21/04/2026
আসাম পনতরে আব পিলচু বাখোল রিন গাড়াঁ মেনেক সান্তাড় বয়হা মিশি কো এটাঃ জাতি সে দিকু পুশি ঠেন প্রায় দিনামগে আর দমেগে বেবাড়িজ নাহাচার অচঃ কানা। নওয়া সিঞোত দিশম রিন আদিম আর বুনিয়ৌদি হোড় হুই কাতেন রেহঁ আব সান্তাড় হোড় কওয়াঃ নিতং নুনাং বাড়িজ হালত ।
সোশ্যাল মিডিয়া রেয়াঃ ভিডিও ক্লিপ কো ঞেল বাড়া কাতেন, সাওঁতে অনা আসাম পনত রিন গমকে কো সালাঃ রপড়, গাপাল মারাও তালাতে বাডায় ঞাম আকানা যে, চালাও এন ১৬ই এপ্রিল ২০২৬ হিলঃ রানিখাতা ফরেস্ট রেঞ্জ অফিস রিন স্টাপ কো আব সান্তাড় তির্লা কো চেতানরে বেবাড়িজ নাহাচার সে অত্যাচার কো করাও আকাদা। আর আনা দশার হিলঃ সানাম সান্তাড় বয়হা আর মিশি কো যুমিদ কাতেন অনা রানিখাতা ফরেস্ট রেঞ্জ অফিস সেন কাতেন হুলসাই সেংগেল কো জুল কেদা। আর অনা রেয়াঃ ভিডিও ক্লিপ সোশ্যাল মিডিয়ারে ভাইরাল এন তায়ম ১৮ই এপ্রিল ২০২৬ হিলঃ আডি আয়মা নেতৃত্ব কো আরেস্ট কাতেন জিহল খানা রেকো কয়েদ আকাদ কওয়া।
আব গাতাঁক রিন বয়হা মিশি কো নিতং আডি দুখ, হার্কেত আর শাশেতরে তাহেঁ কাতেন দিন কো গুজরাও এদা, নওয়া কো কাথা বাডায় ঞাম কাতেন, আকো সুররে তিংগু গড় খাতির জাহের গাড় খেরওয়াড় গাওঁতা, কাঁচরাপাড়া, উত্তর ২৪পরগনা জেলা পাহটা খনাঃ নংকান নির্ঘিন ঘটণা দো আডি বাড়িজ মেদতে ঞেল এদায়, নিন্দা এদায় আর তীব্র ধিক্কার জানাও এদায়।
অনাকো সানামাঃ খাতির তেহেঞ জাহের গাড় খেরওয়াড় গাওঁতা, কাঁচরাপাড়া পাহটা খনাঃ ভারত রিনিজ রাষ্ট্রপতি, প্রধানমন্ত্রী, স্বরাষ্ট্র মন্ত্রী, আদিবাসী ভালাই মন্ত্রী, আসাম পনত রিনিজ গভর্নর সাওঁতে চেয়ারম্যান - ন্যাশনাল কমিশন ফর সিডিউল ট্রাইব কঠেন ইমেল মাধ্যমেতে মেমোরান্ডাম ভেজা হুয়েনা যাতে আসাম পনত রিন সান্তাড় বয়হা মিশি কো হামেশা নাপায় তেকো তাহেঁ দাড়েয়াঃমা ।
