံတွင် လူဦးရေ ၅၄ သန်းခန့်ရှိသည့်အနက် ခရစ်ယာန်ဘာသာဝင်များမှာ ၆ ရာခိုင်နှုန်းခန့်ရှိပြီး ဗုဒ္ဓဘာသာကို ကိုးကွယ်သူမှာ ၈၉ ရာခိုင်နှုန်းခန့်ရှိကြောင်း သိရသည်။

ဓာတ်ပုံ-၂၀၂၁ ခုနှစ် စစ်အာဏာသိမ်းမှုကို ဆန့်ကျင်ဆန္ဒပြနေကြသော ခရစ်ယာန်သာသနာပြု သီလရှင်များ။ (ပုံအဟောင်းဖြစ်ပါသည်။)

06/07/2026

ထန်းတပင်မြို့နယ်တွင် အသက် ၅ နှစ်အရွယ် မသော်တာဆိုင်ကို နားကပ်ဖြုတ်၊ အဓမ္မပြုကျင့်သတ်ဖြတ်ခဲ့သည့် တရားခံ ရဲဝင်းပိုင်ကို ဖမ်းဆီးရရှိ၊ တရားခံက ပြစ်မှုကျူးလွန်ခဲ့ဟု ဝန်ခံ

၆ ဇူလိုင် ၂၀၂၆

ရန်ကုန်တိုင်း ထန်းတပင်မြို့နယ်၊ တူးချောင်းကျေးရွာတွင် အသက် ၅ နှစ်အရွယ် မသော်တာဆိုင်ကို နားကပ်ဖြုတ်၊ အဓမ္မပြုကျင့် သတ်ဖြတ်ခဲ့သည့် တရားခံဖြစ်သူ အသက် ၃၃ နှစ်အရွယ် ရဲဝင်းပိုင်ကို ပဲခူးတိုင်း၊ နတ်တလင်းမြို့၌ ဖမ်းဆီးရမိခဲ့ကြောင်း ရဲသတင်းရင်းမြစ်က အတည်ပြုသည်။

ဇူလိုင်လ ၃ ရက်နေ့ နံနက်ပိုင်း အသက် ၅ နှစ်အရွယ် မသော်တာဆိုင်သည် ကျောင်းသွားရန် ပြင်ဆင်ပြီးနောက် နေအိမ်မှ ပျောက်ဆုံးသွားခဲ့ပြီး ယင်းနောက် ယင်းနေ့ ည ၁၁ နာရီ ၂၀ မိနစ်ခန့်တွင် ထန်းတပင်မြို့နယ်၊ တူးချောင်းကျေးရွာ၊ ဦးကံမြင့်လမ်းဘေးရှိ အမှိုက်ပုံအတွင်း ခြုံစောင်နှင့် ဆာလာအိတ်ဖြင့် ထုပ်ပိုးစွန့်ပစ်ထားသည့် ကလေးငယ်၏ ရုပ်အလောင်းကို ပြန်လည်တွေ့ရှိခဲ့သည်။

ရုပ်အလောင်းကို လှိုင်သာယာပြည်သူ့ဆေးရုံသို့ ပို့ဆောင်စစ်ဆေးခဲ့ရာ ကလေးငယ်မှာ ဓမ္မတာ ဆန့်ကျင်သော အဓမ္မပြုကျင့်ခံထားရသည့် လက္ခဏာများ တွေ့ရှိခဲ့ရသည့်အပြင် ကိုယ်ခန္ဓာတစ် လျှောက် အညိုအမည်းဒဏ်ရာများ ရှိနေကြောင်း၊ ဝတ်ဆင်ထားသည့် ရွှေနားကပ်များကို အတင်းဆွဲဖြုတ်ယူသွားသဖြင့် နားပေါက် ပြုတ်ထွက်လုနီးပါး ဒဏ်ရာများလည်း ရရှိထားကြောင်း သိရှိရသည်။

အဆိုပါဖြစ်စဉ်အတွက် ပြစ်မှုကျူးလွန်သူကို ပဲခူးတိုင်း၊ နတ်တလင်းမြို့တွင် ဖမ်းဆီးရရှိခဲ့ပြီး ပြစ်မှုကျူးလွန်သူ တရားခံ ရဲဝင်းပိုင်ကလည်း ကလေးငယ်ကို သတ်ဖြတ်အဓမ္မပြုကျင့်ခဲ့သည်ကို ဝန်ခံထားကြောင်း၊ တရားခံရဲဝင်းပိုင်သည် ဧရာဝတီတိုင်း၊ ပန်းတနော်မြို့နယ်၊ ခနွဲခဖိုကျေးရွာဇာတိဖြစ်ကြောင်း သိရှိရသည်။

လတ်တလော တရားခံ ရဲဝင်းပိုင်ကို လူသတ်မှု၊ အဓမ္မပြုကျင့်မှုနှင့် လုယက်မှုတို့ဖြင့် အမှုဖွင့်ထားကြောင်း၊ လက်ရှိတွင် ဖမ်းဆီးရမိထားသည့် တရားခံ ရဲဝင်းပိုင်ကို ထန်းတပင်မြို့နယ်ရဲစခန်းသို့ လွှဲပြောင်းနေကြောင်း သိရှိရသည်။

06/07/2026

စစ်မြေပြင်သုံး မောင်းသူမဲ့တိုက်ခိုက်ရေးယာဉ်ရဲ့စွမ်းဆောင်ရည်ကို HOD-PDF ချပြ

၆ ဇူလိုင် ၂၀၂၆

တောင်ပိုင်းတိုင်းအခြေစိုက် သေမင်းတမန်ပြည်သူ့ကာကွယ်ရေးတပ်ဖွဲ့ (HOD-PDF) က လက်နက်တပ်ဆင်ထားတဲ့ မောင်းသူမဲ့ယန္တရား (UGV) တစ်ခုကို စမ်းသပ်ပြထားတဲ့ ရုပ်သံဖိုင်ကို ဒီနေ့ထုတ်ပြန်မျှဝေခဲ့ပါတယ်။

HOD-PDF ချပြထားတဲ့ ရုပ်သံဖိုင်မှာတော့ မောင်းသူမဲ့စက်ရုပ်ယာဉ်ပေါ်မှာ တပ်ဆင်ထားတဲ့ လက်နက်ငယ်ကို အဝေးထိန်းစနစ်နဲ့ထိန်းချုပ်ပြီး သေနတ်နှစ်ချက်ပစ်ခတ်စေခဲ့တာကို တွေ့ရပါတယ်။

HOD-PDF အဖွဲ့ဖန်တီးခဲ့တဲ့ ရှေ့တန်းသုံး UGV ယာဉ် (Combat UGV) ရဲ့ တိုက်ခိုက်မှုစနစ်မှာ လက်နက်ငယ်အပြင် အခြားလက်နက်တွေပါ တပ်ဆင်
အသုံးပြုဖို့အထိ အစီအစဉ်ရှိကြောင်း တပ်ဖွဲ့ဝင်တစ်ဦးက ပြောပါတယ်။

လက်ရှိလက်နက်စနစ်ပိုင်းအရဆိုရင် လက်နက်ငယ် (စက်သေနတ်)၊ ၄၀ မမ ၁၂ လုံးတွဲနဲ့ သေမင်းတမန်ထုတ်လေကွဲ ၁၂ လုံးတွဲ တပ်ဆင်နိုင်တဲ့အဆင့်ရောက်ပါပြီ။ နည်းပညာပိုင်းမှာ HOD Offline AI စနစ်နဲ့ အလိုလျှောက်တပ်စခန်းကာကွယ်ရေးနဲ့ တိုက်ခိုက်ရေးစနစ်ကို နည်းပညာအရ ကြိုတင်ပြင်ဆင်ထားပြီးဖြစ်ပါတယ်လို့ HOD-PDF တပ်ဖွဲ့ဝင် တစ်ဦးက Kachin Waves ကို ပြောပြပါတယ်။

HOD-PDF အဖွဲ့ထုတ်လုပ်ထားတဲ့ ရှေ့တန်းသုံး UGV ယာဉ် (Combat UGV) မှာ ၎င်းတို့တပ်ဖွဲ့ကိုယ်တိုင် ရေးဆွဲထားတဲ့ အဝေးထိန်းစနစ်(Alpha)၊ အလိုအလျောက်ထိန်းချုပ်လှုပ်ရှားမှုစနစ် (Beta) နဲ့ စနစ်ခေါင်းဆောင်/ရဲဘော်အစားထိုးစက်ရုပ်စနစ် (Omega) ၃ ခုနဲ့ ဖွဲ့စည်းတည်ဆောက်ထားတယ်လို့ သိရပါတယ်။

အဆိုပါစနစ် (system) ၃ ခုကို ပြင်ဆင်ထုတ်လုပ်ဖို့အတွက် အချိန် ၆ လလောက် ကြိုတင်ပြင်ဆင်ခဲ့ရပေမယ့် ရုပ်သံမှာ ထုတ်ပြထားတဲ့ ဖန်တီးထုတ်လုပ်မှုရလာဒ်အတွက် အချိန်အားဖြင့် ၃ ရက်တာ ကြာမြင့်ခဲ့ကြောင်းလည်း HOD အဖွဲ့ဆီက သိရပါတယ်။

အချိန်က ထောက်ပံ့ငွေရှာရတာကပဲကြာတာပါ အလုပ်လုပ်ဖို့ကအခုလက်ရှိအခြေနေအရ ၃ ရက်ပါပဲ။ နည်းပညာက ကြိုတင်ပြင်ဆင်ပြီးသားဆိုတော့ ဘယ်အရာဖြစ်ဖြစ်မြန်မြန်လုပ်လို့ရပါတယ်"လို့ HOD-PDF ရဲဘော်တစ်ဦးက ဆိုပါတယ်။

မျက်မှောက်ခေတ်စစ်ပွဲတွေဟာ အရင်လို လူအင်အားသုံးသမားရိုးကျစစ်ပွဲတွေလိုမဟုတ်တော့ဘဲ ခေတ်မီနည်းပညာတွေအသုံးပြုပြီး တိုက်ခိုက်ကြတဲ့နည်းပညာမြင့်ဘက်စုံစစ်ပွဲ (Multi Dimensional Warefare) အဖြစ်
ကူးပြောင်းလာတာကို လက်ရှိဖြစ်ပွားနေတဲ့ စစ်ပွဲတွေမှာ တွေ့မြင်ရပါတယ်။

ရှေ့တန်းရဲဘော်တွေရဲ့ အသက်အန္တရာယ်ကို လျှော့ချနိုင်ခြင်း၊ ထောက်ပံ့ပို့ဆောင်ရေးလုံခြုံမှုရှိခြင်းနဲ့ တပ်ဖွဲ့ဝင်အင်အားမလုံလောက်မှုကို ဖြေရှင်းနိုင်ခြင်းဟာ ရှေ့တန်းသုံး UGV ယာဉ် (Combat UGV) ရဲ့ အားသာချက်တွေဖြစ်တယ်လို့ စစ်ဘက်ကျွမ်းကျင်သူတွေဖော်ပြကြပါတယ်။

HOD တပ်ဖွဲ့ရဲ့တီထွင်မှုဟာလည်း အထက်ပါရည်ရွယ်ချက်တွေကြောင့် ဖြစ်တယ်လို့ ဆိုပါတယ်။

အဓိကကတော့ ရဲဘော်အသက်မဆုံးရှုံးစေချင်ဘူး။ စစ်ကလည်းအနိုင်တိုက်ရမယ် မဖြစ်မနေတိုက်ရမယ်။ ဒါကြောင့် နည်းပညာနဲ့ တိုက်ရမယ်။ ပြီးတော့ ကျွန်တော်တို့ ကြုံခဲ့ရတဲ့ စစ်ရေးအတွေ့အကြုံအရ မြေပြင်မှာ တကယ်ဘာလိုနေတာလဲပေါ့နော်။ စစ်ရေးမှာနည်းပညာကပိုပြီး အဆုံးဖြတ်ပေးတော့မယ်ဆိုတာကို ကျွန်တော်တို့မြင်တယ်။ ဒါကြောင့်ပဲ မရှိလည်း ရအောင်လုပ်ဆိုပြီး နည်းပညာကို မရမက ရှာဖွေ လုပ်နေတာပါလို့ HOD-PDF ရဲဘော်ကပဲ ပြောပါတယ်။

HOD-PDF အဖွဲ့ ဖန်တီးထုတ်လုပ်လိုက်တဲ့ ရှေ့တန်းသုံး UGV ယာဉ် (Combat UGV) ဟာလည်း ခေတ်သစ်နည်းပညာစစ်ပွဲမှာ အရေးပါတဲ့ အစိတ်အပိုင်းတစ်ခုအဖြစ်ပါဝင်ပြီး လက်ရှိဖြစ်ပွားနေတဲ့ ယူကရိန်း - ရုရှားစစ်ပွဲမှာ ယူကရိန်းဘက်က UGV ကို တွင်တွင်ကျယ်ကျယ် အသုံးပြုနေတာကိုတွေ့မြင် ရပါတယ်။

နွေဦးတော်လှန်ရေးကာလအတွင်း လူငယ်တော်လှန်ရေးသမားတွေရဲ့ စစ်လက်နက်ပစ္စည်း ဖန်တီးထုတ်လုပ်မှု တွေကို မကြာခဏဆိုသလို မြင်တွေ့ရလေ့ရှိပါတယ်။ ဒရုန်းအမျိုးအစားမျိုးစုံ၊ မော်တာကျည်၊ လက်နက်ငယ်နဲ့ ဆက်စပ်ပစ္စည်း၊ ကျည်ကာ၊ မောင်းသူမဲ့ကား၊ စက်ရုပ် အစရှိတဲ့ တီထွင်ဖန်တီးထုတ်လုပ်မှုတွေကို ချပြခဲ့ကြတဲ့ တော်လှန်ရေးအဖွဲ့များစွာရှိပြီး စုံစမ်းမေးမြန်းချက်အရ ၎င်းတို့ရဲ့ အဓိကအခက်အခဲဟာ နည်းပညာဆိုင်ရာသုတေသနအတွက် ရန်ပုံငွေလိုအပ်ချက်ဖြစ်ကြောင်းလည်း သိရပါတယ်။

HOD PDF အဖွဲ့ကတော့ ၎င်းတို့လက်ရှိ ဖန်တီးထုတ်လုပ်ထားတဲ့ ရှေ့တန်းသုံး UGV ယာဉ် (Combat UGV) ကို အဆင့်မြင့်တင်ခြင်းတွေ ဆက်လက်လုပ်ဆောင်သွားမှာဖြစ်ပြီး လက်တွေ့စစ်မြေပြင်မှာ အသုံးချနိုင်ဖို့အထိ ရည်ရွယ်ထားတယ်လို့ ဆိုပါတယ်။

ကျွန်တော်တို့လည်း စစ်ဆင်ရေးတစ်ခုလုံးကို စက်ရုပ်တွေကပဲ လုပ်ဆောင်သွားမယ့် စနစ်ကို တည်ဆောက်နေတာပါ။ ပြောခဲ့သလိုပဲ နည်းပညာပိုင်းမှာ နေ့စဉ်ကုဒ်တွေရေးနေသလို ကွန်ပျူတာနဲ့ စမ်းသပ်မှုတွေကတော့ နေ့စဉ်လုပ်ပါတယ်။ အပြင်ကို အကောင်လိုက် ထုတ်ဖို့ကတော့ နည်းနည်းကြာဦးမယ်ထင်ပါတယ်လို့ အထက်က ရဲဘော်ကပဲ ဆက်ပြောပါတယ်။

HOD- PDF အဖွဲ့ဟာ MOD ရဲ့ တောင်ပိုင်းတိုင်းစစ်ဒေသအတွင်း စစ်ရေးလှုပ်ရှားတဲ့အဖွဲ့တစ်ခုဖြစ်ပြီး NUG လက်အောက်ခံတပ်မဟုတ်ပေမယ့် ကွပ်ကဲမှုကိုခံယူထားပြီး ပူးပေါင်းတိုက်ပွဲဝင်နေတဲ့ ဒေသတွင်း (Local) တပ်ဖွဲ့တစ်ခု ဖြစ်ကြောင်း သိရပါတယ်။

By D Hline

05/07/2026

အရည်အချင်းပြည့်ဝတဲ့တပ်မတော်ဖြစ်ရေး KNLA တပ်ဖွဲ့တိုင်းတွင် တာဝန်ရှိကြောင်း KNU ဥက္ကဌ တိုက်တွန်း

၅ ဇူလိုင် ၂၀၂၆

စစ်ရေး၊ နိုင်ငံရေးဆိုင်ရာ အရည်အချင်းပြည့်ဝပြီး ကရင်အမျိုးသားလွတ်မြောက်ရေးတပ်မတော်-KNLA အမည်ဖြင့် ကိုက်ညီသည့် တပ်မတော်တစ်ရပ်ဖြစ်ရေး KNLA ခေါင်းဆောင်အပါအဝင် တပ်ဖွဲ့ဝင်အားလုံး၏ တာဝန်ဖြစ်ကြောင်း ကရင်အမျိုးသားအစည်းအရုံး-KNU ဥက္ကဌက တိုက်တွန်းပြောဆိုသည်။

ယနေ့ (ဇူလိုင်လ ၅ ရက်) ကျရောက်သော KNLA တည်ထောင်ခြင်း (၇၇) နှစ်ပြည့်မြောက်သည့်နေ့သို့ ပေးပို့သည့်ဂုဏ်ပြုသဝဏ်လွှာတွင် တပ်ဖွဲ့စည်းရသည့်ရည်မှန်းချက်အတိုင်း ပြည့်စုံရန် KNLA တပ်ဖွဲ့ဝင်တိုင်းတွင်တာဝန်ရှိသည့်အပေါ် ကေအဲန်ယူဥက္ကဌ ပဒိုစောကွယ်ထူးဝင်းက ထည့်သွင်းတိုက်တွန်းထားခြင်းဖြစ်သည်။

ထို့အပြင် စစ်အာဏာရှင်စနစ်ကို တော်လှန်နေကြသည့် အဖွဲ့အစည်းအားလုံးနှင့်လည်း စစ်ရေးဆိုင်ရာ ပူးပေါင်းလုပ်ဆောင်မှုများကို တိုးမြှင့်လုပ်ဆောင်သွားရန် လိုအပ်သည်ဟု KNU ဥက္ကဌက အလေးအနက် ထည့်သွင်းပြောကြားထားသည်။

KNU ဥက္ကဌက "နိဂုံးချုပ်အနေဖြင့် ကရင်အမျိုးသားလွတ်မြောက်ရေးတပ်မတော်နေ့တွင် KNLA မှ အရာရှိစစ်သည်များ၊ မျိုးချစ်ရဲဘော်များ၊ ရဲဘော်ရဲဘက်များနှင့် ကရင်အမျိုးသားအားလုံးသည် KNU ၏ ဦးဆောင်မှုအောက်တွင် ကရင်တစ်မျိုးသားလုံး၏ လိုအင်ဆန္ဒဖြစ်သော စစ်အာဏာရှင်စနစ်အောက်မှ လွတ်မြောက်ခြင်းသာမက ဖက်ဒရယ်ဒီမိုကရေစီပြည်ထောင်စု တည်ဆောက်ရေးတွင်လည်း အားလုံးပါဝင်ကြရန်" သဝဏ်လွှာမှတစ်ဆင့် တိုက်တွန်းထားသည်။

လူမျိုးအားလုံး လွတ်လပ်ရေး၊ တန်းတူညီမျှရေး၊ ကိုယ်ပိုင်ပြဋ္ဌာန်းခွင့် ရရှိရေးနှင့် အတူတကွ လက်တွဲမဖြုတ်ဘဲ လူမျိုးအားလုံး ဖွံ့ဖြိုးတိုးတက်ရေးအတွက် ကြိုးပမ်းလုပ်ဆောင်သွားကြမည်ဖြစ်ကြောင်းကိုလည်း သဝဏ်လွှာတွင် ထည့်သွင်းဖော်ပြထားသည်။

ကရင်အမျိုးသားခုခံတော်လှန်ရေး သမိုင်းကြောင်းတွင် ၁၉၄၉ ခုနှစ်၊ ဇွန်လ (၁၄) ရက်နေ့၌ ကော်သူးလေအစိုးရကို ဖွဲ့စည်းတည်ထောင်ခဲ့ပြီး၊ ထိုမှတစ်ဆင့် ကရင်လက်နက်ကိုင် ခုခံတော်လှန်ရေး အဖွဲ့အစည်းများအားလုံးကို "ကော်သူးလေတပ်မတော်" (Kawthoolei Arms Forces - KAF) အဖြစ် စုစည်းခဲ့သည်။ ထို့နောက် ၁၉၅၆ ခုနှစ်တွင် ကျင်းပခဲ့သည့် ကရင်အမျိုးသားဆိုင်ရာ ကွန်ဂရက်မှ "စစ်ရေးလမ်းစဉ်နှင့်အတူ ကရင်လက်နက်ကိုင် တပ်မတော်၏ ဖွဲ့စည်းပုံ" ကို အတည်ပြုကာ "ကရင်အမျိုးသားလွတ်မြောက်ရေးတပ်မတော်" (KNLA) အဖြစ်သို့ ပြောင်းလဲအသိအမှတ်ပြု ခေါ်ဝေါ်ခဲ့ခြင်းဖြစ်သည်။

လက်ရှိအချိန်တွင် KNU-ကရင်အမျိုးသားအစည်းအရုံး ကာကွယ်ရေးဌာန၏ လက်အောက်တွင် ကရင်အမျိုးသားလွတ်မြောက်ရေးတပ်မတော် (KNLA) နှင့် ကရင်အမျိုးသားကာကွယ်ရေးအဖွဲ့ (KNDO) အပါအဝင် ဒေသခံကာကွယ်ရေးတပ်ဖွဲ့များကို စနစ်တကျ ဖွဲ့စည်းထားရှိပြီး KNU ၏ နိုင်ငံရေးရည်မှန်းချက်ဖြစ်သော လုံခြုံရေးနှင့် စစ်ဘက်ဆိုင်ရာ လုပ်ငန်းစဉ်များကို ဖော်ဆောင်လျက်ရှိကြောင်း သိရသည်။

Photo: AFP

Post Time

12/07/2026

12/07/2026

07/07/2026

07/07/2026

07/07/2026

07/07/2026

07/07/2026

06/07/2026

06/07/2026

05/07/2026

Address

Website

Alerts

Shortcuts

Share

Listing takedown request