06/07/2026
*మంత్రి నారా లోకేష్ సొంత నిధులతో మహిళలకు స్వయం ఉపాధి బాట, ఉచిత కుట్టుమిషన్ శిక్షణ పూర్తి చేసిన 30 మందికి సర్టిఫికెట్లు, కుట్టు మిషన్ల పంపిణీ*
మంగళగిరి, జూలై 6: మంగళగిరి నియోజకవర్గంలో మహిళలను ఆర్థికంగా స్వావలంబన దిశగా తీర్చిదిద్దాలనే లక్ష్యంతో రాష్ట్ర ఐటీ, విద్యాశాఖల మంత్రి నారా లోకేష్ సొంత నిధులతో నిర్వహిస్తున్న 'స్త్రీ శక్తి' కార్యక్రమం విజయవంతంగా కొనసాగుతోంది. ఈ కార్యక్రమంలో భాగంగా నిర్వహించిన ఉచిత కుట్టుమిషన్ శిక్షణ 82వ బ్యాచ్ విజయవంతంగా పూర్తయిన సందర్భంగా సోమవారం మంగళగిరి నియోజకవర్గ టీడీపీ కార్యాలయం డాక్టర్ ఎంఎస్ఎస్ భవన్లో శిక్షణ పొందిన మహిళలకు సర్టిఫికెట్లు, ఉచిత కుట్టు మిషన్లు పంపిణీ చేశారు.
ఈ సందర్భంగా తెలుగుదేశం పార్టీ రాష్ట్ర కార్యదర్శి ఆకుల జయసత్య మాట్లాడుతూ, మహిళలు ఆర్థికంగా బలోపేతం కావాలనే సంకల్పంతో మంత్రి నారా లోకేష్ సొంత నిధులతో ఉచిత కుట్టు శిక్షణ కార్యక్రమాన్ని నిరంతరంగా నిర్వహిస్తున్నారని తెలిపారు. 82వ బ్యాచ్లో మంగళగిరి పట్టణానికి చెందిన 30 మంది మహిళలకు 60 రోజుల పాటు నైపుణ్య శిక్షణ అందించి, ఇప్పుడు వారికి కుట్టు మిషన్లు అందజేయడం ద్వారా స్వయం ఉపాధి అవకాశాలు కల్పించడం ఎంతో సంతోషకరమని అన్నారు.
శిక్షణ పొందిన మహిళలు తమ ప్రతిభను ఉపాధిగా మార్చుకుని ఆర్థికంగా నిలదొక్కుకోవాలని ఆకాంక్షించారు. మంత్రి నారా లోకేష్ సేవా దృక్పథంతో చేపడుతున్న సంక్షేమ కార్యక్రమాలు మంగళగిరి నియోజకవర్గ ప్రజలకు నిరంతరం అండగా నిలుస్తున్నాయని చెప్పారు.
ఈ కార్యక్రమంలో మంగళగిరి నియోజకవర్గ తెలుగు మహిళ అధ్యక్షురాలు, రాష్ట్ర స్వచ్ఛాంధ్ర కార్పొరేషన్ డైరెక్టర్ శ్రీమతి ఆరుద్ర భూలక్ష్మి, టీటీడీ బోర్డు సభ్యురాలు తమ్మిశెట్టి జానకిదేవి, నియోజకవర్గ తెలుగు మహిళ ప్రధాన కార్యదర్శి మంచికలపూడి వైష్ణవి, మండల తెలుగు మహిళ అధ్యక్షురాలు గడ్డిపాటి అపర్ణ, నియోజకవర్గ అంగన్వాడి సెల్ అధ్యక్షురాలు గడ్డం లక్ష్మీ సామ్రాజ్యం, పట్టణ తెలుగు మహిళ ఉపాధ్యక్షురాలు సింహాద్రి బేబీరాణి, పట్టణ తెలుగు మహిళ ప్రధాన కార్యదర్శి ఇండ్ల రజని, మండల మహిళా ప్రధాన కార్యదర్శి అప్పల శాంతి, ఉడతా లావణ్య, గంజి శివసుధ, శిక్షకురాలు లక్ష్మి తదితరులు పాల్గొన్నారు.
