23/05/2016
பத்திரப்பதிவில் நவீன தொழில்நுட்பம்:தேர்தல் வாக்குறுதி விரைவில் அமல்
அ.தி.மு.க., தேர்தல் அறிக்கையில் அறிவித்தபடி, சார் பதிவாளர் அலுவலகங் களில் பத்திரப்பதிவை எளிமைப்படுத்த, நவீன தொழில்நுட்பத்துடன் கூடிய புதிய திட்டம், விரைவில் அமலுக்கு வர உள்ளது.
அ.தி.மு.க., வெளியிட்ட தேர்தல் அறிக்கையில், 'சார் பதிவாளர் அலுவலகங்களில் பத்திரப்பதிவு எளிமைப் படுத்தப்படும்; நிபுணர் குழு பரிந்துரை அடிப்படையில், வழிகாட்டி மதிப்பு தொடர்பான சிக்கல்கள் தீர்க்கப்படும்' என, தெரிவிக்கப்பட்டு இருந்தது.
தேர்தலில் வெற்றி பெற்றதை அடுத்து, வாக்காளர்களுக்கு நன்றி தெரிவித்த, அ.தி.மு.க., பொதுச் செயலர் ஜெயலலிதா, 'தேர்தல் அறிக்கையில் அளிக்கப்பட்ட வாக்குறுதிகள் அனைத்தும் நிறைவேற்றப்படும்' என்றார். இதற்கான, முதற்கட்டப் பணிகள் துவங்கியுள்ளதாக, பதிவுத்துறை அதிகாரிகள் தெரிவித்துள்ளனர்.
இதுகுறித்து, பதிவுத்துறை உயர் அதிகாரி ஒருவர் கூறியதாவது:தமிழகம் முழுவதும் உள்ள, 578 சார் பதிவாளர் அலுவலகங்களிலும், பத்திரப்பதிவு பணிகளை எளிமையாக்கும் வகையில், நவீன தொழில்நுட்பத்துக்கு மாற்றும் திட்டம் விரைவில் அமலுக்கு வர உள்ளது. தனியார் தகவல் தொழில்நுட்ப நிறுவனத்துடன் ஒப்பந்தம் செய்யப்பட்டுள்ளது. சார் பதிவாளர் அலுவலகங்களில், பதிவுக்கு வரும் சொத்து குறித்த விவரங் களின் உண்மை தன்மை, விற்பவர், வாங்குபவர் குறித்த உண்மை விவரங்கள் தனியார் நிறுவன உதவியுடன், சில நிமிடங்களில் சரி பார்க்க முடியும்.
கை விரல் ரேகையை பதிவு செய்து, சார் பதிவாளர் ஒவ்வொரு பத்திரப்பதிவையும் உறுதி செய்ய வேண்டும். இந்த மாதிரி திட்டம், சென்னை உள்ளிட்ட சில பகுதிகளில் சோதனை முறையில் அறிமுகம் ஆகியுள்ளது. இந்த முயற்சி வெற்றி பெற்றால், 578 சார் பதிவாளர் அலுவலகங்களிலும் அமல்படுத்தப்படும். இவ்வாறு அவர் கூறினார்.
