11/01/2026
ডিভোৰ্চ আৰু নিস্তব্ধ হৈ পৰা সন্তান সকলৰ কান্দোন
===============================
আজিৰ সমাজখন আধুনিকতাৰ পথত আগবাঢ়িব ধৰিছে। সকলোৱে মৰ্ডান হ'বলৈ ধৰিছে এইয়া ভাল লক্ষণ। অত্যাধিক মৰ্ডান হ'বলৈ গৈ শেষত নিজকে পাহৰি যায়। সৃষ্টিকৰ্তা আল্লাহ তায়ালাই আমাক মৰ্ডান হ'বলৈ কৈছে কিন্তু সেইয়া বিকৃত ৰূপত বনাই লৈছোঁ আমিবোৰে।আজি এটি গুৰুত্বপূৰ্ণ বিষয়ে আলোকপাত কৰিবলৈ মোৰ এক সৰু লিখনি প্ৰকাশ কৰিবলৈ মনস্থ কৰিছোঁ। সকলোকে পঢ়িবলৈ অনুৰোধ জনাইছোঁ। আজিৰ সমাজখন বহুত উন্নত হৈছে কম বেছি পৰিমাণে সকলোৱে বুজি উঠিছোঁ। কিন্তু ক'ৰবাত যেন মানৱতাহীন হৈছে। আমি সকলোৱে জানো যে পৃথিৱীৰ সকলোৱেই আপোনাক এৰি থৈ গলেও কমচেকম আপোনাক জন্ম দিয়া মাতৃয়ে এৰি থৈ নাযায়। আমি সকলোৱে নিজৰ আপোন বুলি ভাবোঁ। কিছুমান দৃশ্য দেখি সঁচাকৈয়ে চকুলো বৈ যায় কেতিয়াবা নিজকে ঠিক ৰাখিব নোৱাৰা হৈ যাওঁ।আপোনাৰ কষ্ট আপোনাৰ অপমানিত সহ্য কৰিব নোৱাৰে একমাত্ৰ মাতৃয়ে। কিন্তু দেখা গৈছে আজিৰ সমাজত সেই মাতৃয়ে ভুল বুজাবুজিৰ পথত আগবাঢ়িব ধৰিছে এইয়াই বাস্তৱতা। কিছুমান মাতৃয়ে অন্য পুৰুষৰ সৈতে সম্পৰ্ক স্থাপন কৰা কেতিয়াবা আমি বাতৰি কাকত নাইবা সামাজিক মাধ্যমত ভাইৰেল নিউজ পাওঁ। শেষত গৈ ধুনীয়া সংসাৰ এৰি থৈ অন্য পুৰুষৰ সৈতে গুছি যায়। এদিন এটা নিউজ পাইছিলোঁ য'ত নিজৰ সন্তানে চিঞৰি চিঞৰি মাতৃক কাতৰেৰে আহ্বান জনায় আছে আহানা মা উফ কি অসহনীয় সহ্য কৰিব নোৱাৰা বাক্য। এইবোৰ কেতিয়া কমিব মানুহ কিয় নুবুজে ? বুজাৰ শক্তি নাইনে ? নে সঁচাকৈয়ে মানৱতা হেৰাই গ'ল নেকি? হয় আইনত বা পবিত্ৰ কোৰআনত আছে দম্পত্তীৰ মাজত কাজিয়া হ'লে বা মতানৈক্য দেখা এজনে আনজনে বেলেগ বেলেগ হ'ব পাৰিব। আপুনি কেতিয়াবা ভাবিছে নে যে আপোনাৰ সন্তানে পিতৃ-মাতৃৰ মৰম স্নেহৰ বঞ্চিত হৈ গ'ল।
আজিৰ সমাজত ডিভোৰ্চ শব্দটো ধীৰে ধীৰে সাধাৰণ হৈ পৰিছে। স্বামী-স্ত্ৰীৰ মাজৰ মনোমালিন্য, ভুল বুজাবুজি বা মতানৈক্যৰ অন্ত পৰিণতি হিচাপে বহু দম্পত্তীয়ে ডিভোৰ্চৰ পথ বাছি লয়। কিন্তু এই বিচ্ছেদৰ আটাইতকৈ ডাঙৰ আৰু নীৰৱ ভুক্তভোগী হয় সেই দম্পত্তীৰ নিৰ্দোষী শিশুসকলে। কাগজে-কলমে পিতৃ-মাতৃ থাকিলেও, বাস্তৱত তেওঁলোক পিতৃ-মাতৃহীন হৈ পৰে।
ডিভোৰ্চৰ পিছত শিশু এজনৰ জীৱন এক গভীৰ মানসিক সংঘৰ্ষত সোমায়। আগতে যি ঘৰখনত একেলগে হাঁহি-কান্দোন, মৰম আৰু সুৰক্ষাৰ অনুভূতি আছিল, সেই ঘৰখন হঠাৎ নিস্তব্ধ হৈ পৰে। শিশুৱে নাজানে-তেওঁৰ ভুল কি আছিল? কিয় হঠাৎ পিতৃ-মাতৃৰ মাজত দেৱাল উঠিল? এই দেৱালে অজানিতেই শিশুৰ মনত গভীৰ আঘাত কৰে।
বহু ক্ষেত্ৰত দেখা যায়, ডিভোৰ্চৰ পিছত শিশু এজন কেৱল এজন অভিভাৱকৰ লগত থাকে। আনজন পিতৃ বা মাতৃৰ স্নেহ, সময় আৰু উপস্থিতিৰ পৰা তেওঁ বঞ্চিত হয়। ইয়াৰ ফলত শিশুৰ মনত আত্মবিশ্বাস হ্ৰাস পায়, নিৰাপত্তাহীনতাৰ অনুভূতি জন্মে আৰু কেতিয়াবা সমাজৰ প্ৰতি বিতৃষ্ণা গঢ় লৈ উঠে। কিছুমান শিশুৱে অন্তৰ্মুখী হৈ পৰে, কিছুমানে আক্ৰোশ প্ৰকাশ কৰে।
শিশু এজনৰ বাবে পিতৃ আৰু মাতৃ দুয়োৰে ভূমিকা অতি গুৰুত্বপূৰ্ণ। পিতৃয়ে শিকায় দৃঢ়তা আৰু দায়িত্ববোধ, মাতৃয়ে দিয়ে মৰম, সহানুভূতি আৰু মানসিক সাহস। ডিভোৰ্চৰ ফলত এই সমন্বয় ভাঙি যায়। শিশুৱে দুয়োৰে স্নেহ একেলগে নাপায়, যাৰ প্ৰভাৱ তেওঁৰ চৰিত্ৰ গঠনত দীঘলীয়া সময়লৈ থাকে।
সমাজেও বহু সময়ত ডিভোৰ্চ হোৱা পৰিয়ালৰ শিশুসকলক বেলেগ চকুৰে চায়। সহানুভূতিৰ সলনি তেওঁলোকে পায় কৌতুহল বা উপেক্ষা। এই সামাজিক আচৰণে শিশুৰ মনৰ যন্ত্ৰণা আৰু বড়াই তোলে। অথচ এই শিশুসকলৰ কোনো দোষ নাই-তেওঁলোক কেতিয়াও পিতৃ-মাতৃৰ বিচ্ছেদৰ বাছি লোৱাৰ আশা কৰা নাছিল।
ডিভোৰ্চ কেতিয়াবা অনিবাৰ্য হ’ব পাৰে, কিন্তু বিচ্ছেদৰ মাজতো শিশুৰ ভৱিষ্যৎ আৰু মানসিক স্বাস্থ্যক প্ৰথম স্থান দিয়াটো পিতৃ-মাতৃৰ দায়িত্ব। একে ছায়াৰ তলত থাকিব নোৱাৰিলেও, শিশুৰ জীৱনত দুয়োৰে সক্ৰিয় উপস্থিতি, মৰম আৰু দায়িত্ববোধ অটুট ৰাখিব লাগিব।
শেষত ক’ব লাগিব-ডিভোৰ্চ কেৱল দুজন প্ৰাপ্তবয়স্কৰ ব্যক্তিগত সিদ্ধান্ত নহয়; ইয়াৰ প্ৰভাৱ এটা নিৰ্দোষ শিশুৰ সমগ্ৰ জীৱনত পৰে এই সত্য কথা। সেয়ে যিকোনো সিদ্ধান্ত লোৱাৰ আগতে শিশুমনৰ নিস্তব্ধ কান্দোন শুনিবলৈ আমি সকলোৱে চেষ্টা কৰা উচিত। কিয়নো এটা সুখী শিশুই এখন সুস্থ সমাজ গঢ়ি তোলে। শেষত ক'ব খোজোঁ যদি লিখনটো পঢ়ি ভাল লাগে আনক পঢ়োবালৈ উত্সাহিত কৰিব।
আল্লাহ তায়ালাই পবিত্ৰ কোৰআনত যদিও আদেশ দিছে কিন্তু ডিভোৰ্চটো ঘৃননীয় হিচাপে আল্লাহ তায়ালাই কৈছে। যদি আপুনি আমি কোৰআন আৰু হাদিছ অনুযায়ী নিজৰ জীৱন প্ৰতিষ্ঠিত কৰোঁ তেতিয়া হয়তো এই সমস্যাৰ সৃষ্টি নহ'ব। সেয়ে কোৰআন আৰু হাদিছৰ সৈতে গভীৰ সম্পৰ্ক গঢ়ি তুলি নিজৰ ব্যক্তিগত জীৱনৰ পৰা আৰম্ভ কৰি পাৰিবাৰিক জীৱন সুখৰ কৰি তোলো আহক।
-- ইনামুল হক,
ৰৌমাৰী, মাজগাঁও, ভৱানীপুৰ
ফোন-9957470019
