14/12/2024
రాష్ట్రంలోనే అత్యంత బరువైన వాహనలు రాకపోకలు సాగించే మార్గంలో పొదిలి-ఒంగోలు మార్గం ఒకటని చెబుతుంటారు. ఈ దారిలో ఒంగోలు నుంచి పొదిలి వరకు రద్దీ ఎక్కువ. మర్రిచెట్లపాలెం నుంచి ఒంగోలు వరకు నిత్యం గ్రానైట్ టిప్ఫర్లు, లారీలు, కంకర ట్రాక్టర్లు తిరుగుతుంటాయి. దీంతో రహదారి గుంతలమయంగా మారింది. రామతీర్థం క్యారీల వద్ద గోతులు ఏర్పడి వర్షాలకు తరచూ నీరు నిలిచి చిన్నపాటి చెరువులను తలపిస్తుంటాయి. ఇక దుమ్మూ ధూళి సంగతి సరేసరి. బండి వెనుక ద్విచక్ర వాహనాలపై వెశ్లే పరిస్థితి ఉండదు. దుమ్ముతో ఇటుగా తరచూ ప్రయాణించేవారు అనారోగ్యం పాలవుతున్నారు. పొదిలి పట్టణంలో ఇరుకైన రహదారి కావడంతో నిత్యం ట్రాఫిక్ సమస్యలు తలెత్తుతుంటాయి. ఈ నేపథ్యంలో పీపీపీ విధానంలో నిర్మాణ సాధ్యాసాధ్యా లపై కూటమి ప్రభుత్వం అధ్యయనానికి చర్యలు చేపట్టింది. నిత్యం ట్రాఫిక్ ఎంత ఉంటుంది, మున్ముందు ఎంత పెరిగే అవకాశం ఉంది. ద్విచక్ర వాహనాలు, ఆటోలు, ట్రాక్టర్లు కాకుండా ఇతర వాహనాలకు టోల్ ద్వారా ఎంత వసూలవుతుంది, గుత్తేదారులకు ప్రభుత్వం వయబిలిటీ గ్యాప్ కింద ఎంత చెల్లించాల్సి వస్తుందన్న వివరాలతో సమగ్ర నివేదిక సిద్ధం చేయాలని ప్రభుత్వం అదేశించింది. పీపీపీ విధానంలోనైనా రహదారిని అభివృద్ధి చేస్తే ఈ ప్రాంత వాహన చోదకుల కష్టాలు తీరుతాయని ప్రజలు ఆశిస్తున్నారు.
